ភ្នំពេញ៖ បទពិសោធធ្វើដំណើរ និងបម្រើការតាមបណ្ដាប្រទេសជាច្រើន អ្នកជំនាញត្បូង និងរចនាគ្រឿងអលង្ការជនជាតិបារាំង កញ្ញា អេលីស វីរីនី (Alice Varini) បានបើកហាងអលង្ការផ្ទាល់ខ្លួន ដោយផ្ដោតលើការជ្រើសរើសទាំងវត្ថុធាតុដើម ជាងទង និងការផលិតក្នុងស្រុកទាំងអស់។
កញ្ញា អេលីស បានលើកឡើងថា៖ «ខ្ញុំអាចចំណេញបានច្រើនដោយការនាំយកគ្រឿងអលង្ការធ្វើរួចស្រេចពីប្រទេសថៃ និងចិន ប៉ុន្តែតើធ្វើអ៊ីចឹងមានគុណតម្លៃអី? ខ្ញុំជឿលើចង្វាក់ផលិតកម្មក្បែរខ្លួន និងសិប្បកម្មធ្វើដោយដៃ ហើយនេះជាអ្វីដែលយើងកំពុងធ្វើ។ ដូច្នេះហើយទើបគ្រឿងអលង្ការរបស់យើងទាំងអស់សុទ្ធតែមានភាពពិសេសខុសៗគ្នា ព្រោះយើងអត់ចង់កំណត់ស្ដង់ដាត្បូងកម្ពុជានោះទេ»។
អ្នកជំនាញត្បូង និងរចនាគ្រឿងអលង្ការជនជាតិបារាំងបន្តទៀតថា៖ «រតនសម្បត្តិនៅកម្ពុជាពិតជាស្អាត ហើយអ្នកផ្គត់ផ្គង់ត្បូងឱ្យខ្ញុំ ពួកគេជាវផ្ទាល់ពីគ្រួសារដែលប្រកបរបររុករក និងច្នៃត្បូងដោយផ្ទាល់»។
ស្ថិតនៅកន្លែងហាង Alice Varini Jewelry លើដងវិថី ២៤០ ចិញ្ចៀនត្បូងខៀវរតនគិរីរាងពងក្រពើពណ៌ផ្ទៃមេឃតូចល្មមត្រូវបានច្នៃដាក់អមសងខាងត្បូងរូបរាងពីធម្មជាតិ ដោយប្រើប្រាស់ក្រចាប់មាស រំលេចនូវលក្ខណៈសាមញ្ញ តែទំនើបទាន់សម័យ។
ចិញ្ចៀន ១ វង់នេះ ត្រូវបានច្នៃម៉ូដដោយ កញ្ញា អេលីស ដែលនាងបានដាក់ឈ្មោះវាថា លីសា (Lisa) ដែលគ្រាន់តែជាម៉ូដ ១ ក្នុងចំណោមម៉ូដស្រស់ស្អាតជាង ៥០ ទៅ ៦០ ម៉ូដទៀត ដែលសុទ្ធតែធ្វើពីដៃផ្ទាល់ក្នុងបន្ទប់តាំងបង្ហាញរបស់ អេលីស។
មុននឹងឈានដល់ការបើកហាងអលង្ការផ្ទាល់ខ្លួន កញ្ញា អេលីស បានមកកាន់ទឹកដីកម្ពុជាកាលពីចុងឆ្នាំ ២០១៤ ដោយបម្រើការជួយសិប្បករខ្មែរច្នៃគ្រឿងអលង្ការ ធ្វើសិក្ខាសាលា និងស្វែងរកទីផ្សារនៅសៀមរាប។
កញ្ញាបានប្រាប់ ភ្នំពេញ ប៉ុស្ដិ៍ ថា៖ «ខ្ញុំបានធ្វើការជាមួយ Artisans Angkor នៅសៀមរាបរយៈពេល ៣ ឆ្នាំ។ បន្ទាប់ពីនោះដោយឃើញថាក្រុមហ៊ុនអាចដំណើរការទៅបានល្អហើយសិប្បករក៏អាចច្នៃម៉ូដបានពូកែ ខ្ញុំក៏សម្រេចចិត្តឈប់ ព្រោះខ្ញុំចង់ទៅធ្វើអ្វីដែលអាចឱ្យខ្ញុំរៀនអ្វីថ្មីបន្ថែម»។
កញ្ញាដែលបានចំណាយពេល ៨ ឆ្នាំ ក្នុងការបញ្ចប់ការសិក្សារពីផ្នែកត្បូង និងរចនាម៉ូដគ្រឿងអលង្ការនៅទីក្រុងប៉ារីសនៃ Haute Ecole de Joaillerie និង National institute of Gemology បានសម្រេចក្ដីសុបិនបើកបន្ទប់ដាក់តាំងបង្ហាញគ្រឿងអលង្ការ Alice Varini Jewelry រួចរាល់នៅខែវិច្ឆិកា ឆ្នាំមុន។
