.jpg)
លោក ហឿ សេធុល អ្នកជំនាញចិត្តវិទ្យាកម្ពុជា លើកទឹកចិត្តឲ្យប្រជាជនដាំដំណាំជាការកម្សាន្តនៅផ្ទះ។ ហុង មិនា
ភ្នំពេញ៖ ខណៈក្រសួងសុខាភិបាលកម្ពុជាបានធ្វើការប្រកាសស្តីពីការរីករាលដាលនៃជំងឺកូវីដ ១៩ ដែលមានការកើនឡើងជាបន្តបន្ទាប់រហូតដល់ ៨៧ ករណីនៅទូទាំងប្រទេស ក្ដីកង្វល់ពីការឆ្លងវីរុសកូរ៉ូណា បានធ្វើឲ្យប្រជាជនសម្ងំនៅផ្ទះ កាត់បន្ថយការដើរហើរមិនចាំបាច់ និងរក្សាគម្លាតដើម្បីសុខភាព។
អំឡុងពេល ដែលប្រជាជនសុខចិត្តនៅផ្ទះច្រើន បង្កើនសុវត្ថិភាពពីការឆ្លងជំងឺសម្ដីជាញឹកញយ ដែលពួកគេតែងតែលាន់មាត់និយាយថា «ធុញណាស់» ឬ «អផ្សុកណាស់»។
យោងតាមអ្នកជំនាញសុខភាពផ្លូវចិត្ត សកម្មភាពនៅផ្ទះឈ្នះជំងឺឆ្លងនេះ អាចបង្កឲ្យមានផលប៉ះពាល់ដល់ផ្នែកអារម្មណ៍ ប្រសិនបើពួកគេពុំអនុវត្តវិធីសាស្ត្រសម្រួលអារម្មណ៍ និងចាប់យកជម្រើសថ្មីៗសម្រាប់ការកម្សាន្តសប្បាយ។
លោក ហឿ សេធុល អ្នកប្រឹក្សាយោបល់ផ្នែកចិត្តសាស្ត្របានលើកឡើងថា៖ «ការរស់នៅសម្ងំក្នុងផ្ទះដោយមិនមានទំនាក់ទំនងជាមួយសង្គមខាងក្រៅបែបនេះ អាចបង្កឲ្យមនុស្សមួយចំនួនកើតមាននូវបញ្ហាផ្នែកផ្លួវចិត្តផ្សេងៗ ដូចជាជំងឺស្ត្រេស និងជំងឺផ្លូវចិត្តជាដើម»។
ការបាត់បង់ឱកាសដើរកម្សាន្ត ជួបជុំមិត្តភក្ដិរីករាយរំសាយស្ត្រេស ដោយកន្លែងប្រមូលផ្ដុំមនុស្សច្រើនកុះករ ដូចជាក្លិបរាត្រី និងការប្រគំតន្ត្រីត្រូវបានផ្អាកដំណើរការ អាចបន្ថែមសម្ពាធផ្លូវចិត្តដល់មនុស្ស ជាមួយនឹងផលប៉ះពាល់ផ្នែកអារម្មណ៍។
លោកបានពន្យល់ទៀតថា៖ «Social Distancing មានន័យថា ការរក្សាគម្លាតពីសង្គម អាចនឹងផ្តល់ផលប៉ះពាល់ដល់មនុស្សមួយចំនួន ខណៈពេលដែលធម្មជាតិមនុស្ស ពិតមិនអាចផ្តាច់ខ្លួនពីសង្គមក្នុងរយៈពេលវែងបានឡើយ។ ផលប៉ះពាល់ទាំងនោះមានដូចជា ធ្វើឲ្យមនុស្សចាប់ផ្តើមមានអារម្មណ៍មួម៉ៅ តានតឹង និងចាប់ផ្តើម ផ្លាស់ប្តូរអាកប្បកិរិយា ផ្នត់គំនិត ឬអាចឈានទៅដល់ការកើតវិបត្តិផ្លូវចិត្តតែម្តង»។
ទន្ទឹមនឹងកង្វល់ពីបញ្ហាចំណូលមួយចំនួន និងកត្តាសន្តិសុខមូលដ្ឋាន ស្ថិតក្នុងស្ថានភាពនេះ លោក សេធុល បានណែនាំនូវវិធីសាស្រ្តមួយចំនួន ដើម្បីឲ្យប្រជាពលរដ្ឋយកទៅអនុវត្តដើម្បីសម្រួល និងកាត់បន្ថយអារម្មណ៍តានតឹងដែលអាចកើតមានក្នុងអំឡុងពេលសម្រាកនៅក្នុងផ្ទះ។
