ភ្នំពេញៈ អតីតជាកុមារីដែលមានគ្រួសារធ្លាប់ជាអ្នកចៀរកៅស៊ូនៅខេត្តកំពង់ចាម និងបានដូរលំនៅមករស់នៅភ្នំពេញក្បែរតំបន់គំនរសំរាមនៃស្ទឹងមានជ័យ និងរហូតដល់មានវ័យ ១១ ឆ្នាំទើបបានចូលរៀននៅសាលាអង្គការមូលនិធិកុមារកម្ពុជា (CCF) រ៉ុន សុភី ពេលនេះបានជាប់អាហារូបករណ៍រៀនថ្នាក់បរិញ្ញាបត្រនៅសាកលវិទ្យាល័យមែលប៊ននៅអូស្ត្រាលី។
កញ្ញា រ៉ុន សុភី ដែលបានបញ្ចប់ការសិក្សាថ្នាក់ទី ១២ នៅវិទ្យាល័យព្រះស៊ីសុវត្ថិកាលពីឆ្នាំ ២០១៧ និងបានដាក់ពាក្យជាប់អាហារូបករណ៍សិក្សាបន្តនៅប្រទេសអូស្ត្រាលីជាប់សិក្សាថ្នាក់មូលដ្ឋាននៅឆ្នាំ ២០១៨ និងបន្តរើសមុខជំនាញនៅឆ្នាំ ២០១៩ នេះ។ ថ្លែងប្រាប់កាលពីថ្ងៃទី ២០ ខែមិថុនាឆ្នាំ ២០១៩ កន្លងមក កញ្ញា រ៉ុន សុភី ឲ្យដឹងពីការសម្រេចយកមុខជំនាញនៅសាកលវិទ្យាល័យមែលប៊នពេលជួបក្រុមអ្នកសារព័ត៌មាននៅសាលា Neeson Cripps Academy នៃតំបន់គំនរសំរាមស្ទឹងមានជ័យនាមុនចេញដំណើរទៅប្រទេសអូស្ត្រាលីនៅខែក្រោយថា៖ «នាងខ្ញុំបានបញ្ចប់ថ្នាក់មូលដ្ឋានគ្រឹះនៅឯសាកលវិទ្យាល័យ Melbourne ជាង ១ ឆ្នាំហើយ ខណៈការវិលទៅវិញនៅខែក្រោយនេះនឹងចាប់យកជំនាញ»។
បើតាមការស្រឡាញ់នោះគឺចង់រៀន Bachelor of Commerce តែដោយសារនាងខ្ញុំមិនមានលទ្ធផលល្អផ្នែកគណិតនោះក៏សម្រេចយកជំនាញ Bachelor of Artsវិញ។ តែបើតាមគ្រូៗប្រាប់ថា ខ្ញុំក៏អាចរៀនជំនាញផ្នែកពាណិជ្ជកម្មបានដែរតាមវិធីវាងសម្រាប់ការសិក្សានៅប្រទេសអូស្ត្រាលី»។
ដោយធ្លាប់ជាក្មេងស្រីរើសសំរាមនៅតំបន់ស្ទឹងមានជ័យ សែនកំសត់គ្មានផ្ទះសំបែងច្បាស់លាស់ ហើយរហូតដល់មានវ័យ ១១ ឆ្នាំទើបបានចូលរៀន ខណៈត្រូវបានជួយដោយអង្គការ CCF របស់លោក Scott Neeson នោះកញ្ញា រ៉ុន សុភី នៅតែទន្ទេញចាំជាប់មាត់ជានិច្ចពីការជួយប្រែក្លាយជីវិតខ្លួនឲ្យមានពន្លឺវិជ្ជា និងបានស្គាល់ពិភពលោកកាន់តែធំ និងមានឱកាសរៀនចប់វិទ្យាល័យ និងបន្តការសិក្សាក្រៅប្រទេសទៀតដែរ»។
កញ្ញា រ៉ុន សុភី លើកឡើងដោយការរំឭកថា៖ «ប្រសិនបើមិនបានការជួយពីអង្គការរបស់ Scott Neeson ទេ ជីវិតខ្ញុំពេលនេះក៏មិនដឹងយ៉ាងណាដែរ។ ក្រោយពីបានចូលរៀនមក ខ្ញុំគិតថាជីវិតខុសគ្នាឆ្ងាយខ្លាំងណាស់ បើប្រៀបទៅនឹងកាលពីខ្លួនឯងនៅជាក្មេងរើសសំរាមនោះគឺខ្ញុំមានចំណេះដឹងដូចជាក្មេងនៅក្នុងគ្រួសារមានលទ្ធភាពឲ្យរៀន ចេះភាសាអង់គ្លេសអាចប្រើការប្រាស្រ័យទាក់ទងបាន និងមានឱកាសរៀននៅក្រៅប្រទេសផងដែរ»។
ខណៈជិតទៅរៀននៅអូស្ត្រាលីក្នុងពេលឆាប់ៗនេះ ទោះបីសល់ពេលប្រមាណ ២-៣ ឆ្នាំ ទើបចប់ថ្នាក់បរិញ្ញាបត្រ និងអាចរកការងារល្អបានសាងពន្លឺជីវិតខ្លួន ក៏ដូចជាទីពំនឹងគ្រួសារដោយមានឪពុកម្តាយ និងបងប្អូនផ្សេងៗទៀតនៅស្រុកខ្មែរនោះមែនក្តី ក៏យុវតីខ្មែរធ្លាប់ស្គាល់រសជាតិលំបាកកាលពីវ័យក្មេងបានតាំងចិត្តយ៉ាងមុតមាំថានឹងជួយគ្រួសារឲ្យរួចផុតពីភាពក្រីក្រឲ្យខាងតែបានពេលវិលមកស្រុកកំណើតវិញ។
កញ្ញា សុភី បញ្ចាក់ថា៖ «ខ្ញុំសន្យាក្នុងចិត្តរួចហើយថា នឹងជួយគ្រួសារឲ្យរួចផុតពីភាពក្រីក្រ ជាពិសេសនោះចង់ឃើញឪពុកម្តាយខ្ញុំមានភាពស្រណុក ព្រោះថាតាំងពីក្មេងមកខ្ញុំមិនដែលឃើញពួកគាត់មានភាពស្រណុកស្រួលនៅឡើយទេ»៕