.jpg)
កញ្ញា អេនជី និងអនាគតស្វាមី ត្រូវរៀបការថ្ងៃទី ២៧ ខែ មេសា ។ ហ្វេសប៊ុក
ភ្នំពេញៈ ទីបំផុតតារាចម្រៀងសាន់ដេ កញ្ញា អេនជី ដែលមានឈ្មោះពិតថា គង់ សុកញ្ញា ដែលបានបាត់មុខពីផលិតកម្មមួយរយៈនោះ នឹងបញ្ចប់ភាពនៅលីវ នៅត្រឹមថ្ងៃទី ២៧ មេសា ឆ្នាំ ២០១៨ ខាងមុខ ដោយបានសម្រេចចិត្តដឹកដៃគូស្នេហ៍យល់ចិត្តគ្នាជាង ៥ ឆ្នាំ ចូលក្រាបផ្ទឹមរោងជ័យ ដើម្បីបំពេញមុខមាត់មេបាទាំងសងខាង តាមប្រពៃណីខ្មែរ និងត្រៀមទទួលភ្ញៀវមានចំនួនជាង ៧០ តុ នៅសណ្ឋាគារសុខាភ្នំពេញ។
តារាចម្រៀងស្រីដែលបច្ចុប្បន្នមានវ័យជាង ២០ ឆ្នាំ ខណៈប្រិយមិត្តគាំទ្រខានបានឃើញមុខរបស់នាងនៅតាមឆាកតន្ត្រីប៉ុស្តិ៍ទូរទស្សន៍នានា និងកម្មវិធីផ្សេងៗ របស់ផលិតកម្មសាន់ដេ កញ្ញា គង់ សុកញ្ញា ហៅកញ្ញា អេនជី នឹងចូលរោងជ័យជាមួយកូនកំលោះមានឈ្មោះថា លោក គង់ សុខឡេង ដែលគេស្គាល់ថា ជាពាណិជ្ជករទ្រព្យស្តុកម្នាក់នៅកម្ពុជា នៅថ្ងៃទី ២៧ ខែ មេសា ឆ្នាំ ២០១៨ នេះហើយ ក្រោយពីពួកគេ បានសាងស្នេហ៍ និងបានសិក្សាស្វែងយល់ចិត្តគ្នាបានរយៈពេលប្រមាណជាង ៥ ឆ្នាំមកនោះ។ ទោះជាយ៉ាងណា គេក៏មិនអាចដឹងបានឡើយថា តារាចម្រៀងស្រីមានរាងតូចច្រឡឹង ស្រស់សោភារូបនេះ បានទទួលថ្លៃបណ្ណាការ ឬថ្លៃទឹកដោះពីខាងអនាគតស្វាមី ចំនួនទឹកប្រាក់ប៉ុន្មានម៉ឺន ឬលាន ដុល្លារ នោះឡើយ ខណៈគេគ្រាន់តែបានជ្រាបថា នឹងរៀបចំទទួលភ្ញៀវកិត្តិយសមានទាំងមិត្តភក្តិ និងទាំងមិត្តជាអ្នកសិល្បៈមានចំនួនសរុបគឺជាង ៧០ តុ ហើយរៀបចំទទួលភ្ញៀវនៅឯសណ្ឋាគារសុខាភ្នំពេញលំដាប់ផ្កាយ។
កញ្ញា អេនជី បញ្ជាក់ថា៖ «ខ្ញុំសុំទោសផង ដែលពួកយើងបានសម្រេចចិត្តថា នឹងមិនបង្ហើបរឿងថ្លៃបណ្ណាការនោះឡើយ សម្រាប់ការរៀបចំពិធីមង្គលការរបស់យើងនាពេលប៉ុន្មានថ្ងៃខាងមុខនេះ។ ដោយឡែកការអញ្ជើញភ្ញៀវចូលរួមវិញនោះគឺមានគម្រោងជាង ៧០ តុ រៀបចំទទួលនៅឯសណ្ឋាគារសុខាភ្នំពេញ ដែលជាការអញ្ជើញដោយរាប់ទាំងមិត្តអ្នកសិល្បៈផងដែរ»។
ក្រៅពីនេះ តារាចម្រៀងស្រីនៅសាន់ដេ ដែលហាក់ដូចជាបានរយាលពេលយូរគ្រាន់បើ និងខានចេញបទចម្រៀងមកបំពេអារម្មណ៍ប្រិយមិត្តគាំទ្រយូរ កញ្ញា អេនជី ក៏បង្ហើបឲ្យដឹងពីការបាត់មុខកន្លងមក និងរឿងការងារអាជីពសិល្បៈ នាពេលអនាគត ក្រោយពីបានចូលរោងការផងដែរថា៖ «ចំពោះការងារសិល្បៈចម្រៀងនេះ នាងខ្ញុំនឹងមិនបោះបង់ចោលទាំងស្រុងឡើយ តែគ្រាន់តែបន្ថយពេលច្រើនជាងមុន ដោយសារតែនឹងត្រូវចំណាយពេលទៅមើលការងាររកស៊ីផ្ទាល់ខ្លួន ដែលស្វាមីបានប្រគល់ឲ្យ ហើយកាលដែលនាងខ្ញុំ បាត់មុខនាពេលប្រមាណជិត ២ ឆ្នាំ ចុងក្រោយនេះ ក៏ព្រោះតែរឿងគិតគូររឿងរៀបការ និងរកស៊ីនេះផងដែរ ទើបបានជាមិនសូវមានពេលទៅប្រឡួកនៅក្នុងវិស័យសិល្បៈ។ ដូច្នេះចំពោះរឿងការងារសិល្បៈចម្រៀងនៅផលិតកម្មសាន់ដេ នាងខ្ញុំ នឹងអាចមានពេលប្រមាណជា ២០ ភាគរយ ខណៈថ្មីៗនេះ ខាងផលិតកម្មក៏បានទាក់ទងសួរនាំ មកនាងខ្ញុំផងដែរពីពេលវេលាសម្រាប់ការថតបទចម្រៀង»៕
