ភ្នំពេញ: ក្រោយពីដោះស្បង់ចីវរដែលធ្លាប់គ្រងរយៈពេលជិត ១២ ឆ្នាំមកស្លៀកខោអាវជាគ្រហស្ថដែលមិនទាន់អាចទម្លាប់ខ្លួនបានស្រួលបួលផង អន្ទិត កក្កដា សុភ័ណ្ឌ ហាក់នៅតែមានភាពលេចធ្លោខ្លាំងលើបណ្ដាញសង្គម ទាំងការផ្សាយវីដេអូលក់សម្លៀកបំពាក់លើអនឡាញ និងសកម្មភាពសប្បុរសធម៌សង្គមរហូតមានក្រុមហ៊ុនអចលនទ្រព្យអញ្ជើញទៅថតស្ប៉តពាណិជ្ជកម្ម។
អន្ទិត កក្កដា សុភ័ណ្ឌ ដែលធ្លាប់រងនូវការរិះគន់ចំពោះអត្ដចរិតឃ្យូតៗ សម្ញែងសម្ភារថ្លៃៗ និងជាបុគ្គលបំពេញទានតាមរយៈការបរិច្ចាគធនធានដល់ទុរគតជនទូទាំងប្រទេសបានចាប់ដៃគូជាមួយមិត្ដភក្ដិបើកហាងលក់សម្លៀកបំពាក់មួយឈ្មោះ Behighware ដែលនឹងសម្ពោធជាផ្លូវការនៅថ្ងៃសុក្រ ទី ៩ ខែសីហានេះ។
ទើបដុះសក់ផុតពីលលាដ៍ក្បាលបន្ដិច កក្កដា សុភ័ណ្ឌ អាយុ ២២ ឆ្នាំបាននិយាយប្រាប់ភ្នំពេញប៉ុស្ដិ៍ថា៖ «ខ្ញុំ និងមិត្ដភក្ដិសម្រេចចិត្ដបង្កើតមុខរបររួមគ្នាមួយដោយការលក់សម្លៀកបំពាក់បែបយុវវ័យនាំចូលពីបរទេស។ ពួកខ្ញុំបាន Live វីដេអូលក់តាមអនឡាញបណ្ដើរៗហើយទើបថ្ងៃទី ៩ សីហាខាងមុខនេះ យើងនឹងធ្វើពិធីបើកសម្ពោធធំមួយ»។
អន្ទិត ទើបត្រូវបានផ្សឹកពាក់ព័ន្ធនឹងឈុតសម្ដែងក្នុងវីដេអូឃ្លីបអប់រំដែលបង្កការភ្ញាក់ផ្អើលពេញបណ្ដាញសង្គមបានបន្ដថា៖ «យើងនឹងមានរៀបចំបែបរាត្រីសមោសរដែលមានការចូលរួមពីតារាវ័យក្មេង និងការដើរម៉ូដចាប់ពីម៉ោង ៦:៣០ ល្ងាចតទៅ»។
កំពុងរៀបចំទុកដាក់អីវ៉ាន់លក់ទៅតាមទីតាំងឲ្យមានរបៀបរៀបរយវិញ ក្រោយពីផ្សាយវីដេអូលក់គ្រឿងក្រអូប លោក មៀច ចាន់ដារ៉ា ជាដៃគូជំនួញជាមួយអន្ទិត កក្កដា សុភ័ណ្ឌ បានខ្នះខ្នែងយ៉ាងខ្លាំងចំពោះញើសឈាមមុខរបរនេះដោយខិតខំតុបតែង និងតាំងបង្ហាញសម្លៀកបំពាក់រហូតដល់ការផ្សព្វផ្សាយនៅលើទំព័រហ្វេសប៊ុក Behighware ថែមទៀតផង។
ខុសប្លែកពីដៃគូជំនួញទាំងសាច់ឈាម និងទ្រព្យធន កក្កដា សុភ័ណ្ឌ ដែលមិនទាន់អាចទម្លាប់ការរស់នៅបែបគ្រហស្ថទាំងការស្លៀកពាក់ និងសម្ដីសំដៅនឹងនៅតែបន្ដកិច្ចការសង្គមតាមរយៈសកម្មភាពមនុស្សធម៌ជាមួយជនចាស់ជរា កុមារកំព្រា និងអ្នកមានជំងឺកាចសាហាវនានា។
យ៉ាងណាមិញ អន្ទិតរូបនេះបានអះអាងថាលោកនឹងមិនសម្រេចចិត្ដសាងផ្នួស ដោយផ្ទុយនឹងអ្វីដែលលោកធ្លាប់តែអះអាងពីការថ្វាយខ្លួនជូនព្រះជាមួយនឹងក្ដីស្រឡាញ់ចូលចិត្ដព្រះពុទ្ធសាសនាតាំងពីតូចទេ។
កក្កដា សុភ័ណ្ឌ បានបញ្ជាក់ថា៖ «ខ្ញុំលែងចង់ទៅបួសវិញហើយ ពីព្រោះខ្ញុំឆ្អែតនឹងការឈ្នានីស ហើយខ្ញុំបានបួស ១២ ឆ្នាំមកហើយ។ ខ្ញុំនៅតែស្រឡាញ់ព្រះធម៌ តែប្រហែលជាចូលវ័យចាស់បន្ដិចទើបបន្ដគិតរឿងសាងផ្នួសវិញ»។
ហាងសម្លៀកបំពាក់ Behighware របស់អន្ទិត កក្កដា សុភ័ណ្ឌ និងដៃគូអាជីវកម្ម មៀច ចាន់ដារ៉ា ស្ថិតនៅលើផ្លូវ ១៦៣ ក្រោយភោជនីយដ្ឋានទន្លេបាសាក់ ១៕