ភ្នំពេញ៖ បង្កការភ្ញាក់ផ្អើលពីបណ្តាញសង្គមខ្លាំង ថ្មីៗនេះ ស្រាប់តែលោក Bmo Trapz ជាអ្នកនិពន្ធទំនុកច្រៀងដ៏ល្បី និងតារាចម្រៀងប្រុសរូបសង្ហាកូនកាត់ខ្មែរ-ចិន បង្ហើបរឿងខ្លួនត្រៀមនឹងនិពន្ធបទចម្រៀងថ្មីថា «Covid-19»។
ដោយសារតែប្រុសរូបសង្ហាជាអ្នកនិពន្ធទំនុកច្រៀងដ៏ល្បីប្រចាំផលិតកម្មសាន់ដេ លោក Bmo Trapz ដែលបាននិពន្ធបទចម្រៀងជាច្រើនឲ្យតារាចម្រៀងស្រីសាច់ខ្ចីញេញកញ្ញា យូរី ច្រៀង ហើយផ្ទុះការគាំទ្រខ្លាំងមានដូចជាបទ «ចាក់ទឹកដូង» និងបទ «រាំទយ» ជាដើមនោះ ក៏ធ្វើឲ្យមហាជនចាប់អារម្មណ៍នឹងសាររបស់លោក តែម្តងដែលបានព្រលយថា នឹងមានបទ «Covid-19» ចេញឆាប់ៗ ខណៈបច្ចុប្បន្នកូវីដ ១៩ នេះកំពុងតែធ្វើឲ្យមនុស្សក្នុងសកលលោកមានការខ្លាចរអាចិត្ត និងភិតភ័យយ៉ាងខ្លាំងនឹងឥទ្ធិពលនៃការរាតត្បាតរបស់វានោះ។
តែជាការពិតទៅនោះ មិនមានការតាក់តែងនិពន្ធបទចម្រៀងមានចំណងជើងថា «Covid-19» នោះឡើយ ដោយកវីរូបសង្ហាជាកូនកាត់ខ្មែរ-ចិន មានឈ្មោះថា លោក Bmo Trapz ខណៈលោកក៏ជាតារាចម្រៀងប្រុសមានឈ្មោះបោះសំឡេងមួយរូបនៅលើទ្រនំសាន់ដេ ហើយក៏ធ្លាប់លេចធ្លាយជាពាក្យចចាមអារ៉ាមថា រូបលោក និងកញ្ញា យូរី មានសម្ព័ន្ធស្នេហ៍នឹងគ្នាទៀតផង។
តែលោក Bmo Trapz បានបញ្ជាក់ប្រាប់ឲ្យភ្នំពេញប៉ុស្តិ៍បានដឹងថា៖ «អូ! តាមពិតទៅ មិនមានបទនោះទេបង! ហើយសារក្នុងហ្វេសប៊ុកនោះ គ្រាន់តែជាការនិយាយលេងរវាងខ្ញុំបាទ ជាមួយនឹងអ្នកគាំទ្រប៉ុណ្ណោះ ព្រោះថានាមួយរយៈពេលចុងក្រោយនេះ ជាពិសេសជិតចូលឆ្នាំថ្មីប្រពៃណីខ្មែរខាងមុខនឹងជិតចូលមកដល់ គឺពួកគាត់ឆ្ងល់នឹងខ្ញុំថាហេតុអ្វីបានជាមិនមានបទថ្មីចេញអ៊ីចឹង?។ ដូច្នេះ ខ្ញុំក៏ឆ្លើយលេងនឹងពួកគាត់ថា នឹងមានបទ «Covid-19» ដោយសារតែបច្ចុប្បន្នភាពនេះ ពិភពលោកទាំងមូលកំពុងតែខ្វល់ខ្វាយរឿងជំងឺនេះ»។
លោក Bmo Trapz បានបន្តថា៖ «តាមពិតទៅនោះ ខ្ញុំក៏មានបទថ្មីជាចង្វាក់ញាក់ ដើម្បីត្រៀមចេញសម្រាប់ចេញបំពេអារម្មណ៍ដល់ពួកគាត់ក្នុងឱកាសចូលឆ្នាំដែរ តែដោយសារប្រទេសយើង ក៏កំពុងតែមានបញ្ហាពីរឿងមេរោគ «Covid-19» ដែរទើបសម្រេចចិត្តមិនទាន់បញ្ចេញសិន។ ចាំមើលស្ថានភាពឲ្យជាក់ស្តែងសិន ទើបបញ្ចេញបទនេះ»៕