.jpg)
សកម្មភាពបង្រៀនរបស់អ្នកគ្រូក្នុងសហគមន៍ក្រីក្រដើម្បីបើកឱកាសដល់កុមារខ្វះលទ្ធភាពបានចូលរៀនដូចកុមារដទៃ។ រូបថត សហការី
ភ្នំពេញៈ ក្រោយបញ្ចប់កិច្ចការលើរងដំណាំដំឡូង យុវជនស្រុកកូនមុំម្នាក់ បានរៀបចំសៀវភៅតាមលំដាប់ប្រភេទនីមួយៗរួចបញ្ឆេះម៉ូតូរ៉ឺម៉កបរចូលជ្រកម្លប់ក្នុងទីប្រជុំជន ដើម្បីរង់ចាំអ្នកចូលចិត្ដអានសៀវភៅដែលកំពុងទន្ទឹងរង់ចាំវត្ដមានបណ្ណាល័យចល័ត។ ម៉ោង ៣ រសៀលថ្ងៃព្រហស្បតិ៍ បណ្ណាល័យលើរ៉ឺម៉កលោកតាប៉ងនុយទទួលអតិថិជនអ្នកនិយមអានសៀវភៅជាសិស្សសាលាតូចធំ និងអ្នកភូមិជិត ២០ នាក់អង្គុយតម្រៀបគ្នាដៃកាន់សៀវភៅតាមចំណូលចិត្ដរៀងៗខ្លួន។
បម្រើការងារជាអ្នកដឹកបណ្ណាល័យចល័តជិត ១ ឆ្នាំលោក នុយ អាយុ ២៣ ឆ្នាំបានចល័តរ៉ឺម៉ក ១ ថ្ងៃ ១ ភូមិក្នុងឃុំតាអង ស្រុកកូនមុំ ខេត្ដរតនគិរីជាមួយសៀវភៅជាង ៩០០ ក្បាល។
យុវជនដែលស្រឡាញ់ការងារជាអ្នកដឹកជញ្ជូនចំណេះវិជ្ជាដល់មូលដ្ឋានរូបនេះបាននិយាយថា៖ «ក្មេងៗរៀនថ្នាក់ទី ៣ ឡើងគេអាន ហើយក្មេងតូចគេអត់ចេះអានទេ។ គេមកលេងដាក់រូបភាព»។
បណ្ណាល័យចល័តជាកម្មវិធីមួយផ្នែកពីគម្រោងពង្រឹង និងពង្រីកគុណភាពការអប់រំរបស់អង្គការ អេដ អេអាក់ស្យុងកម្ពុជា (AEA) ដែលចាប់ដៃគូជាមួយក្រសួងអប់រំ និងស្ថាប័នពាក់ព័ន្ធជាច្រើនដើម្បីផ្ដល់លទ្ធភាពដល់កុមារខ្វះលទ្ធភាពទទួលបានការអប់រំដូចកុមារដទៃ។
អេដ អេ អាក់ស្យុង ជាអង្គការមានទីស្នាក់ការកណ្ដាលនៅអឺរ៉ុបក្នុងបេសកកម្មលើវិស័យអប់រំនៅតាមបណ្ដាប្រទេសជាច្រើនទាំងអាស៊ី អឺរ៉ុប អាហ្វ្រិក និងអាមេរិកឡាទីន។
លោក វ៉ន សំភាស់ នាយកកម្មវិធីប្រចាំប្រទេស។ រូបថត Yousos Apdoulrashim
លោក វន សំភាស់ នាយកកម្មវិធីប្រចាំប្រទេសនៃអង្គការអេដអេ អាក់ស្យុងកម្ពុជា (AEA) ប្រាប់ថា៖ «នៅកម្ពុជា អង្គការត្រូវបានបើកសម្ពោធក្នុងឆ្នាំ ២០០២ ដែលផ្ដោតលើការពង្រឹង និងពង្រីកគុណភាពនៃការអប់រំ ទាំងការរៀន និងការបង្រៀនចំណោមសហគមន៍ក្រីក្រ ដើម្បីជួយដល់កុមារក្រៅសាលា ដែលជួបការលំបាក»។
លោកបន្ដថាកុមារក្រៅសាលារួមមាន កុមារពិការទាំងអវយវៈ និងសតិបញ្ញា កុមារជនជាតិភាគតិច កុមារក្រីក្ររស់នៅតាមចិញ្ចើមថ្នល់ដោយមានកិច្ចសហការជាមួយនឹងភាគីពាក់ព័ន្ធដូចជា ក្រសួងអប់រំ និងអាជ្ញាធរគ្រប់លំដាប់ថ្នាក់ដើម្បីកសាងសាលា កែលម្អថ្នាក់រៀនផ្ដល់អាហារូបករណ៍ ផលិតសម្ភារបង្រៀន និងរៀនបណ្ដុះបណ្ដាលដល់ក្រុមប្រឹក្សាស្រុក ឃុំ និងគណៈកម្មការទ្រទ្រង់សាលា។
នៅក្នុងបន្ទប់រៀនមួយដែលបញ្ចូលសិស្សពីរថ្នាក់រួមគ្នាគឺថ្នាក់ទី ៣ និង ទី ៤ នៃសាលាបឋមសិក្សាទុសភូមិទុស ឃុំតាអង ស្រុកកូនមុំ ខេត្ដរតនគិរី អ្នកគ្រូ ញឹម ចាន់តឿង និយាយថាសាលារៀនដែលមាន ២ បន្ទប់ ១ បន្ទប់មាន ២ ថ្នាក់មានសិស្សសរុប ៧១ នាក់ ហើយពាក់កណ្ដាលនៃចំនួននេះជាសិស្សក្រីក្រ។
