ភ្នំពេញ ក្រោយផ្ទុះព័ត៌មានជាជនទីបីមកបំបែកចំណងស្នេហ៍ចាងហ្វាងផលិតកម្ម LD Picture និងអតីតភរិយា តាមរយៈសារបកអាក្រាតពីសំណាក់ស្ត្រីជាអតីតភរិយានោះ តារាស្រីរាងខ្ពស់ស្រឡះកញ្ញា សាឡាត់ ស្រីឡាង បន្ទាប់ពីសម្ងំពុំតបតប៉ុន្មានថ្ងៃ ពេលនេះនាងបានទម្លាយសេចក្ដីព្រាងពាក្យបណ្ដឹង ដោយទារសំណងជំងឺចិត្តពីអតីតភរិយាចាងហ្វាងផលិតកម្ម LD Picture នូវទឹកប្រាក់ ១០ ម៉ឺនដុល្លារ ព្រមទាំងការសុំទោសជាសាធារណៈផងដែរ។
យ៉ាងណាមិញ អតីតភរិយាលោក លៀក លីដា បានត្រឹមតែបង្ហោះរូបលក់ផ្កា អមដោយសារថា៖ «អូនរវល់លក់ផ្ការកស៊ីសិន សន្សំលុយសងវា 100$ ខំជេរវាឲ្យវាខ្មាសគេប៉ុណ្ណឹងហើយ ! ...»។
តាំងពីថ្ងៃទី១១ ខែកុម្ភៈមកម្លេះ គណនីហ្វេសប៊ុកឈ្មោះ« Panhchaka June» ដែលត្រូវបានគេដឹងថាជារបស់អ្នកនាង សុទ្ធ បញ្ចកា អតីតភរិយាលោក លៀក លីដា បានបង្ហោះសារក្នុងបណ្តាញសង្គម ដោយបញ្ជាក់ឈ្មោះកញ្ញា សាឡាត់ ស្រីឡាង ចំៗថាជាជនទីបីមកបំបែកចំណងស្នេហ៍ប្ដីប្រពន្ធ។
ទាំងសំណេរ និងការផ្សាយវីដេអូពី គណនីហ្វេសប៊ុកឈ្មោះ« Panhchaka June» បានឲ្យដឹងថា រូបនាង និងស្វាមីបានលែងលះគ្នាដាច់ស្រេចហើយ តែអ្វីដែលធ្វើឲ្យភរិយាដើមទ្រាំពុំបាននោះគឺ ទង្វើរបស់ស្ត្រីជ្រែកបំបែកស្នេហ៍នោះគឺ នាងបានប្រមាថដល់ដំណក់ឈាមពីចំណងអាពាហ៍ពិពាហ៍លោក លៀក លីដា និងអតីតភរិយា។
ប៉ុន្តែអំឡុងពេលប៉ុន្មានថ្ងៃនេះ តារាសម្តែង សាឡាត់ ស្រីឡាង ពុំបានតបតអ្វីនៅក្នុងបណ្តាញសង្គមឡើយ ដោយមានតែលោក តាន គឹមសួរ ជាអ្នកចេញមុខជំនួសក្នុងការតបពាក្យសម្តីជាមួយអតីតប្រពន្ធលោក លៀក លីដា ម្ចាស់ផលិតកម្ម LD Picture ក្នុងបណ្តាញសង្គមតែប៉ុណ្ណោះ។
កាលពីមុននេះបន្តិចទើបតែបានតារាស្រីវ័យក្មេងកញ្ញា សាឡាត់ ស្រីឡាង បានបង្ហោះក្នុងបណ្តាញសង្គមពីក្រដាសដាក់ពាក្យបណ្តឹងទៅកាន់អតីតប្រពន្ធរបស់លោក លៀក លីដា អមជាមួយសំណេរអះអាងថា៖ «តាមពិតបើតាមចារឹករបស់ខ្ញុំ គឺខ្ញុំតបតតាំងពីដំបូងម៉្លេះ។ តែក្រោយពីពិភាក្សាគ្នាជាមួយបងគឹមសួរធ្វើឲ្យខ្ញុំគិតយល់ថា ការតបតមិនមែនជាដំណោះស្រាយមួយដ៏ល្អទេ ដោយសារតែអ្នកដែលចូលរួមវិភាគនិងកាត់សេចក្តីទាំងនោះមិនមែនជាតុលាការដ៏សុក្រឹត្យនោះទេ តែវាប្រៀបដូចជាយកកេរ្តិ៍ខ្មាស់របស់ខ្លួនឯងមកដាក់តាំងជាសាធារណៈ...»។
បញ្ជាក់ថាក្នុងបណ្តាញសង្គមដែលបានធ្វើការខំមិនទៅលើពាក្យបណ្តឹងរបស់ស្រី ភាគច្រើនមានទំនោរទៅខាងអតីតភរិយាចាងហ្វាងផលិតកម្ម LD Pictureច្រើនជាង ដោយធ្វើការស្តីបន្ទោស និងរិះគន់តារាស្រីវ័យក្មេងកញ្ញា សាឡាត់ ស្រីឡាងយ៉ាងខ្លាំង៕