.jpg)
អ្នកនិពន្ធខ្មែរ ៣ រូប ពេលទៅទទួលពានរង្វាន់កវីនិពន្ធអាស៊ីអាគ្នេយ៍ S.E.A Writer Award នៅក្រុងបាងកក ប្រទេស ថៃ។ ហ្វេសប៊ុក
ភ្នំពេញ៖ កាលពីថ្មីៗនេះ អ្នកនិពន្ធ និងកវីនិពន្ធខ្មែរចំនួន ៣ រូប ជាម្ចាស់ពានរង្វាន់ជំនាន់ផ្សេងគ្នា បានទៅទទួលពានរង្វាន់សម្រាប់កវីនិពន្ធអាស៊ីអាគ្នេយ៍ S.E.A Write Award រួមគ្នានៅទីក្រុងបាងកក ប្រទេស ថៃ ខណៈកម្ពុជាយើងមានចំនួនអ្នកនិពន្ធ និងកវីនិពន្ធសរុប ១៦ រូប ហើយបានឈ្នះពានក្នុងកម្មវិធីនេះគិតចាប់ពីឆ្នាំ ១៩៩៩ មកដល់ត្រឹមឆ្នាំ ២០១៨។
អ្នកនិពន្ធ និងកវីនិពន្ធខ្មែរចំនួន ៣ រូប ដែលទើបទទួលពានរង្វាន់នោះ រួមមានលោកបណ្ឌិត ព្រឿង ប្រណីត ដែលជាប្រធានសមាគមអ្នកនិពន្ធខ្មែរនាពេលបច្ចុប្បន្ន ដោយលោកទទួលពានរង្វាន់កវីនិពន្ធអាស៊ីអាគ្នេយ៍ S.E.A Write Award ប្រចាំឆ្នាំ ២០១៦ លោកបណ្ឌិត ឡឹក ជំនោរ ជាអនុប្រធានសមាគមអ្នកនិពន្ធខ្មែរ ទទួលបន្ទុកផ្នែកស្រាវជ្រាវបោះពុម្ពផ្សាយ និងនវានុវត្តន៍ បានទទួលពានរង្វាន់ប្រចាំឆ្នាំ ២០១៧ ខណៈអ្នកគ្រូ ប៉ុល ពិសី ទទួលបានរង្វាន់ប្រចាំឆ្នាំ ២០១៨។
លោក ព្រឿង ប្រណីត បញ្ជាក់ឲ្យដឹងច្បាស់ពីវត្តមានអ្នកនិពន្ធ និងកវីនិពន្ធខ្មែរ ៣ ជំនាន់ ទើបតែទទួលបានឆ្នាំ ២០១៩ នេះថា៖ «តាមពិតទៅ ដោយសារតែខាងសាមីប្រទេស ដែលរៀបចំកម្មវិធីនេះ ខកខានរៀបចំផ្តល់ជូនពានរង្វាន់ប៉ុន្មានឆ្នាំចុងក្រោយនេះ ទើបគេមកធ្វើនៅឆ្នាំនេះ សម្រាប់កម្មវិធីរួមមួយតែម្តង។
លោក ព្រឿង ប្រណីត ប្រធានសមាគមអ្នកនិពន្ធខ្មែរក៏បានពានម្នាក់ដែរ។ ហ្វេសប៊ុក
ដោយឡែកពានរង្វាន់ កវីនិពន្ធអាស៊ីអាគ្នេយ៍ S.E.A Write Award ឆ្នាំ ២០១៩ នៅមិនទាន់បានធ្វើនៅឡើយ ខណៈគេគ្រោងធ្វើរួមគ្នា ២ ដង នៅក្នុងឆ្នាំ ២០២០ ខាងមុខនេះ។ ដូច្នេះវត្តមានអ្នកនិពន្ធ និងកវីនិពន្ធខ្មែរ ៣ រូប មានរូបខ្ញុំ លោក ឡឹក