.jpg)
កុមារតូចៗមានឱកាសបានរៀនអាជីពការងារជាអ្នកបម្រើលើយន្ដហោះអំឡុងពេលហោះហើរ។ រូបថត AFP
ក្រុងតៃប៉ិ៖ ប្រឈមការក្ស័យទុនក្រោមឥទ្ធិពលវីរុសកូរ៉ូណា ក្រុមហ៊ុនអាកាសចរណ៍តៃវ៉ាន់ចាប់ផ្ដើមបង្កើតឈុតឆាក «ការហោះហើរអត់មានគោលដៅ» លើយន្ដហោះរបស់ខ្លួន រួមទាំងការបង្រៀនពីសំណាក់បុគ្គលិកទទួលភ្ញៀវនារីៗដល់កុមារ ថែមទៀតផង។
នៅទីស្នាក់ការកណ្ដាលនៃអាកាសចរណ៍ចិន China Airlines នៃក្រុងថាវយួន កាលពីថ្ងៃសៅរ៍ កុមារ ៥០ នាក់បានចូលរៀននាពេលព្រឹកអំពីវិធីបម្រើភ្ញៀវលើយន្ដហោះ។
លោក ឈិន យូវ៉ៃ ដែលធ្វើការក្នុងជំនួញហ្វាសសិន និងតែងតែធ្វើដំណើរក្រៅប្រទេស បានមកកាន់ទីនេះជាមួយនឹងភរិយា និងកូនស្រីអាយុ ៦ ឆ្នាំដើម្បី «រំឭកទៅដល់អារម្មណ៍ធ្វើដំណើរជាថ្មី»។
លោក ឈិន បានប្រាប់ AFP ថា៖ «ប្រហែលវាដោយសារយើងរង់ចាំឱកាសហោះហើរយូរពេកហើយ»។
កម្មវិធីបន្ទាប់ កុមារតូចៗចាប់ផ្ដើមហោះហើរនៅក្នុងឯកសណ្ឋានថ្មីរយៈពេល ២ ម៉ោងនៅលើដែនកោះ និងតាមជួរភ្នំខ្ពស់ៗ។ ការហោះហើរជាផ្នែកមួយនៃគំនិតច្នៃប្រឌិតរបស់ក្រុមហ៊ុនអាកាសចរណ៍ ដើម្បីស្វែងរកចំណូលខ្លះអំឡុងពេលជំនួញជួបការលំបាកនេះ។
មិនខុសពីអាកាសចរណ៍ដទៃក្នុងលោកទាំងក្រុមហ៊ុន China Airlines និងគូប្រជែង Eva Air ត្រូវផ្អាកការហោះហើរពេលកូវីដរាតត្បាតសកល។ ពួកគេក៏បានកំហិតជើងហោះហើរក្នុងស្រុកផងដែរ។
កាលពីថ្ងៃសៅរ៍ យន្ដហោះ Eva A330 ពីអាកាសយានដ្ឋានអន្ដរជាតិទីក្រុងថាវយួន បានហោះកាត់តំបន់ឦសាននៃដែនកោះក្រវែលប្រជុំកោះ Ryukyu Islands របស់ជប៉ុនមុនពេលវិលទៅកាន់មូលដ្ឋានទស្សនាទេសភាព និងឆ្នេរសមុទ្រវិញ។ ពេលវេលានៃការហោះហើរមាន ២ ម៉ោង និង ៤៥ នាទី។
កុមារសម្ដែងជាអ្នកបម្រើតាមយន្ដហោះផ្ដល់សេវាកម្មដល់ឪពុកម្ដាយ។ AFP
ការធ្វើដំណើរលើកៅអីធម្មតាមានតម្លៃប្រមាណ ១៨០ ដុល្លារ ខណៈកៅអីជំនួញមានតម្លៃ ២៨៨ ដុល្លារ។
China Airlines ចំណាយពេល ២ ម៉ោង និងហោះទៅកាន់អាកាសយានដ្ឋានជប៉ុនមុនពេលវិលមកកាន់ឆ្នេរភាគខាងកើតកោះតៃវ៉ាន់វិញ។
គម្រោងហោះហើរជាច្រើនទៀតនឹងត្រូវបានរៀបចំឡើងនៅប៉ុន្មានសប្ដាហ៍ខាងមុខ ហើយទាំង Eva និង China Airlines បានឲ្យដឹងថា ខ្លួនពិតជាលក់សំបុត្រដាច់។
អ្នកនិយមការធ្វើដំណើរក្នុងស្រុកត្រូវបានបញ្ចុះបញ្ចូលថា វាមិនសូវប្រឈមហានិភ័យឆ្លងរោគតិចតួច។
កោះតៃវ៉ាន់ ដែលបានទទួលបទពិសោធពីជំងឺ SAR ឆ្នាំ ២០០៣ មានសមត្ថភាពគ្រប់គ្រងការរីករាលដាលវីរុសបានយ៉ាងល្អ។
ដែនកោះនេះក៏បិទព្រំដែន ដោយទីតាំងភូមិសាស្ដ្រកោះនេះមានភាពងាយស្រួលក្នុងការគ្រប់គ្រង៕ AFP/HR
អ្នកបម្រើលើយន្ដហោះអាជីពបង្រៀនកុមារពីអាជីពការងាររបស់ខ្លួន។ AFP
