ក្រុងខេពថោន: រាត្រីថ្ងៃសៅរ៍ ក្នុងខែសីហា អ្នកជ្រមុជទឹកវ័យ ២៦ ឆ្នាំ ដឺរីច វ៉ាន់ ប្លែក បានហក់ឡើងទូកតូចមួយ ក្បែរឆ្នេរក្រុងខេពថោន អាហ្រ្វិកខាងត្បូង ពេលនេសាទខុសច្បាប់ក្នុងដែនសមុទ្រ។ ជាអកុសលយុវជនរូបនេះ លែងវិលវិញជារៀងរហូត។
ប្អូនជីដូនមួយឈ្មោះ ប្រ៊ូស វ៉ាន់ រីណេន អាយុ ២៣ ឆ្នាំ បានពោលខ្សឹកខ្សួលថា៖ «ដឺរីច និងខ្ញុំផ្ដើមចេញនេសាទតាំងពីអាយុ ១៥ ឆ្នាំ»។
ថ្ងៃណាហេង អ្នកជ្រមុជទឹកដូចជាពួកគេអាចរកចំណូលបានរាប់រយដុល្លារ តែប្រាក់នេះមិនស្មើនឹងតម្លៃខ្យងប៉ាវហ៊ឺក្រៀមនៅលើទីផ្សារក្រុងហុងកុង ដែលមួយគីឡូក្រាមថ្លៃចាប់ពី ៣០០ ដុល្លារ (១,២ លានរៀល) ដល់ជាង ១ ម៉ឺនដុល្លារឯណោះ។
ខ្យងប៉ាវហ៊ឺមានតម្លៃខ្ពស់កប់ពពកនៅក្រុងហុងកុង ចិនដីគោក និងបណ្ដាប្រទេសនៅអាស៊ីខាងកើត ដោយម្ហូបខ្យងសមុទ្រទាំងនេះ តម្រូវនឹងពិធីជប់លៀងមង្គលការជាដើម។
ប៉ុន្តែទម្រាំតែខ្យងប៉ាវហ៊ឺទៅដល់តុម្ហូប ជីវិតអ្នកជ្រមុជរកសត្វសមុទ្រនេះត្រូវប្រថុយនឹងការនេសាទខុសច្បាប់។ ក្រុមអ្នកស៊ើបអង្កេតកំពុងតាមដានអ្នកជ្រមុជឯទៀត និងគ្រួសាររបស់លោក ដឺរីច វ៉ាន់ ប្លែក ដែលថា លោកត្រូវបានសម្លាប់ដោយកងបង្ក្រាបប្រឆាំងការនេសាទខុសច្បាប់ ដែលជាជម្លោះហិង្សារវាងអាជ្ញាធរអាហ្រ្វិកខាងត្បូង និងក្រុមនេសាទសន្ដានខ្យង និងបង្កងថ្មខុសច្បាប់។
អ្នកនាំពាក្យនាយកដ្ឋានជលផល Khaye Nkwanyana បានបន្ដថា កងកម្លាំងពិសេស «អាចបាញ់ប្រហារក្នុងករណីការពារខ្លួនប៉ុណ្ណោះ»។
ប៉ុន្ដែសកម្មជនសហគមន៍ Roscoe Jacobs អាយុ ៣២ ឆ្នាំ បាននិយាយថា ពលរដ្ឋចាត់ទុកការនេសាទខុសច្បាប់នេះអាចដោះស្រាយភាពក្រីក្រ។
លោកលើកឡើងថា៖ «វាមិនមែនជាអ្វីដែលពលរដ្ឋប្រាថ្នាចង់ធ្វើនោះទេតែដោយសារតែស្ថានភាពសេដ្ឋកិច្ចខ្សត់ខ្សោយ យើងត្រូវតែបង្ខំចិត្ដ»។
ឆ្នាំមុន អាជ្ញាធរចិនបានបង្ក្រាបបទល្មើសដ៏ធំ ជាការប៉ុនប៉ងរត់ពន្ធគ្រឿងសមុទ្រតម្លៃ ១១៥ លានដុល្លារ រួមទាំងខ្យងប៉ាវហ៊ឺផងដែរ៕