ភ្នំពេញៈ ប្លែកពីស្នាដៃនិពន្ធរឿងប្រលោមលោកបែបមនោសញ្ចេតនានារយៈចុងក្រោយនេះ អ្នកនិពន្ធរឿងប្រលោមលោកល្បី ម៉ីសន សុធារី កំពុងដាក់បង្ហាញស្នាដៃថ្មីបែបមន្តអាគមអូមអាមដ៏ព្រឺព្រួចរឿង «អាគមបរព្រៃ» ដែលនឹងដាក់លក់នៅក្នុងខែមេសាធ្វើឲ្យអ្នកគាំទ្រទន្ទឹងរង់ចាំអានវណ្ណកម្មថ្មីនេះយ៉ាងអន្ទះសា។
អ្នកនាង ម៉ីសន សុធារី កវីនិពន្ធរឿងប្រលោមលោកបានប្រាប់ភ្នំពេញ -ប៉ុស្តិ៍ ពីមូលហេតុដែលនិពន្ធរឿង «អាគមបរព្រៃ» នេះឡើងមកថា៖ «អ្នកនិពន្ធរមែងតែងចង់បានឲ្យអ្នកអានយល់ដឹងកាន់តែច្រើនអំពីចំណេះ និងបទពិសោធនានាដែលមានតម្លៃដល់ការសម្រេចចិត្ត។ អាគមបរព្រៃក្រោយអានចប់នឹងឲ្យកាន់តែជឿលើអំពីល្អ ការមិនបៀតបៀន កេងប្រវ័ញ្ចលើសម្ភារលាភសក្ការៈដែលពុំមែនជារបស់ខ្លួនពិត»។
អ្នកនិពន្ធប្រលោមលោកដែលធ្លាប់ធ្វើជាអ្នកសារព័ត៌មានទាំងទូរទស្សន៍ កាសែត វិទ្យុ ព្រឹត្តិបត្រ និងអនឡាញព្រមទាំងជាពិធីការិនីវិទ្យុ និងជានិពន្ធនាយកអស់រយៈពេល ២២ ឆ្នាំរូបនេះក៏បានចែកស្នាដៃនិពន្ធរបស់ខ្លួនជាប្រលោមលោក ៣ វណ្ណកម្មផ្សេងៗគ្នារឿងបែបមនោសញ្ចេតនា វណ្ណកម្មសុភាប្រុសជារឿងបែបស៊ើបអង្កេតជ្រៅៗ និងប្រភេទពេជ្របណ្ឌិតរន្ធត់ព្រឺព្រួចផងដែរ។
ចំពោះស្នាដៃនិពន្ធរបស់អ្នកនិពន្ធឆ្នើម ម៉ីសន សុធារី ដែលបានតាក់តែងនិពន្ធកន្លងមកមានប្រហែលជា ៥០ រឿងមកហើយ ដែលបានសម្រិតសម្រាំងរឿងដោយអត្ថរសថ្មីៗមានលក្ខណៈទំនើបកម្ម និងបញ្ចូលខ្លឹមសារគន្លឹះលើកតម្លៃគុណធម៌នៃការរស់នៅតម្កើងនីតិរដ្ឋ និងតម្លៃនៃជំនឿអំពើល្អមិនបៀតបៀន ព្រមលើកទឹកចិត្តអ្នកអានឲ្យទទួលយកភាពបត់បែននៃជីវិត ហើយត្រៀមលក្ខណៈក្នុងការឆ្លងកាត់។
អ្នកនិពន្ធដែលត្រូវបានការទទួលស្គាល់ថាមានស្នាដៃល្អក្នុងការតែងនិពន្ធរឿងប្រលោមលោកពីសង្គមអ្នកនាង ម៉ីសន សុធារី ក៏បានប្រាប់ពីគំនិតអប់រំក្នុងរឿងអាគមបរព្រៃដូច្នេះថា៖ «មានតំបន់មួយចំនួនក្នុងប្រទេសយើងប្រកាន់ត្រណមតឹងរ៉ឹងណាស់មុនពេលរំកឹលឈើសង់ផ្ទះ ឬរានចម្ការ។ អាគមបរព្រៃ ជារបៀនមួយយូរលង់ណាស់មកហើយ ថ្ងៃមួយខ្ញុំបានអង្គុយស្តាប់ចៃដន្យពីម្តាយក្មេកខ្ញុំអំពីរឿងជំនឿលើអាគមនេះ ខ្ញុំក៏ស្វែងយល់រកជជែកជជីកសួរចាស់ៗមួយចំនួនទៀត ហើយខ្ញុំសរសេរសៀវភៅនេះឡើង ដើម្បីការអប់រំចិត្តដល់អ្នកអានបំបាត់សេចក្តីលោភលន់ និងការបំពានលើធនធានធម្មជាតិ»។
សម្រាប់អ្នកនិពន្ធ ម៉ីសន សុធារី សុភមង្គលរបស់អ្នកនាងគឺជាការសរសេរបានល្អជាងមុន ដោយអ្នកនាងសង្កេតឃើញស្នាដៃខ្លួនពីមុនមានចំណុចខ្សោយច្រើន។ បំណងប្រាថ្នាក្នុងថ្ងៃអនាគតក្នុងអាជីពជាអ្នកនិពន្ធអ្នកនាង ម៉ីសន សុធារី ចង់ក្លាយជាអ្នកប្រឹក្សាដល់ផ្នែកសំខាន់ៗនៃភាពយន្ត និងទីផ្សារបោះពុម្ព។
អ្នកនាងបានឲ្យដឹងទៀតថា៖ «ខ្ញុំអាចធ្វើឲ្យការលក់សៀវភៅមានទាំងបរិមាណ និងគុណភាព តែខ្ញុំមិនដែលមានគម្រោងបង្កើតហាងលក់សៀវភៅឡើយ។ កម្មវិធីអានតាមទូរស័ព្ទជាគម្រោងដែលខ្ញុំចង់ធ្វើជាទីបំផុត ថ្ងៃណាមួយ ខ្ញុំនឹងអាចបង្កើតវាឡើងប្រកបដោយភាពងាយស្រួល និងមានផ្ទុកនូវសៀវភៅដែលមានគុណភាពមិនឲ្យអ្នកអានស្តាយលុយសូម្បីមួយសេន»៕