ភ្នំពេញៈ ថ្មីៗនេះមានការភ្ញាក់ផ្អើលពេញបណ្តាញសង្គមតែម្តងនឹងរឿងតារាសម្តែងស្រីសាច់សខ្ចី ចូលចិត្តបង្ហាញដើមទ្រូងសិចស៊ីកញ្ញាពេជ្រ អាវីហ្សា ខណៈនាងក្លាយជាអតិថិជនខ្មែរមុនគេបានទិញទូរស័ព្ទស្មាតហ្វូនស៊េរីថ្មី Iphone Xs Max តែសាមីខ្លួនបែរជាមិនសប្បាយចិត្តទៅវិញ។
គ្រាន់តែទិញទូរស័ព្ទស្មាតហ្វូនថ្មីហើយថតបង្ហោះស្វាគមន៍នឹងរបស់ជាទីស្រឡាញ់តាមបណ្តាញសង្គមភ្លាម ក៏មានគេចូលទៅ Like & Comment ឡើងព្រោងព្រាតតែម្តង ដោយមានទាំងអ្នកសរសើរ និងអ្នកបន្តុះបង្អាប់នាងថា រឿងអ្នកសម្ភារនិយមនោះវាមធ្យម ងំមានអ្នកចោទថា នាងមានអ្នកទិញឲ្យ។
លើសពីនេះក៏មានអ្នកថាឲ្យនាង ដោយរំឭករឿងចាស់ពេលនាងធ្លាប់មានរឿងបើករថយន្តប៉ះពារគេ ហើយគ្មានប្រាក់សងគេនោះថា៖ «អីយ៉ា!ពេលមុនក្រែងថា អត់ប្រាក់សងគេរឿងប៉ះពារឡានសោះនោះ ពេលនេះគ្រាន់តែទូរស័ព្ទស៊េរីថ្មី Iphone Xs ចេញភ្លាមជះលុយទិញភ្លែតហ្មង បានលុយពីណាមកហ្នឹង?» ចំណែកអ្នកខ្លះឌឺដងថា៖ «អាវីហ្សា ទិញទូរស័ព្ទថ្មី Iphone Xs មុនគេ ដើម្បីបន្សាបកំហឹងដែលក្រសួងវប្បធម៌ហៅទៅណែនាំរឿងថតសិចស៊ីមែន?»។
តារាស្រីល្បីក្នុងពិភពថតសម្តែងជា MV ឲ្យផលិតកម្មចម្រៀងមួយសឹងតែមិនដែលបាត់មុខនាងគឺផលិតកម្ម ហង្សមាស កញ្ញា ពេជ្រ អាវីហ្សា បង្ហើបប្រាប់ភ្នំពេញ ប៉ុស្តិ៍ទាំងដែលខ្លួននៅពុំទាន់អស់ចិត្តនឹងដំណឹងចែកផ្សាយព្រោងព្រាតរឿងខ្លួនគ្រាន់តែទិញទូរស័ព្ទថា៖ «នាងខ្ញុំពិតជាមិនយល់ទាល់តែសោះចំពោះអ្នកដែលចូលចិត្តទើសរឿងផ្ទាល់ខ្លួនរបស់គេណាស់!គ្រាន់តែនាងខ្ញុំស្រឡាញ់របស់ប្រើប្រាស់ ហើយបានកក់ទិញមុនគេសោះ ខុសដែរឬ?»។
តែទោះបីជាយ៉ាងណា កញ្ញា ពេជ្រ អាវីហ្សា តារាស្រីទើបត្រូវក្រសួងវប្បធម៌ និងវិចិត្រសិល្បៈ បានហៅទៅណែនាំរឿងការសម្តែងសិចស៊ី ក្រោយពីឮដំណឹងជាប់ឈ្មោះក្នុងបញ្ជីខ្មៅជាមួយនឹងតារាប្រុសស្រីផ្សេងៗទៀតបន្តថា៖ «ទោះជាយ៉ាងណា ខ្ញុំក៏មិនហ៊ានថា អីដល់ក្រុមដែលចូលចិត្តទើសទាំងនោះដែរ គ្រាន់តែចង់សំណូមពរខ្លះៗថា សុំមេត្តាកុំចូលចិត្តវាយតម្លៃមកលើមនុស្ស ដោយមិនបានដឹងរឿងច្បាស់លាស់នោះអី ហើយសូមមេត្តាផ្តល់តម្លៃដល់អ្នកសិល្បៈផង!»។
តារាសម្តែងស្រីឆ្លងផុតនូវព្យុះរលកជីវិតអតីតគូស្នេហ៍ជាគូកម្មដែលជាសាច់ញាតិឧកញ៉ាល្បីឈ្មោះវាយយ៉ាងដំណំខណៈសម្រស់បានវិលមករកសភាពធម្មតាវិញ ក៏ព្រលយរឿងរអាចិត្តខ្លួនចង់ដូររថយន្ត និងចង់ទិញផ្ទះដែរថា៖ «គ្រាន់តែខ្ញុំទិញទូរស័ព្ទ ថ្មី Iphone Xs តម្លៃ ១៧០០ ដុល្លារ សោះក៏មានគេទើសប៉ុណ្ណឹងទៅហើយ ចុះបើនាងខ្ញុំចង់ដូរឡាន ឬទិញផ្ទះ ហើយថតរូបបង្ហោះនោះ មិនដឹងជាមានគេថាឲ្យខ្ញុំយ៉ាងម៉េចទេ?»៕