ក្រុងវ៉ាសូវី : មិនថាជាប្រភពនៃមោទនភាពជាតិ ឬក៏ជាសញ្ញាអវិជ្ជមាននោះទេ ស្រា ស វ៉ូដកា (Vodka) គឺជាផ្នែកនៃអត្តសញ្ញាណរបស់ប្រទេសប៉ូឡូញ។
ប្រទេសនេះទើបតែបានប្រែក្លាយរោងចក្រផលិតស្រាមួយ ទៅជាសារមន្ទីរអភិរក្សប្រពៃណីស្រា វ៉ូដកា ដ៏យូរអង្វែងរបស់ខ្លួន ប៉ុន្តែទីតាំងសារមន្ទីរមួយនេះ បែរជាស្ថិតនៅក្នុងតំបន់មួយនៃទីក្រុងវ៉ាសូវី ដែលធ្លាប់ស្អុយឈ្មោះអាស្រូវជាទីសម្បូរចោរ និងជនប្រមឹក។
លោក Andrzej Szumowski ប្រធានសមាគមស្រា វ៉ូដកា របស់ប្រទេសប៉ូឡូញ ដែលបានចូលរួមឧបត្ថម្ភសារមន្ទីរ ស្រាវ៉ូដកា ដ៏ថ្មីសន្លាង និងដំបូង បង្អស់ក្នុងប្រទេសប៉ូឡូញ បាននិយាយថា៖ «ស្រាវ៉ូដកា ជាផ្នែកនៃហ្សែនរបស់យើង ជាប្រវត្តិសាស្រ្តរបស់យើង ជាបេតិកភ័ណ្ឌរបស់យើង និងជាប្រពៃណីរបស់យើង»។
លោកបានធ្វើការប្រៀបធៀបទៀតថា៖ «គឺដូចនឹងប្រទេសបារាំងអ៊ីចឹង ប្រវត្តិសាស្ត្រគេមានស្រា Cognac និងសំប៉ាញ រីឯអង់គ្លេស ប្រវត្តិសាស្រ្តគេគ្មានន័យទេ បើគ្មានស្រា Gin ឬ ស្រា Scotch វីស្គី ហើយប្រទេសម៉ិកស៊ិកវិញ គេមានស្រា Tequila ក្នុងកំណត់ត្រាប្រវត្តិសាស្ត្រគេ។ ឯយើងនៅប៉ូឡូញ យើងមិនអាចនិយាយអំពីប្រវត្តិសាស្ត្រ ដោយមិនរំឭកពីស្រា វ៉ូដកា នោះទេ»។
ភាពផ្តាច់មុខ
ប្រទេសប៉ូឡូញ គឺជាប្រទេសនៃស្រាបៀរ និងស្រាទឹកឃ្មុំ (Mead) មុនការកកើតនៃស្រា វ៉ូដកា ក្នុងសតវត្សរ៍ទី១៥ ដែលបានជំរុញឲ្យប្រជាជនមានទម្លាប់ផឹកស្រា។
ដោយដាក់ឈ្មោះតាមពាក្យ woda ជាភាសាប៉ូឡូញបកប្រែថា «ទឹក» នោះ ស្រា វ៉ូដកា ក៏ធ្លាប់ដើរតួផងដែរ ជារូបិយវត្ថុ សម្រាប់ការដោះដូរទំនិញក្នុងអំឡុងសម័យកាលប្រវត្តិសាស្រ្តជាច្រើនរបស់ប្រទេសប៉ូឡូញ។
បើតាមសមាគមឧស្សាហកម្មស្មារតីជាតិ ZPPPS បានឲ្យដឹងថា បច្ចុបន្ននេះប្រទេសប៉ូឡូញផលិតស្រាសុទ្ធចំនួនជិត១០០ លានលីត្រ ក្នុងមួយឆ្នាំៗ។
តួលេខនេះបានធ្វើឲ្យប្រទេសប៉ូឡូញ ស្ថិតនៅក្នុងចំណោមប្រទេសផលិតស្រាកំពូលរបស់ពិភពលោក រួមជាមួយប្រទេសអាមេរិក ប្រទេសអ៊ុយក្រែន និងប្រទេសរុស្ស៊ី។
ស្តេចផឹក
នៅក្នុងប្រទេសមួយ ដែលមានប្រជាជនចំនួន ៣៨ លាននាក់ ប្រជាជនជាង ៨០០.០០០ នាក់ គឺជាអ្នកពឹងផ្អែកលើស្រា។ នេះបើយោងតាមលោក Dariusz Wasilewski ដែលជាអ្នកចិត្តវិទ្យាឯកទេសអំពីបញ្ហាគ្រឿងស្រវឹង។
ប៉ុន្តែលោកបានបន្ថែមថា ចំនួនប្រជាជនប៉ូឡូញ ដែលទម្លាប់ផឹកស្រារបស់ពួកគេធ្វើឲ្យប៉ះពាល់ដល់សុខភាព គឺខ្ពស់ជាងមុនបី ឬបួនដងឯណោះ។
លោកបានប្រាប់ទីភ្នាក់ងារ AFP ថា៖ «ខ្ញុំមិនអាចទទួលយកគំនិតដែលថា ស្រាគឺជាផ្នែកមួយនៃមោទនភាពជាតិបាននោះទេ»។
សិល្បៈនៃស្រា វ៉ូដកា
ចំពោះលោក Tadeusz Dorda ដែលជាប្រធានផ្នែកទីផ្សាររបស់ស្រាវ៉ុដកាម៉ាក Chopin លោកជឿថា ការផឹកស្រាវ៉ូដកា ជាសិល្បៈមួយ។
លោកបានថ្លែងបញ្ជាក់ថា៖ «យើងចង់ឲ្យស្រា វ៉ូដកា របស់ប៉ូឡូញយើងត្រូវបានបរិយាយក្នុងន័យល្អ បែបវិជ្ជមាន»។
ឧទាហរណ៍ យើងចង់ឲ្យគេស្គាល់ថា ស្រា វ៉ូដកា មិនត្រូវការផឹកជាមួយទឹកកក។ ជាការពិត អ្នកផឹកស្រាមួយចំនួន និយាយថា កំណត់សម្គាល់នៃគុណភាពរបស់ស្រា វ៉ូដកា គឺថា តើវាអាចផឹកបានឬអត់នៅសីតុណ្ហភាពចន្លោះពី ៦ ទៅ ៨ អង្សារ។
ស្ថិតនៅក្នុងសីតុណ្ហភាពនេះគឺជាពេល ដែលអ្នកផឹកអាចដឹងអំពីរស់ជាតិពិសេសរបស់ស្រា វ៉ូដកា និងក្លិនក្រអូបរបស់វា ដោយពឹងផ្អែកលើធាតុផ្សំចម្បងៗ ព្រមទាំងទីកន្លែង និងពេលវេលា ដែលវាត្រូវបានផលិត។ នេះបើតាមលោក Dorda។
ជាទូទៅស្រា Vodka ដែលផលិតពីដំឡូង មានគុណភាពខ្លាំង ខណៈស្រាវ៉ូដកា ដែលផលិតពីស្រូវរ៉ៃ មានលក្ខណៈស្រាលជាង ហើយក៏ត្រូវបានស្គាល់ផងដែរចំពោះរសជាតិល្វីង និងក្លិនក្រអូបខ្លាំងរបស់វា។ ស្រាវ៉ូដកា ដែលធ្វើពីស្រូវសាលីមានរសជាតិមិនសូវជាធ្ងន់ទេ៕ AFP/PS