.jpg)
តារាចម្រៀងស្រី អេនជី និងស្វាមី ទទួលបានបុត្រដំបូងនៃចំណងស្នេហ៍ ២ ឆ្នាំ។ រូបថត ហ្វេសប៊ុក
ភ្នំពេញ៖ ទីបំផុតដើមឆ្នាំ ២០២០ នេះ អតីតតារាចម្រៀងស្រី ដែលធ្លាប់មានប្រជាប្រិយភាពលើវិថីសិល្បៈជ្រកទ្រនំសាន់ដេ មានឈ្មោះពិត អ្នកនាង គង់ សុកញ្ញា ហៅ អេនជី និងស្វាមី បានសម្រេចក្តីប្រាថ្នាធំ ដើម្បីរឹតបន្តឹងចំណងស្នេហ៍ ក្រោយពីរៀបការជិត ២ ឆ្នាំមកនោះ។
អតីតតារាចម្រៀងអ្នកនាង អេន ជី សម្រេចចូលរោងការនឹងស្វាមី គឺលោក គង់ សុខអេង ដែលត្រូវបានគេដឹងថា ជាប្អូនប្រុសបង្កើតម្ចាស់ហាងលក់សម្លៀកបំពាក់ឈ្មោះ «រ៉ាយុទ្ធ» កាលពីថ្ងៃទី ២៨ ខែ មេសា ឆ្នាំ ២០១៨ យ៉ាងអធិកអធមនៅសណ្ឋាគារសុខាភ្នំពេញ មានរយៈពេលជិត ២ ឆ្នាំ អ្នកទាំង ២ ក៏បានរួមគ្នាកសាងគ្រួសារពោរពេញដោយសុភមង្គល និងកំពុងតែត្រៀមទទួលសមាជិកថ្មីម្នាក់ទៀតផងដែរ។
ចេញពីហ្វេសប៊ុករបស់អតីតតារាចម្រៀងនៅផលិតកម្មសាន់ដេ អ្នកនាង អេនជី បង្ហោះសាររៀបរាប់ស្តែងពីអារម្មណ៍សប្បាយចិត្តថា៖ «ស្វាគមន៍សមាជិកថ្មី កាដូធំសម្រាប់ប្ដីឆ្នាំថ្មី ២០២០ Ly En ចេះតែឈឺនេះ ឈឺនោះ មិនដឹងមុខ ពេលនេះ រកឃើញហើយ តាមការពិតកូន Mommy ធ្វើទុក្ខសោះសូមឲ្យឆ្នាំថ្មី ជីវិតគ្រួសារ ខ្ញុំជួបតែសេចក្ដីសុខ រកស៊ីមានបាន ជួបតែមនុស្សល្អ»។
គេមិនទាន់ដឹងនៅឡើយនោះទេថា កូនដំបូងរបស់ អេនជី និងស្វាមី ជាកូនប្រុស ឬកូនស្រីនៅឡើយនោះទេ ព្រោះថាអ្នកទាំង ២ កំពុងតែរង់ចាំមើលលទ្ធផលកូនដំបូងនេះដូចគ្នាដែរ ហើយក៏មិនបានដឹងថា បុត្រក្នុងផ្ទៃមានរយៈពេលប៉ុន្មានសប្តាហ៍ ឬខែនោះដែរ ដោយសារខាងភ្នំពេញប៉ុស្តិ៍ ក៏មិនអាចទំនាក់ទំនងអ្នកនាងតាមទូរស័ព្ទបានដែរ។
យ៉ាងណាដំណឹងមានបុត្រដំបូងរបស់អតីតជាតារាចម្រៀងស្រីនៅទ្រនំសាន់ដេអ្នកនាង អេនជី និងស្វាមី នេះក៏មានការចូលរួមអបអរសាទរ យ៉ាងច្រើនដែរពីសំណាក់មិត្តរួមអាជីព ក៏ដូចជាអ្នកគាំទ្រដោយអ្នកទាំង ២ បានសម្រេចបំណងប្រាថ្នាដ៏ធំ ក្នុងជីវិតអាពាហ៍ពិពាហ៍ជិត ២ ឆ្នាំ និងដើម្បីបន្ថែមការរឹតបន្តឹងចំណងស្នេហ៍ពួកគេ។ ជាការកត់សម្គាល់ក្រៅពីមានជីវភាពហ៊ឺហាជាងមុន ហើយអ្នកនាង អេនជី ត្រូវបានគេចាត់ទុកជានារីសំណាងណាស់ ដែលបានស្វាមីចេះផ្ដល់សុភមង្គល ថ្នាក់ថ្នម និងយល់ចិត្តហើយបានទិញកាដូ គឺសុទ្ធតែជារបស់របរដែលថ្លៃៗជូនប្រពន្ធជានិច្ចក្នុងឱកាសពិសេស។
ជាក់ស្ដែងនោះ នាពេលឆាប់ៗនេះ ជាពិធីបុណ្យសែនចូលឆ្នាំចិននៅឆ្នាំ ២០២០ កន្លងមកនេះ ស្វាមីរបស់តារាស្រីរូបនេះ បានកាដូអាំងប៉ាវដ៏មានតម្លៃ គឺជានាឡិកាដៃមានពណ៌ក្រហមដាំពេជ្រភ្លឺចែងចាំងមានតម្លៃទៅដល់ ៧ ២០០ ដុល្លារឯណោះ៕