ជំនោរ និងអ្នកគ្រូ ប៉ុល ពិសី គឺមកទទួលពាននៅឆ្នាំចាស់ប៉ុណ្ណោះ។ សម្រាប់ខ្ញុំទទួលពានរង្វាន់ឆ្នាំ ២០១៦ ផ្នែកកំណាព្យ លោក ឡឹក ជំនោរ ទទួលពានរង្វាន់ឆ្នាំ ២០១៧ ផ្នែករឿងខ្លី និងអ្នកគ្រូ ប៉ុល ពិសី បានទទួលពានរង្វាន់ប្រចាំឆ្នាំ ២០១៨ ផ្នែករឿងប្រលោមលោក»។
ប្រធានសមាគមអ្នកនិពន្ធខ្មែរលោកបណ្ឌិត ព្រឿង ប្រណីត ក៏បានបង្ហើបឲ្យដឹងពីវត្តមានទាំង ១៦ រូប នៃអ្នកនិពន្ធ និងកវីនិពន្ធខ្មែរ ដែលធ្លាប់បានទទួលពានរង្វាន់កវីនិពន្ធអាស៊ីអាគ្នេយ៍ S.E.A Write Award នេះ ដែលគិតចាប់តាំងពីឆ្នាំ ១៩៩៩ មកត្រឹមឆ្នាំ ២០១៨ ដែរថា៖ «បើតាមកវីនិពន្ធ អ្នកនិពន្ធខ្មែរ ដែលបានទទួលពានរង្វាន់កវីនិពន្ធអាស៊ីអាគ្នេយ៍ S.E.A Write Award ដែលធ្វើនៅបាងកក ប្រទេស ថៃ សម្រាប់កម្ពុជាយើងនៅចន្លោះឆ្នាំ ១៩៩៩-២០១៨ រួមមានឆ្នាំ ១៩៩៩ កវីនិពន្ធ ពេជ្រ ទុំក្រវិល (ស្លាប់),ឆ្នាំ ២០០០ កវីនិពន្ធ គង្គ ប៊ុនឈឿន(ស្លាប់), ឆ្នាំ ២០០១ កវីនិពន្ធ ម៉ៅ អាយុទ្ធ, ឆ្នាំ ២០០២ អ្នកនិពន្ធ សេង សំអាន, ឆ្នាំ ២០០៣ អ្នកនិពន្ធ គឹម ពេជ្រពីនន់, ឆ្នាំ ២០០៤ កវីនិពន្ធ ជ័យ ចាប, ឆ្នាំ ២០០៥ អ្នកនិពន្ធ មៀច ប៉ុណ្ណ (ស្លាប់), ឆ្នាំ ២០០៦ អ្នកនិពន្ធ ប៉ាល់ វណ្ណារីរក្ស, ឆ្នាំ ២០០៧ អ្នកនិពន្ធ អ៊ុំ សុផានី (ស្លាប់), ឆ្នាំ ២០០៨ កវីនិពន្ធ ស៊ិន ទូច, ឆ្នាំ ២០១៣ កវីនិពន្ធ សុខ ចាន់ផល, ឆ្នាំ ២០១៤ អ្នកនិពន្ធ វ៉ា សំអាត, ឆ្នាំ ២០១៥ អ្នកនិពន្ធ ខូ តារារិទ្ធ, ឆ្នាំ ២០១៦ កវីនិពន្ធ ព្រឿង ប្រណីត, ឆ្នាំ២០១៧ អ្នកនិពន្ធ ឡឹក ជំនោរ, ឆ្នាំ ២០១៨ កវីនិពន្ធ ប៉ុល ពិសី។ សម្រាប់ឆ្នាំ ២០១៦-២០១៨ បានប្រារព្ធរួមគ្នាក្នុងឆ្នាំ ២០១៩ កាលពីថ្មីៗនេះ ក្រោមព្រះរាជាធិបតី សម្ដេចព្រះនាងចៅហ្វាសិរីវណ្ណវរីនារីរតនរាជកញ្ញា ព្រះរាជតំណាងដ៏ខ្ពង់ខ្ពស់ព្រះមហាក្សត្រនៃព្រះរាជាណាចក្រថៃ»៕
