ភ្នំពេញៈ ខណៈរដូវកាលបុណ្យភ្ជំបិណ្ឌរបស់ខ្មែរកាន់តែជិតមកដល់នោះ ស្រាប់តែឃើញមានសារបង្ហាញឈ្មោះតារាចម្រៀងប្រុស-ស្រី មួយចំនួនយ៉ាងហោចណាស់មកពីទ្រនំផលិតកម្មធំ ៣ គឺផលិតកម្មហង្សមាស ថោន និងសាន់ដេ ចេញពីគណនីហ្វេសប៊ុករបស់លោក យឹម តាស្រង់ ដែលជាអ្នកគ្រប់គ្រងទូទៅនៅផលិតកម្មថ្មីគឺ ហ្គាឡាក់ស៊ីណាវ៉ាត្រា ប្រកាសត្រៀមវត្តមានទៅសម្តែងនៅឯប្រទេស កូរ៉េខាងត្បូង នាពេលឆាប់ៗនេះ។
តារាចម្រៀងប្រុស-ស្រីទាំងនោះរួមមានលោក ព្រាប សុវត្ថិ រួមទាំងកូនប្រុសទាំង ៣ នៅផលិតកម្មហង្សមាស លោក ខេម លោក Tempo Tris និងលោក គូម៉ា តារាចម្រៀងរបស់ទ្រនំថោន និងកញ្ញា អ៊ីវ៉ា មកពីទ្រនំផលិតកម្មសាន់ដេ ព្រមទាំងមានក្រុមភ្លេងចចកសមុទ្រផងដែរនោះ ពួកគេនឹងមានវត្តមានទៅសម្តែងនៅក្នុងកម្មវិធីតន្រ្តីបុរីឡេងណាវ៉ាត្រា។
តែសម្រាប់តារាចម្រៀងស្រីដែលល្បីថា មានផលិតកម្មធំ ២ គឺហង្សមាស និងថោន កំពុងតែចាំត្រងយកតារាចម្រៀងស្រីស្រស់សោភា សាច់សខ្ចី រាងស្ល៊ីម កញ្ញា អ៊ីវ៉ា ក្រោយពីនាងបានផុតកុងត្រាពីទ្រនំចាស់ផលិតកម្មសាន់ដេ តាំងពីនៅឆ្នាំ ២០១៨ មក តែចុងក្រោយនាងបានសម្រេចបន្តនៅផលិតកម្មចាស់ដដែលនោះ ហាក់ដូចជាមិនទាន់ច្បាស់ពីវត្តមានរបស់ខ្លួននៅឡើយទេ សម្រាប់ឱកាសកើបប្រាក់ដុំក្រៅប្រទេសមួយនេះ។
តារាចម្រៀងស្រីមានសំឡេងពីរោះជាទីពេញនិយមនៃយុវវ័យមានឈ្មោះពិត ឃីន ស្រីនាថ ហៅកញ្ញា អ៊ីវ៉ា បង្ហើបប្រាប់ភ្នំពេញប៉ុស្តិ៍ កាលពីល្ងាចម្សិលមិញថា៖ «ចាសបង! ខ្ញុំពិតជាត្រូវបានខាងអ្នករៀបចំការសម្តែងតន្រ្តីនៅកូរ៉េ អញ្ជើញមែន! តែពេលនេះ នាងខ្ញុំនៅមិនទាន់ច្បាស់នៅឡើយដែរទេ ថាតើអាចបានទៅចូលរួមសម្តែងមួយនេះ ព្រោះនាងខ្ញុំនៅរង់ចាំពេលវេលាសម្រេចចិត្តជាចុងក្រោយមួយទៀតក្នុងរយៈពេល ១ ឬ ២ ថ្ងៃខាងមុខនេះសិន គឺដោយសារមានពាក់ព័ន្ធនឹងកាលវិភាគនៃការសម្តែងសិល្បៈរបស់នាងខ្ញុំនៅក្នុងស្រុកតែម្តង»។
ដោយឡែកតារាចម្រៀងស្រី កាន់តែល្បីពីប្រិយមិត្តអ្នកគាំទ្រនៃស្រទាប់យុវវ័យកញ្ញា អ៊ីវ៉ា កាលពីមុននេះ ក៏មានលេចឮថា នាងបានត្រៀមខ្លួនចេញទៅរកទ្រនំថ្មី ក្រោយពីបានផុតកុងត្រានឹងទ្រនំចាស់សាន់ដេមក តែជាចុងក្រោយទំនងជាមានការចរចាត្រូវរ៉ូវគ្នា ទើបបានធ្វើឲ្យស្រីស្រស់ អ៊ីវ៉ា តារាចម្រៀងស្រីមកពីខេត្តកំពង់ស្ពឺនោះ សម្រេចចិត្តបន្តលើទ្រនំផលិតកម្មដដែលវិញ។
កន្លងមកកញ្ញា អ៊ីវ៉ា ក៏បានបញ្ជាក់ពីចំណាប់អារម្មណ៍ដែរថា៖ «ដូចជាបងបានដឹងស្រាប់ហើយ ផលិតកម្មចម្រៀងធំៗក្រៅពីកន្លែងចាស់នាងខ្ញុំ គឺមានតែ ២ ទេ តែទោះយ៉ាងណា នាងខ្ញុំពិតជានៅពុំទាន់បានសម្រេចចិត្តមែននៅក្នុងការជ្រើសព្រោះចាំមើលសិន»៕