នៅទីនោះមានត្បូងចម្រុះរួមមានពណ៌ខៀវ ពណ៌បៃតង ក្រហម លឿង ស្វាយ ដាំរចនានៅលើចិញ្ចៀន កងដៃ ក្រវិល និងខ្សែក ដ៏ស្អាតប្លែកភ្នែក។
កញ្ញាវ័យ ៣១ ឆ្នាំរូបនេះបានឱ្យដឹងថា នាងយកវាមកពីខេត្តផ្សេងៗនៅកម្ពុជាដូចជា ខេត្តរតនគិរី មណ្ឌលគិរី ពេលចុះតាមបណ្ដាខេត្តទាំងនោះ។ ត្បូងខ្លះត្រូវបានទិញពីអ្នកជិតដិតនៅភ្នំពេញ ដែលកញ្ញាអាចទុកចិត្តថា ជាត្បូងក្នុងស្រុកពិតប្រាកដ។
អលង្ការរបស់កញ្ញា អេលីស ទាក់ទាញអតិថិជនគ្រប់ជាតិសាសន៍មានទាំងបារាំង រុស្ស៊ី អូស្ត្រាលី អាមេរិក និងបណ្ដាប្រទេសដទៃទៀត។
អ្នកជំនាញមើលត្បូង និងច្នៃគ្រឿងអលង្ការរូបនេះ បានបញ្ជាក់ថា៖ «រាល់ម៉ូដដែលខ្ញុំចេញមក គឺមានចំនួនកំណត់យ៉ាងច្រើនមានតែ ៥ ទៅ ១០ ម៉ូដប៉ុណ្ណោះ ហើយបើទោះអតិថិជនចង់បានម៉ូដតែមួយ ក៏ខ្ញុំច្នៃយ៉ាងណាឱ្យវាមានលក្ខណពិសេសបែបវា ព្រោះមនុស្សយើងមានភាពពិសេសខុសគ្នា ខ្ញុំក៏ចង់ឱ្យគ្រឿងអលង្ការរបស់ខ្ញុំពិសេសដូចគ្នាដែរ។ ខ្ញុំចង់ឱ្យគ្រឿងអលង្ការ ១ សម្រាប់តែមនុស្សម្នាក់»។
គ្រឿងអលង្ការដែលកញ្ញាលក់ដាច់ជាងគេ គឺចិញ្ចៀន ហើយកញ្ញាបានឱ្យដឹងថា ម៉ូដដែលលក់ដាច់បំផុតនោះ គឺម៉ូដ លីសា បុប្ផា និង អាដាណា។ ចិញ្ចៀនទាំង ៣ វង់ធ្វើមកពីត្បូងខៀវរតនគិរីតែវាមានម៉ូដខុសៗគ្នា។
គ្រឿងអលង្ការរបស់ Alice Varini Jewelry មានតម្លៃពី ១៥ ដុល្លារ ទៅ ៥០០ ដុល្លារ។ យូរៗម្ដង កញ្ញាក៏មានធ្វើគ្រឿងអលង្ការតម្លៃពី ៣ ០០០ ទៅ ៥ ០០០ ដុល្លារផងដែរ។
ទន្ទឹមនឹងដំណើរការល្អមានភ្ញៀវចម្រុះសាសន៍ពេញចិត្តគាំទ្រទឹកដៃ កញ្ញាបានបន្តថា កញ្ញាចង់មានពេលវេលាច្រើនសម្រាប់អភិវឌ្ឍខ្លួន។
កញ្ញា អេលីស ប្រាប់ថា៖ «ខ្ញុំចង់មានពេលច្នៃប្រឌិត បន្ថែមទៅលើគ្រឿងអលង្ការទាំងម៉ូដ និងការអភិវឌ្ឍគុណភាព។ ខ្ញុំក៏គិតថា ចង់មានជំនួយការម្នាក់មកជួយការងារ និងស្វែងរកទំនាក់ទំនងជាមួយទីផ្សារបានកាន់តែប្រសើរ»។
នៅថ្ងៃ ២៥ មេសា ខាងមុខ អេលីស និងរៀបចំសិក្ខាសាលាចំនួន ២ វគ្គគឺ១. ការរៀនយល់ដឹងពីត្បូងនៅកម្ពុជា និងរបៀបមើលត្បូងពិត និងត្បូងមិនពិត និង ២.ការរៀនច្នៃគ្រឿងអលង្ការដោយខ្លួនឯង។
កញ្ញាប្រាប់ពីទឹកចិត្តស្រឡាញ់ត្បូងនៅកម្ពុជាដូច្នេះថា៖ «នៅកម្ពុជាមានត្បូងស្អាត និងកម្រច្រើនណាស់ដូចជាត្បូងដែលមានតែនៅកម្ពុជានោះ គឺត្បូងរតនគិរីដែលខ្ញុំស្រឡាញ់បំផុត។ មនុស្សមួយចំនួនអាចនឹងមិនបានស្គាល់ទេ។ ដូច្នេះអ្នកមានចំណាប់អារម្មណ៍អាចមកលេងខ្ញុំបាន»។
ព័ត៌មានបន្ថែមមាននៅទំព័រហ្វេសប៊ុក @alicevarinijewelry៕