ភ្នំពេញ៖ ក្រោយពីទទួលបានការគាំទ្រខ្លាំងពីប្រិយមិត្តអ្នកអាន ដែលចំណាយពេលរៀនតែងនិពន្ធដោយខ្លួនឯងតាំងពីវ័យ ១២ ឆ្នាំមក ដែលផ្អែកទៅលើបទពិសោធចូលចិត្តអានសៀវភៅច្រើន និងប្រឡូកនិពន្ធខ្លាំងពេល ៤ ឆ្នាំចុងក្រោយ បានស្នាដៃរឿងប្រលោមលោកប្រមាណ ២០ រឿង នោះ អ្នកនិពន្ធស្ត្រីវ័យក្មេងកញ្ញា គង់ ច័ន្ទវ៉ាន់ណេង ក៏មានមហិច្ឆតាធំមួយចង់ក្លាយជាអ្នកនិពន្ធម្នាក់ទាំងផ្នែករឿងប្រលោមលោក និងរឿងសម្រាប់ផលិតខ្សែភាពយន្ត។
នាពេលបច្ចុប្បន្ននេះ ការតែងនិពន្ធនៅកម្ពុជា ហាក់មានភាពរីកចម្រើនគួរឲ្យកត់សម្គាល់ព្រោះតែមួយរយៈចុងក្រោយនេះ ឃើញអ្នកនិពន្ធខ្មែរម្នាក់ៗហាក់មានការខ្នះខ្នែង និងខំប្រឹងតែងនិពន្ធស្នាដៃថ្មីៗ និងបោះពុម្ពជាសៀវភៅ។
ជាក់ស្តែងវិស័យនិពន្ធនេះក៏មានស្រ្តីខ្មែរផុសផុលខ្លាំងដែរ បង្កើតជាវណ្ណកម្មខ្លួន តួយ៉ាងកញ្ញា គង់ ច័ន្ទវ៉ា់ន់ណេង ដែលប្រិយមិត្តច្រើនស្គាល់ក្នុងស្នាដៃប្រលោមលោករបស់កញ្ញាជាមួយនឹងឈ្មោះអ្នកនិពន្ធ សេន គឹមណេង នោះឯង។
អ្នកនិពន្ធប្រលោមលោកវ័យ ២៣ ឆ្នាំ កញ្ញា គង់ ច័ន្ទវ៉ាន់ណេង ដែលមានស្រុកកំណើតនៅក្នុងស្រុកកៀនស្វាយ ខេត្តកណ្ដាល មានឪពុកឈ្មោះ គង់ សំរេច ជាអតីតគ្រូបង្រៀន (បច្ចុប្បន្នចូលនិវត្តន៍) និងម្ដាយឈ្មោះ ធូ គីម ជាមេផ្ទះ មានបងប្អូនបង្កើត ៥ នាក់ (ស្រី ៤ ប្រុស ១) ដោយកញ្ញា គឺជាកូនពៅក្នុងគ្រួសារ។
ដោយសារនៅគិតថា ខ្លួនមិនទាន់មានលក្ខណសម្បត្តិគ្រប់គ្រាន់នៅឡើយក្នុងការសម្រេចក្តីប្រាថ្នាថ្ងៃអនាគត នៅលើវិស័យនិពន្ធរឿងប្រលោមលោក និងរឿងសម្រាប់ថតខ្សែភាពយន្ត គួបផ្សំដែលរូបខ្លួនមិនដែលធ្លាប់ឆ្លងកាត់សិក្សាជំនាញនិពន្ធរឿងជាផ្លូវការពីសាលា ឬស្ថាប័នណាមួយនោះ ទើបស្រីស្រស់ ដែលប្រកបអាជីពជាអ្នកនិពន្ធប្រលោមលោករូបនេះ នៅរង់ចាំមើលឱកាសល្អ សម្រាប់បំពេញជំនាញឲ្យគ្រប់គ្រាន់សិន ទើបចាប់ផ្តើមប្រឡូកវិស័យនេះឲ្យខ្លាំងក្លា។
កញ្ញាបានបញ្ជាក់ដោយក្តីរំពឹងសម្រាប់ថ្ងៃមុខដែរថា៖ «ចំពោះក្តីបំណងទៅថ្ងៃមុខនោះ តែងតែមានសម្រាប់អ្នកនិពន្ធគ្រប់ជំនាន់ទាំងអស់ហ្នឹង មិនមែនតែរូបនាងខ្ញុំទេ។ ដូចរូបខ្ញុំ គឺចង់ក្លាយជាអុ្នកនិពន្ធម្នាក់ទាំងផ្នែករឿងប្រលោមលោក និងរឿងសម្រាប់ផលិតខ្សែភាពយន្ត គឺគ្រាន់តែខ្ញុំរង់ចាំឱកាសល្អ និងចាំបន្ថែមជំនាញនេះឲ្យបានគ្រប់លក្ខណៈគ្រប់គ្រាន់សិន»។
ស្នាដៃប្រលោមលោកជិត ២០ ចំណងជើងរបស់អ្នកនិពន្ធរូបនេះ រួមមានដូចជារឿង «គ្មានថ្ងៃឈប់ស្រឡាញ់បង» រឿង «បុគ្គលជោគជ័យ» (បោះពុម្ពឆ្នាំ ២០១៨ ជាមួយសមូហកម្មមន្តទឹកខ្មៅនៅក្នុងសៀវភៅព្រៃរំដួល) រឿង «បេះដូងមួយនេះ» រឿង«មាសជ្រលក់» រឿង «ការផ្ដល់សេវាសាធារណៈល្អជួយប្រឆាំងនឹងអំពើពុករលួយ (ជយលាភីលេខ ៣ នៅអង្គភាពប្រឆាំងអំពើពុករលួយ) និងមានស្នាដៃផ្សេងៗទៀត៕