ក្រុងហ្ស៊េរុយសាឡិម៖ កងទ័ពសត្វទុងចំណាកស្រុករាប់ម៉ឺនក្បាលបាននាំគ្នាឈ្លានពានកសិដ្ឋានចិញ្ចឹមត្រីនៅប្រទេស អ៊ីស្រាអែល តាំងពីយូរយារ ដែលពួកគេព្យាយាមកម្លាពួកវាតាមរយៈគ្រឿងបំពងសំឡេង ពន្លឺភ្លើងឡាស៊ែរ ស្នូរគ្រាប់កាំភ្លើង។
កសិដ្ឋានចិញ្ចឹមត្រីមួយអាចត្រូវចំណាយប្រាក់ប្រមាណ ១៧២ ០០០ ដុល្លារ ក្នុង ១ ឆ្នាំ លើវិធានការនានា រួមទាំងគ្រឿងបំពងសំឡេងបំពាក់លើរថយន្ដ ១ ឈុត និងការបាញ់កាំភ្លើងបង្អើល។
ស្ថិតក្នុងសភាពអស់សង្ឃឹម ពួកគេនឹកឃើញវិធីមួយផ្សេងទៀត ដោយផ្លាស់ប្ដូរពីការបន្លាចមកជាការផ្ដល់ចំណីងាយៗ។
ដូច្នេះកាលពី ៦ ឆ្នាំមុន ប្រជានេសាទអ៊ីស្រាអែល បានរកឃើញដំណោះស្រាយមួយ ដែលផ្ដល់ត្រីលក់អត់ចេញជាចំណី ដើម្បីកុំឲ្យហ្វូងទុងមកបៀតស្រះត្រីពួកគេ។
លោក អេលី សារី នាយកគ្រប់គ្រងទូទៅសមាគមបង្កាត់ពូជត្រីអ៊ីស្រាអែលបាននិយាយថា មុនពេលទុងមកដល់អ៊ីស្រាអែល ហ្វូងទុងចំណាកស្រុកទាំងនេះអត់មានទីកន្លែងឈប់សំចត និងស៊ីចំណីឡើយ។
ពួកវាចុះសម្រាក និងស៊ីចំណីនៅប្រទេសមជ្ឈិមបូព៌ារយៈពេលជាច្រើនសប្ដាហ៍ ដែលបានបង្កចលាចលដល់ម្ចាស់កសិដ្ឋានជាច្រើន ដែលស្រះត្រី និងអាងចិញ្ចឹមត្រីជាជម្រើសចម្បងសម្រាប់ពួកវា។
ផលប៉ះពាល់ចំពោះកសិដ្ឋានចិញ្ចឹមត្រីពិតជាធំសម្បើម។ លោកបាននិយាយថា៖ «យើងចំណាយប្រាក់រាល់លានក្នុង ១ ឆ្នាំៗ»។
ទ័ពទង់ប្រមាណ ៥ ម៉ឺនក្បាល នាំគ្នាមកសំចតនៅអ៊ីស្រាអែល អំឡុងធ្វើចំណាកស្រុកប្រចាំឆ្នាំចាប់ពីតំបន់បាល់កង់រហូតដល់អាហ្វ្រិក ជាទីដែលពួកវារីករាយនឹងរដូវរងាល្មមៗមុនពេលត្រឡប់ទៅកាន់អឺរ៉ុបវិញ៕ AFP/HR