អ្នកស្រី ចាន់តឿង បង្រៀនតាំងពីឆ្នាំ ២០០៩ បានឲ្យដឹងថា៖ «ពួកគេជាច្រើនអត់មានកាតាប និងសម្លៀកបំពាក់ជាសិស្សសមរម្យនោះទេ។ ក្រៅពីការសិក្សាពួកគាត់ចេញទៅជួយកិច្ចការគាស់ដំឡូង និងខ្វេះគ្រាប់ស្វាយចន្ទី»។
កុមារក្នុងសហគមន៍ក្រីក្រត្រូវបានលើកទឹកចិត្ដឲ្យចូលរួមកម្មវិធីអប់រំ។ រូបថត សហការី
ក្រោមកិច្ចសហការរវាងអង្គការ AEA ជាមួយក្រសួងអប់រំ និងស្ថាប័ន ២៣ ទៀតគម្រោងជួយកុមារក្រៅសាលាបង្កើតឡើង ៣ ឆ្នាំចុងក្រោយដែលមកទល់ពេលនេះប្រតិបត្ដិការជាង ១៣០០ សាលារៀនចំណោមជាង ៧ ពាន់សាលាទូទាំងប្រទេសដោយជួយលើកុមារខ្វះលទ្ធភាពចំនួនជាង ៦ ម៉ឺននាក់ បានផ្ដោតលើការបណ្ដុះបណ្ដាល ពង្រឹងសមត្ថភាពអ្នកពាក់ព័ន្ធទាំងអស់នៅសហគមន៍ និងសាលារៀនដើម្បីស្វែងរកកុមារអត់បានចូលរៀនដែលបោះបង់ ឬត្រូវបានគេផាត់ចេញពីឱកាសការសិក្សា។
លោក សំភាស់ ឲ្យដឹងថា៖ «យើងសហការជាមួយសហគមន៍ និងឪពុកម្ដាយ ដើម្បីឲ្យកូនពួកគាត់បានចូលរៀនយ៉ាងតិចក៏ចប់ត្រឹមបឋមសិក្សា។ ស្វែងរកតម្រូវការលោកគ្រូ អ្នកគ្រូ ក្នុងការពង្រឹង និងពង្រីកសមត្ថភាពពួកគាត់បំពាក់សម្ភារបង្រៀនផ្ដល់ប្រាក់ឧបត្ថម្ភដល់គ្រូកិច្ចសន្យា ឬគ្រូស្ម័គ្រចិត្ដសហគមន៍ដើម្បីឲ្យសហគមន៍ក្រីក្រទាំងអស់មានសាលារៀន»។
ចំពោះការផ្ដោតលើគុណភាពការរៀន និងការបង្រៀន អង្គការបានអនុវត្ដនៅក្នុង ៨ ខេត្ដដែលដាក់ឲ្យដំណើរការបណ្ណាល័យមានសៀវភៅអម្បូរបែប ទូរទស្សន៍ចេះអានសៀវភៅឲ្យកុមារស្ដាប់ បណ្ណាល័យចល័តដោយការកែលម្អរ៉ឺម៉ឺកធ្វើការចល័តក្នុង ១ សប្ដាហ៍ ១៤ ភូមិ សម្រាប់ឲ្យកុមារ យុវជន និងឪពុកម្ដាយក្នុងសហគមន៍មកអាន និងអាចខ្ចីសៀវភៅទៅផ្ទះព្រមទាំងកម្មវិធីលើទូរស័ព្ទ Mobile App ផងដែរ។
អេដ អេ អាក់ស្យុង ជួយទាំងកុមារក្រីក្រ និងផ្ដល់សម្ភារសិក្សាដល់សាលា។ រូបថត សហការី
លោក សំភាស់ ថា៖ «គោលគំនិតរបស់យើងចង់ឲ្យឃើញថាអំណានមានសារៈសំខាន់ ហើយការអានមានគ្រប់ទីកន្លែងទាំងក្នុងសាលា បណ្ណាល័យ សហគមន៍ ភូមិ ឃុំ ទូរទស្សន៍ ថេប្ល៊ិត និងទូរស័ព្ទដៃផងដែរ»។
អង្គការប្រតិបត្ដិលើវិស័យអប់រំមួយនេះបន្ដសហការជាមួយក្រុមប្រឹក្សាខេត្ដ ស្រុក ឃុំ និងសាងសង់សាលាមត្តេយ្យសហគមន៍ មតេ្តយ្យរដ្ឋ ដើម្បីកសាងមូលដ្ឋានមួយដែលកុមារតូចៗពីអាយុ ៣ ទៅ ៦ ឆ្នាំទទួលបានឱកាស និងភាពស៊ាំងជាមួយការងារអប់រំឲ្យចេះស្រឡាញ់សាលា លោកគ្រូអ្នកគ្រូ ស្រឡាញ់សៀវភៅក៏ដូចជា បង្កើតទម្លាប់ស្រឡាញ់ការរៀនតាំងពីកុមារភាព។
លោកបញ្ជាក់ថា៖ «យើងរំពឹងថាទោះពួកគាត់ជួបការលំបាកក៏ពួកគាត់ពុះពារបន្ដសិក្សាបញ្ចប់ការសិក្សាឲ្យក្លាយជាធនធាន។ ដូច្នេះយើងនៅតែបន្ដពង្រីកកម្មវិធីទាំងមតេ្តយ្យ បឋម និងកសាងភាពជាដៃគូបន្ថែមដើម្បីជួយគ្នាអភិវឌ្ឍធនធានមនុស្ស»៕
វីដេអូ៖
