.jpg)
តារាចម្រៀងអូរីជីណល កំពុងតែឡើងកូដខ្លាំងជ្រកទ្រនំរបស់ក្រុមហ៊ុនទូរស័ព្ទស្មាត អ្នកនាង អេដា។ លោក អេលែន តាន់ ជាគូស្នេហ៍របស់តារាចម្រៀងអូរីជីណល អ្នកនាង អេដា។ រូបថត ហ្វេសប៊ុក ហុង មិនា
ភ្នំពេញៈ ថ្មីៗនេះបង្កការចាប់អារម្មណ៍យ៉ាងខ្លាំងពីសំណាក់មហាជន ខណៈឃើញគូស្នេហ៍អ្នកសិល្បៈ ២ គូដែលយល់ចិត្តយល់ថ្លើមគ្នាកំពុងតែរុញដាក់គ្នាទៅវិញទៅមកចំពោះវេលាកំណត់ថ្ងៃចូលរោងជ័យ ក្រោយពីបានទៅចូលរួមមង្គលការតារាចម្រៀងស្រីកំពូលហង្សមាសអ្នកនាង ឱក សុគន្ធកញ្ញា កាលពីសប្តាហ៍មុនមកនោះ។
២ គូ ជាអ្នកសិល្បៈដែលប្រើពាក្យសម្តីបែបឌឺដងដាក់គ្នារឿងបង្ហាញចេតនារកវេលារៀបការដែរនោះគឺគូស្នេហ៍អ្នកនាង អេដា និងលោក អេលែន តាន់ និងគូស្នេហ៍តារាចម្រៀងទាំង ២ លោក ងួន ចាន់ដេវីត និងកញ្ញា ទេព បូព្រឹក្ស។
គេឃើញអ្នកនាង អេដា បន្លឺសារថា៖ « ថ្ងៃនេះការគេហើយថ្ងៃណាបានការខ្ញុំ? ជូនពរគូស្វាមីភរិយាថ្មីឲ្យស្រឡាញ់គ្នាដល់ចាស់ ខាំចេករបូត ខាំពោតរបេះ ហើយចុះគូណាបន្ទាប់ទៅ?»។ នៅក្រោយមកឃើញមានសារជំរុញពីលោក ងួន ចាន់ដេវីត តបថា៖ « ចែ!អញ្ជើញមុនចុះ!»។
ក្រោយពីបានប្រកាសមុខមាត់ពិតគូស្នេហ៍ថ្មីបុរសកូនកាត់ ៣ សាសន៍ឈ្មោះ អេលែន តាន់ និងបានស្គាល់ចិត្តថ្លើមគ្នាច្រើនឆ្នាំមកនោះ តារាចម្រៀងស្រីអូរីជីណលកំពុងតែមានរាសីឡើងអ្នកនាង អេដា ល្បីថាក៏គ្រោងដឹកដៃម្ចាស់បេះដូងទី ២ ចូលរោងជ័យដែរ តែចាំដល់ឆ្នាំ ២០២១ ឯណោះ។
អ្នកនាង អេដា ដែលទទួលបានភាពជោគជ័យទាំងការងារសិល្បៈ ការប្រកបអាជីវកម្មក្រៅសិល្បៈ និងរឿងស្នេហានោះបានបង្ហើបប្រាប់ពីមូលហេតុថា៖ «តាមពិតទៅ!ចំពោះរឿងសម្ព័ន្ធភាពពួកយើងគឺត្រូវគ្នាល្អណាស់ ដោយមិនចាំបាច់ត្រូវការពេលមើលចិត្តថ្លើមគ្នាបន្តទេ។ ដោយសារភាពចាំបាច់ខ្លះត្រូវរង់ចាំសិនដែរ គឺម្យ៉ាងមកពីពួកយើងសុទ្ធតែជាប់រវល់ការងារខ្លាំងដូចគ្នា និងមួយទៀតខ្ញុំ ត្រូវការពេលរកប្រាក់ដើម្បីបង្ហើយការសង់ផ្ទះខ្ញុំសិនដែរ។ ដូច្នេះក៏ត្រូវទុកពេលរឿងរៀបការនោះយ៉ាងឆាប់បំផុតគឺឆ្នាំ ២០២១»។
តារាចម្រៀងស្រី ឈ្មោះពិត ក្រូច ចរិយា ហៅ អេដា បានវិលត្រឡប់មកកាន់វិស័យសិល្បៈចម្រៀងវិញ បន្ទាប់ពីបាត់មុខមួយរយៈ និងបាននាំបទចម្រៀងប្រភេទអូរីជីណលថ្មីៗមួយចំនួនដែលស្រូបអ្នកគាំទ្រយ៉ាងច្រើនរួមមានដូចជាបទ «នៅទីនេះមានមនុស្សខូចចិត្ត» បទ «ភ្លើង» និងបទ «ពីរនាក់បានហើយ» និងបទចម្រៀងចុងក្រោយគឺបទ «មានអ្នកថែឬនៅ?» ក្រោយពីបែកគ្នាពីស្វាមី។
ចាប់តាំងពីថ្ងៃទី ១១ ខែវិច្ឆិកា ឆ្នាំ ២០១៧ ជាពេលរៀបចំធ្វើពិធីខួបកំណើតវ័យ ២៧ ឆ្នាំ និងសម្ពោធនូវអាល់ប៊ុមនៃបទចម្រៀងជាស្នាដៃតែងនិពន្ធខ្លួនឯង ដែលចូលរួមលើកទឹកចិត្តពីតារាសិល្បៈល្បីយ៉ាងច្រើនកុះករនោះ នាងក៏ឆ្លៀតប្រកាសនូវមុខមាត់ពិតគូស្នេហ៍ថ្មីខ្លួនគឺលោក អេលែន តាន់ ផងដែរ៕