អ្នកជំនាញសុខភាពផ្លូវចិត្តរូបនេះ បានពន្យល់ថា៖ «ទី១ ត្រូវចៀសវាងការទំនាក់ទំនងគ្នាជាសាធារណៈ ដោយប្តូរមកជាការទាក់ទងបែបសុវត្ថិភាព គឺការប្រាស្រ័យទាក់ទងតាមបណ្តាញសង្គមនានា ដូចជាហ្វេសប៊ុក តេឡេក្រាម ឬប្រព័ន្ធផ្សព្វផ្សាយផ្សេងៗ»។
យ៉ាងណាមិញ លោកនៅតែទទូច សម្រាប់ចំណុចទី២ ដោយគួរចៀសវាងការជួបជុំលក្ខណៈទ្រង់ទ្រាយធំ មកជាការជួបជុំជាលក្ខណៈទ្រង់ទ្រាយតូចជាមួយអ្នកក្បែរខាង ដែលមានមនុស្សមិនលើសពី ៣ នាក់។
លោកបន្តទៀតថា៖ «ទី៣ ដាក់គម្លាតភាពមមាញឹកពីការងារចុះហើយប្តូរមកធ្វើការងារកសិកម្មក្នុងបរិវេណផ្ទះ ដូចជាការដាំដំណាំបន្លែ ផ្លែឈើ ផ្សេងៗ ជាមួយសាច់ញាតិ បងប្អូន កូនចៅ ដែលរស់នៅក្នុងផ្ទះជាមួយគ្នា»។
ការទាញចំណេញពីអត្ថប្រយោជន៍នៃការនៅផ្ទះ ប្រជាជនក៏អាចទទួលបានកម្រៃពីការដាំដុះនោះតាមរយៈ ការលក់ដូរកសិផលទៅឲ្យអ្នកជិតខាង ឬទៅអ្នកទិញតាមរយៈប្រព័ន្ធផ្សព្វផ្សាយសង្គមនានាផងដែរ។
សម្រាប់យុវវ័យដែលចូលចិត្តការជួបជុំសប្បាយតាមកន្លែងកម្សាន្តផ្សេងៗ លោកលើកទឹកចិត្តឲ្យរីករាយនឹងសកម្មភាពស្រដៀងគ្នានោះនៅក្រោមដំបូលផ្ទះវិញ។
អ្នកជំនាញរូបនេះបានណែនាំថា៖ «ខ្ញុំលើកទឹកចិត្ត គួរតែផ្លាស់ប្តូរឥរិយាបថពីការរាំលេងកម្សាន្តតាមមណ្ឌលកម្សាន្ត មកជាការស្តាប់ភ្លេងកម្សាន្តនៅផ្ទះ ចម្អិនម្ហូបអាហារ និងពិសាអាហារជួបជុំគ្នាជាលក្ខណៈគ្រួសារ ជាមួយអ្នកផ្ទះ និងធ្វើការរាំកម្សាន្តជាមួយក្រុមគ្រួសារវិញ។ សម្រាប់យុវវ័យដែលចូលចិត្តធ្វើដំណើរកម្សាន្តនៅតែអាចធ្វើដំណើរកម្សាន្តទៅកាន់តំបន់ណាដែលមិនសូវមានមនុស្សចូលរួមច្រើន ឧទាហរណ៍ ដូចជាការឡើងភ្នំជាដើម»។
ជាជាងការធុញថប់អារម្មណ៍អំឡុងពេលនៅផ្ទះរយៈពេលយូរ លោក ហឿ សេធុល បានជំរុញឲ្យប្រជាជនស្វែងរកភាពវិជ្ជមានឲ្យបានច្រើនពីសកម្មភាពនៅផ្ទះសាមញ្ញៗប្រចាំថ្ងៃ។
លោកបានលើកទឹកចិត្តទៀតថា៖ «នេះជាឱកាសល្អសម្រាប់បងប្អូនប្រជាពលរដ្ឋ ក្នុងការបង្កើនភាពស្និទ្ធស្នាលជាមួយឪពុកម្តាយ និងសមាជិកគ្រួសាររៀងៗខ្លួន។ សូមចូលរួមទាំងអស់គ្នា ដើម្បីទប់ស្កាត់ការរីករាលដាលនៃជំងឺកូវីដ ១៩»៕
