.jpg)
រូបភាពវីដេអូឃ្លីបដែលខ្លាឃ្មុំខ្មៅមិនបៀតបៀនមនុស្ស និងថតរូបសែលហ្វ៊ីទៀត។
ក្រុងម៉ិកស៊ីកូ៖ អាជ្ញាធរម៉ិកស៊ិកបាននិយាយថា ពួកគេបានបើកការស៊ើបអង្កេតចំពោះការគ្រាវខ្លាឃ្មុំខ្មៅ ១ ក្បាល ដែលមានភាពល្បីល្បាញបន្ទាប់ពីបានបង្ហាញខ្លួននៅក្នុងរូបភាពសែលហ្វ៊ី ដែលថតដោយអ្នកឡើងភ្នំចិត្តសឿង។
សត្វខ្លាឃ្មុំបានល្បីលើឆាកអន្ដរជាតិ នៅពេលស្ត្រីម្នាក់ថតសែលហ្វ៊ីពេលវានៅពីក្រោយឈរយ៉ាងប្រកៀកបំផុត នៅឯឧទ្យានអេកូឡូស៊ីមួយនៅភាគខាងជើងម៉ិកស៊ិក។
បន្ទាប់មក សត្វខ្លាឃ្មុំទម្ងន់ ៩៦ គីឡូក្រាមនេះ ដើរចេញយឺតៗ ដោយមិនធ្វើឲ្យនារីរូបនោះមានគ្រោះថ្នាក់អ្វីឡើយ។ វាក៏បានទៅរកស្ត្រីម្នាក់ទៀតនៅក្បែរនោះ តែមិនធ្វើបាបដូចគ្នា។
សត្វខ្លាឃ្មុំនេះត្រូវបានគេចាប់កាលពីសប្តាហ៍មុន ខណៈដេកនៅខាងក្រៅផ្ទះមួយ និងត្រូវបានបញ្ជូនទៅកាន់ពេទ្យសត្វនៅសាកលវិទ្យាល័យមួយឯភាគខាងជើងនៃរដ្ឋ Nuevo Leon ដើម្បីធ្វើការត្រួតពិនិត្យសុខភាព។
អាជ្ញាធរអភិរក្សសត្វព្រៃរបស់ Profepa បានឲ្យដឹងក្នុងសេចក្តីថ្លែងការណ៍កាលពីថ្ងៃអាទិត្យថា ពេលទៅដល់ទីនោះ មន្ទីរពិសោធន៍សត្វព្រៃនៅមហាវិទ្យាល័យបានសម្រេចគ្រាវខ្លាឃ្មុំខ្មៅនោះ ដោយសារតែឥរិយាបថខុសប្រក្រតីរបស់វា។ គេបាននិយាយថា ខ្លាឃ្មុំកំពុងតែរកស៊ីចំណីនៅក្នុងទីក្រុង។
ការគ្រាវសត្វនេះត្រូវបានអនុញ្ញាតដោយមន្រ្តីជាន់ខ្ពស់ Profepa ដែលយល់ថា វាចាំបាច់ដើម្បីកាត់បន្ថយហានិភ័យនៃការប្រយុទ្ធគ្នារបស់សត្វជាមួយសត្វខ្លាឃ្មុំដទៃទៀត និងដើម្បីចៀសវាងការបន្តពូជសត្វខុសគ្នា។
Profepa ដែលកំពុងត្រួតពិនិត្យការស៊ើបអង្កេតនោះ បានឲ្យដឹងកាលពីថ្ងៃអាទិត្យថា ខ្លួនបានស្នើសុំថតឯកសារ ដើម្បីបង្ហាញអំពីប្រតិបត្តិការវះកាត់នៅលើខ្លាឃ្មុំ ដែលក្រោយមកត្រូវបានដោះលែងនៅភាគខាងជើងម៉ិកស៊ិក៕ AFP/RS
