ភ្នំពេញ៖ ដោយសារតែមានទេពកោសល្យពីកំណើតគួបផ្សំនឹងការផ្តល់ឱកាសលើអាជីព ដែលរូបខ្លួនស្រឡាញ់ផងនោះ ពេលវេលាបានរុញច្រានរំលង ១០ ឆ្នាំបាត់ទៅហើយ សម្រាប់លោក សោម ដូរ៉េ ក្នុងការប្រឡូកអាជីពជាអ្នកនិពន្ធទំនុកច្រៀងឲ្យតារាចម្រៀងប្រុសស្រីខ្មែរល្បីៗជាច្រើនផលិតកម្មប្រចាំប្រទេស កម្ពុជា ខណៈពេលនេះលោកនិពន្ធបទចម្រៀងបាន ៩០៩ បទ។
លោក សោម ដូរ៉េ បច្ចុប្បន្ន គឺជាអ្នកនិពន្ធ និងប្រធានគ្រប់គ្រងផ្នែកបទចម្រៀងផលិតកម្មថោន បង្ហើបប្រាប់ពីប្រវត្តិ និងការឈានចូលក្នុងអាជីពនិពន្ធចម្រៀងនាគ្រាដំបូងថា៖ «ការប្រឡូកអាជីពអ្នកនិពន្ធបទចម្រៀងនេះ គឺជារឿងចៃដន្យ ព្រោះតែកាលនោះ ខ្ញុំមិនទាន់រៀនចប់នៅឡើយទេ! ហើយណាមួយខ្ញុំ ក៏មិនមានសាច់ញាតិជាអ្នកសិល្បៈអ្វីនោះដែរទេ! គឺដោយសារតែការផ្តល់ឱកាសពីថៅកែផលិតកម្មហង្សមាស គាត់បានសាកឲ្យខ្ញុំសរសេរចម្រៀង និងជួយគូរ Storyboard ថតពាណិជ្ជកម្មក៏ធ្វើឲ្យខ្ញុំចេះតែទទួលបាននូវឱកាសតែងចម្រៀង និពន្ធជាបន្តបន្ទាប់។ គាត់ស្រឡាញ់ពេញចិត្តទឹកដៃរបស់ខ្ញុំរហូតធ្វើឲ្យខ្ញុំក្លាយជាអ្នកនិពន្ធអាជីពប្រចាំផលិតកម្មរស្មីហង្សមាសក្នុងអំឡុងឆ្នាំ ២០១០។ គិតមកទល់នឹងបច្ចុប្បន្ននេះ ខ្ញុំនិពន្ធចម្រៀងចំនួន ៩០៩ បទហើយ នៅក្នុងអាជីពនិពន្ធ ដែលប្រឡូករយៈពេល ១០ ឆ្នាំ»។
អតីតធ្លាប់់ជាសិស្សរៀននៅឯវិទ្យាល័យជាស៊ីមសន្ធរម៉ុក និងជានិស្សិតរៀនផ្នែក Interiors Design ហើយក៏បានសិក្សាជាមួយនឹងប្រធាននាយកដ្ឋានសិល្បៈសូនរូប និងភាពយន្តផ្នែកគំនូរ លោក សោម ដូរ៉េ បានបន្តថា៖ «កាលពីចាប់ផ្តើមអាជីព ជាអ្នកនិពន្ធភ្លាម ដោយសារតែបទចម្រៀង ដែលខ្ញុំនិពន្ធភាគច្រើនល្បីៗ និងត្រូវចិត្តយុវវ័យ ដូច្នេះគាត់ក៏ឲ្យខ្ញុំសរសេរបទបែបជាមនោសញ្ចេតនា និងបទញាក់បែបយុវវ័យដែរ។ ចំពោះអាជីពមួយនេះ ខ្ញុំចេះសរសេរគ្រប់ទម្រង់បទសម័យ បទបុរាណ បទញាក់ បទបរទេស គឺខ្ញុំអាចសរសេរបានទាំងអស់។ បទដំបូងរបស់ខ្ញុំនិពន្ធនោះ គឺបទដែលមានចំណងជើងថា «ហោប៉ៅធូរបាត់ស្នេហ៍» ច្រៀងដោយលោក នៅ ស៊ីនឿន និងបទ «បងសង្សារលេងៗ» ច្រៀងដោយលោក ណុប បាយ៉ារិទ្ធ។ សម្រាប់អាជីពនិពន្ធនេះ ខ្ញុំនិពន្ធចម្រៀងឲ្យតារាល្បីៗក្នុងប្រទេសសឹងតែគ្រប់គ្នា គឺមានក្នុងផលិតកម្មរស្មីហង្សមាស ថោន ផលិតកម្មប៊ិកមែន និងផលិតកម្មក្រៅស្រុកជាច្រើនទៀត»។
លោក សោម ដូរ៉េ ជាអ្នកនិពន្ធវ័យក្មេងដ៏ល្បី ១ រូប ទើបមានវ័យ ២៨ ឆ្នាំ តែលោកត្រូវបានគេទទួលស្គាល់ថា មានទេពកោសល្យល្អក្នុងការតាក់តែងនិពន្ធទំនុកច្រៀង អ្នកដឹកនាំរឿង និពន្ធខ្សែភាពយន្ត អ្នកដឹងនាំកម្មវិធីទូរទស្សន៍ និងមានសមត្ថភាពអាចសរសេរ ណោតភ្លេង និងមេឡូឌីទៀតផងដែរ។ មិនតែប៉ុណ្ណោះអ្នកនិពន្ធទំនុកច្រៀង លោក សោម ដូរ៉េ ដែលគេឧស្សាហ៍ឃើញតាក់តែងបទចម្រៀងឲ្យតារាចម្រៀងកំពូលប្រុសល្បីនៅផលិតកម្មថោន នោះក៏មានប្រវត្តិកំណើតបែបរាងប្លែកផងដែរ គឺលោកកើតនៅទីក្រុងម៉ូស្គូ ប្រទេស រុស្ស៊ី ដោយលោកបញ្ជាក់ថា៖ «ខ្ញុំមានស្រុកកំណើតនៅទីក្រុង ម៉ូស្គូ ប្រទេស រុស្ស៊ី ប៉ាម៉ាក់ខ្ញុំខ្មែរទេ តែពេលពួកគាត់ទៅសិក្សានៅទីនោះ ហើយខ្ញុំក៏កើតនៅទីនោះ»។
ចំពោះបទចម្រៀង ដែលលោកបាននិពន្ធភាគច្រើនសុទ្ធសឹងតែជាបទចម្រៀងដែលមានការគាំទ្រខ្លាំងពីទស្សនិកជនរួមដូចជាបទ «សង្សារលេងៗ» បទ «កូនក្រមុំបងគ្រាន់តែជាមនុស្សស្រីធម្មតា» ខណៈបទចម្រៀងនៅឆ្នាំ ២០១៩ កន្លងមកមានបទ «រំលឹមប្រុយៗ» បទ«ឡាំលាវកាលីប» បទ «រាំឡករង្វើល» បទ«រាំវង់សូឡូ» បទ«កន្ទ្រឹមប៉ក់» បទ«មេម៉ាយក៏ស្រីពោះម៉ាយក៏ប្រុស» បទ «ម៉ាឌីហ្សុនឈូសស្បែកជើង» បទ «រាំចេញសៃម៉ៃ» បទ «ស្រលាញ់មេម៉ាយស្តាយក្រមុំ» បទ «សុភាពបែបសំភី» បទ «រាំកាលីងបាយសង» បទ «ប៉េវៗ» បទ «ជិះអាដូតល្ហើ» បទ «ស្រឡាញ់ស្រីសក់ចង» បទ «សុំទ្រីសុំគ្រលាស់មួយ» ហើយនៅឆ្នាំ ២០២០ នេះក៏មានបទមួយចំនួនដែរ ដូចជា បទ «រាំម៉ៃ» បទ «រាំលូលូអូឡាឡា» បទ «កន្ទ្រឹមកងកែវ» និងបទ «អូនមួយច្រមិចៗ» ជាដើម៕