ភ្នំពេញៈ ក្រោយពីលាចាកសិក្ខាបទក្លាយជាគ្រហស្ថ អតីតភិក្ខុ កក្កដា សុភ័ណ្ឌ បានបន្តការងារជួយសង្គម និងជួយទុរគតជនដូចមុនវិញ ដែលបានធ្វើឲ្យអ្នកប្រើប្រាស់បណ្តាញសង្គមផ្ទុះការចាប់អារម្មណ៍ ចែករំលែករូបភាព និងវីដេអូយ៉ាងព្រោងព្រាត ដោយមហាជនខ្លះបានបញ្ចេញមតិគាំទ្រ និងលើកទឹកចិត្តឲ្យលោកបន្តការធ្វើទង្វើល្អមួយនេះ។
ទោះបីជាទទួលស្គាល់មូលហេតុនៃការលាចាកសិក្ខាបទថា លោកពិតជាបានសាងកំហុសឆ្គងមួយចំនួនមែន ប៉ុន្តែអន្ទិតវ័យ ២១ ឆ្នាំរូបនេះបានលើកឡើងថា បើតាមច្បាប់វិន័យរបស់ព្រះសម្មាសម្ពុទ្ធគឺមិនទាន់ដល់ការសឹកទាំងយប់នោះឡើយ។
អ្វីដែលសំខាន់លោកបានជ្រើសរើសផ្លូវមួយសម្រាប់ខ្លួនឯង ដោយគិតថា បើទោះជាសឹកក៏លោកនៅតែអាចបន្តជួយអ្នកក្រីក្របានដូចគ្នាផងដែរ ជាពិសេសលោកមិនចង់ឲ្យអ្នកណាយល់ច្រឡំបន្តទៀត ។
ថ្លែងប្រាប់ ភ្នំពេញ ប៉ុស្ដិ៍ ក្នុងជំនួបពីថ្ងៃចន្ទលោក កក្កដា សុភ័ណ្ឌ បានឲ្យដឹងថា៖ «ខ្ញុំនៅតែបន្តសកម្មភាពជួយគេដូចដើមអ៊ីចឹង ដោយខ្ញុំនឹងបើកហាងខ្លួនឯង ហើយយកប្រាក់ដែលចំណេញ ៥០% នោះទៅជួយកុមារកំព្រា ចាស់ជរាអ៊ីចឹង ហើយកាន់តែជួយខ្លាំងជាងមុនទៀតផង។ អ៊ីចឹងកុំបារម្ភថា ខ្ញុំសឹកហើយលែងជួយអី ហើយបងប្អូនដែលចង់ជួយពួកគាត់ក៏នៅតែអាចជួយគាត់បានដែរ»។
នៅក្នុងដំណើរជីវិតបួសជាសាវ័ក ព្រះបរមគ្រូសម្មាសម្ពុទ្ធរយៈពេល ១១ វស្សា អតីតសង្ឃ កក្កដា សុភ័ណ្ឌ បានអះអាងថាលោកបានជួយជនទុរគត អ្នកកើតមហារីក ក្មេងកំព្រា ជនអនាថា ជនពិការ អ្នកទីទាល់ក្រ ចាស់ជរា និងបានជួយកសាងសាលា និងវត្តអារាមផងដែរ។
លោក កក្កដា សុភ័ណ្ឌ រៀបរាប់ថា៖ «ខ្ញុំជួយពួកគាត់ ព្រោះខ្ញុំគិតថា ពួកគាត់មិនដឹងទៅរកអ្វីបានទេ ទោះខ្ញុំមិនអាចជួយគាត់បានរហូតមែន តែខ្ញុំអាចជួយបានមួយគ្រាដែរ ដូចអ្នកកើតមហារីក ខ្ញុំឲ្យគាត់ហូបអីដែលគាត់ចង់ហូប។ សម្រាប់ក្មេងកំព្រា ឬក្មេងអនាថា ខ្ញុំយល់អារម្មណ៍គាត់ ព្រោះខ្ញុំធ្លាប់ក្រ ធ្លាប់អត់ អ៊ីចឹងខ្ញុំចង់ឲ្យគាត់បានដូចគេដែរ នាំគាត់ទៅញ៉ាំអី ទិញអីដែលគាត់ចង់បានអីអ៊ីចឹង ហើយខ្ញុំតែងតែប្រាប់ក្មេងៗថា កុំអស់សង្ឃឹមលើជីវិតខ្លួនឯង ត្រូវតែតស៊ូ ខ្វះខាតអីខ្ញុំជួយ ហើយក្មេងមួយចំនួនខ្ញុំបានជួយរកការងារឲ្យគេធ្វើការទៀតផង»។
