.jpg)
ក្រុងឡុងប៊ិក : ស្ងាត់ៗ កំពូលតារាហូលីវូដ អ្នកនាង អេនជើលីណា ជោលី មកពញ្ញាក់អារម្មណ៍ដោយបានចូលរួមមហោស្រពភាពយន្ដក្រុងកម្ពុជា (Cambodia Town Film Festiva)l កាលពីថ្ងៃសៅរ៍ ចុងសប្ដាហ៍ ដើម្បីជួយផ្សព្វផ្សាយព្រឹត្ដិការណ៍ ដែលក្រុមអ្នករៀបចំបានចំណាយពេលជាច្រើនឆ្នាំជំរុញប្រជាប្រិយភាពចំពោះប្រជាជនខ្មែរ និងខ្មែរអាមេរិកាំង។
លោក ប្រាជ្ញ លី សហស្ថាបនិក និងសហប្រធានព្រឹត្ដិការណ៍មហោស្រព ត្រូវបាន Long Beach Post ដកស្រង់សម្ដីយ៉ាងដូច្នេះថា៖ «វាមានអត្ថន័យមហាធំធែងចំពោះយើង ដែលតារាហូលីវូដល្បីរូបនេះ មកចូលរួម និងថ្លែងសន្ទរកថានៅទីនេះ»។
កាលពីឆ្នាំមុន ភាពយន្ដរឿង «មុនដំបូង គេសម្លាប់លោកប៉ាខ្ញុំ» ដែល អ្នកនាង ជោលី ដឹកនាំរឿង និងបានបញ្ចាំងនៅមហោស្រពនេះ។ នាងក៏បានបង្ហាញមុខកាលពីឆ្នាំមុនដើម្បីផ្សព្វផ្សាយភាពយន្ដនោះ។
លោក លី បន្ដប្រាប់ Long Beach Post ថា ឆ្នាំនេះ អ្នកនាង ជោលី ត្រឡប់មកទីនេះម្ដងទៀតដើម្បីជួយផ្សព្វផ្សាយព្រឹត្ដិការណ៍នេះទៀត។ វាជាការពញ្ញាក់អារម្មណ៍មហាជន ដែលបាននិយាយថា មានតែសមាជិករៀបចំព្រឹត្ដិការណ៍មហាស្រពដែលបានដឹងថា ជោលី មកកាន់ទីនេះ។
លោក បានបន្ថែមថា ជោលី ក៏ត្រូវបានតែងតាំងជាអ្នកតំណាងព្រឹត្ដិការណ៍មហោស្រពភាពយន្ដក្រុងកម្ពុជាជាថ្មីផងដែរ។
អំឡុងពេលថ្លែងសន្ទរកថាខ្លី ជោលី បានគ្រងឈុតសម្លៀកបំពាក់ប្រពៃណីខ្មែរក្នុងទីក្រុងឡុងប៊ិក ដោយសម្អាងការ Khmer Bridal លើហាយវ៉េ ឆ្នេរប៉ាស៊ីហ្វិក។
ជោលី ថតអនុស្សាវរីយ៍ជាមួយខ្មែរនៅក្រុងឡុងប៊ិក។ រូបថត Facebook/Cambodia Town Film Festival
អ្នកនាង ជោលី មានទំនាក់ទំនងយ៉ាងស្អិតរមួតជាមួយកម្ពុជា ខណៈកូនប្រុស ម៉ាកដុក ប្រសូតក្នុងប្រទេសនៅអាស៊ីអាគ្នេយ៍មួយនេះ។ ប្រវត្ដិម្ចាស់ពានអូស្កា អាយុ ៤៣ ឆ្នាំរូបនេះ ជាមួយប្រទេសកម្ពុជា ចាប់ផ្ដើមតាំងពីឆ្នាំ២០០០ ពេលនាងបានថតភាពយន្ដល្បី Tomb Raider នៅប្រាង្គប្រាសាទបុរាណ។
នាងបានវិលទៅកាន់ទីនោះម្ដងទៀតនៅរយៈពេល ២ ឆ្នាំក្រោយ ដើម្បីសុំ ម៉ាកដុក មកចិញ្ចឹម ដែលពេលនេះបានចម្រើនវ័យអាយុ ១៧ ឆ្នាំហើយ។
នៅប្រទេសកម្ពុជា អ្នកនាង ជោលី បានបង្កើតអង្កការមូលនិធិមួយនៅកម្ពុជា ដែលបច្ចុប្បន្នវាមានឈ្មោះថា «អង្គការមូលនិធិ ម៉ាដុក ជោលី-ភីត ឬ Maddox Jolie-Pitt Foundation» ដើម្បីធ្វើសកម្មភាពមនុស្សធម៌ផងដែរ៕ HR
ជោលី ស្លៀកសំពត់ហូលខ្មែរយ៉ាងសមសួន ទៅចូលរួមមហោស្រព។ រូបថត Facebook/Cambodia Town Film Festival
នាងក៏បានឡើងថ្លែងសុន្ទរកថា កាលពីចុងសប្ដាហ៍ផងដែរ។ រូបថត Facebook/Cambodia Town Film Festival
អេនជើលីណា ជោលី នៅតែបន្តគាំទ្រវិស័យភាពយន្តកម្ពុជា។ រូបថត Facebook/Cambodia Town Film Festival
បងប្អូនខ្មែរនៅអាមេរិកផ្ដល់ការទទួលរាក់ទាក់យ៉ាងកក់ក្ដៅដល់ ជោលី។ រូបថត Facebook/Cambodia Town Film Festival