ស្រាយចម្ងល់ពីអ្នកលេងហ្វេសប៊ុកជាច្រើនតែងតែចោទសួរតើអន្ទិតរូបនេះ បានប្រាក់មកពីណាសម្រាប់ចែកទាន? លោក កក្កដា សុភ័ណ្ឌ បានរៀបរាប់ថា បច្ច័យភាគច្រើនបានមកពីការនិមន្ដសូត្រមន្ដ និងបិណ្ឌបាតពីពុទ្ធបរិស័ទទាំងក្នុង និងក្រៅប្រទេស សូម្បីតែសំបុត្រយន្តហោះ និងការប្រើប្រាស់សម្ភារថ្លៃៗយីហោល្បីៗក៏ជាការប្រគេនពីញាតិញោម ទាំងក្នុង និងក្រៅប្រទេសផងដែរ ដោយលោកមានរូបថតជាភ័ស្តុតាងទៀតផង។
លោក សុភ័ណ្ឌ បានបន្តថា៖ «បើនិយាយពីប្រាក់ជំនួយដែលបងប្អូនផ្ញើមកជួយអ្នកអត់ខ្សោយ ខ្ញុំអត់ទុកទេ គឺជួយទាំងអស់ អ៊ីចឹងបានពួកគាត់ស្រឡាញ់ចូលចិត្តខ្ញុំ ដោយសារតែគាត់ឃើញលុយរបស់គាត់ទៅដល់ដៃអ្នកដែលគាត់ឲ្យ បើទោះគាត់ប្រគេនបច្ច័យ ៤ មកខ្ញុំ ក៏ខ្ញុំយកទៅចែករំលែកដែរក្នុងន័យដូចជាម្តាយឪពុក ជាបងប្អូន»។
ក្រោយលាចាកសិក្ខាបទភ្លាមៗទាំងមិនបានត្រៀមខ្លួន កក្កដា សុភ័ណ្ឌ បានបង្ហាញពីអារម្មណ៍ជាគ្រហស្ថថា៖ «នៅមិនទាន់ស៊ាំ ណាមួយស្លៀកសម្លៀកបំពាក់ធម្មតាដែលធ្វើឲ្យរមាស់ស្បែក ព្រោះធ្លាប់តែគ្រងស្បង់ចីពរតាំងពីកុមារ»។
ប៉ុន្តែលោកក៏សប្បាយចិត្តដែលប្រជាពលរដ្ឋនៅតែស្រឡាញ់ និង គាំទ្រការងារជួយសង្គមរបស់លោក។ បន្ថែមពីការងារសង្គមពីមុន សុភ័ណ្ឌ ក៏មានគម្រោងក្នុងការជួយមន្ទីរពេទ្យ គន្ធបុប្ជា ក៏ដូចជាការបរិច្ចាគឈាមសម្រាប់អ្នកត្រូវការឈាមផងដែរ។
ក្នុងសម្លៀកបំពាក់អាវយឺតពណ៌សមានសញ្ញាម៉ាក LV នាឡិកា iWatch និងគ្រឿងអលង្ការលម្អកាយតិចតួច អន្ទិត កក្កដា សុភ័ណ្ឌ បង្ហាញពីការប្តេជ្ញាចិត្តថា៖ «ខ្ញុំជាគ្រហស្ថអ៊ីចឹង ខ្ញុំកាន់តែជួយមនុស្សថែមទៀត ជួយឲ្យបានច្រើនតាមអ្វីដែលខ្ញុំអាចធ្វើបាន។ ខ្ញុំម្នាក់ឯង មិនអាចតម្រូវចិត្តមនុស្សបានគ្រប់គ្នាទេ។ ខ្ញុំធ្វើអ្វីចេញពីចិត្ត និងទទួលយកការរិះគន់ដើម្បីស្ថាបនា ហើយខ្ញុំនឹងខំប្រឹងជួយសង្គមខ្មែររហូតអស់ដង្ហើម»។
លោកមានលេខទំនាក់ទំនង ០៨៧ ៣១ ៣២ ៤៦ / ០១៧ ៣១ ៣១ ៤៣ ឬ ហ្វេសប៊ុកឈ្មោះ kakada sophorn កក្កដា សុភ័ណ្ឌ៕