.jpg)
ក្រៅពីការងារជាអ្នកនិពន្ធ និងបកប្រែប្រលោមលោក សំរឹទ្ធ ក៏ជាគ្រូភាសាអង់គ្លេស។ រូបថត ហ្វេសប៊ុក
ភ្នំពេញៈ ប្រលោមលោកស្នេហាមានគំនូរដ៏ទាក់ទាញអមដោយអត្ថបទសន្ទនា ដែលបកប្រែចេញពីភាសាបរទេសបានត្រូវបានផ្សព្វផ្សាយក្នុងបណ្តាញសង្គម ដោយទទួលបានការចាប់អារម្មណ៍ជាច្រើន ជាពិសេសប្រិយមិត្តជានារី។
ឆ្លងតាមបទពិសោធជាច្រើនឆ្នាំក្នុងការនិពន្ធប្រលោមលោកបែបព្រឺព្រួច (ខ្មោច) សម្រាប់បោះពុម្ពលក់ក្នុង ១ ក្បាលតម្លៃ ១២០០៛ តាំងពីរៀនថ្នាក់ទី ១០ នោះ លោក ឡុង សំរឹទ្ធ បានសម្រាកពីការងារជាអ្នកនិពន្ធរឿងខ្មោចខ្លីៗមកបកប្រែប្រលោមលោកដែលជាការពេញនិយមរបស់យុវវ័យ ដើម្បីយកទៅផ្សព្វផ្សាយនៅក្នុងបណ្តាញសង្គមហ្វេសប៊ុក។
យុវជនវ័យ ២៣ ឆ្នាំបានប្រាប់មូលហេតុដែលលោកផ្អាកតែងនិពន្ធរឿងខ្លីមកបកប្រែប្រលោមលោកឲ្យភ្នំពេញ-ប៉ុស្តិ៍ ដឹងថា៖ «ដោយសារតែខ្ញុំសង្កេតមើលថាសម័យនេះយុវវ័យគាត់ចូលចិត្តមើលប្រលោមលោកច្រើន ប៉ុន្តែភាគច្រើនគឺមើលនៅក្នុងហ្វេសប៊ុកដែលជាប្រលោមលោកមានរូបភាពវាមានភាពទាក់ទាញជាងការអានសៀវភៅ។ ប៉ុន្តែដំបូងឡើយខ្ញុំបកប្រែរឿងខ្មោចទេ តែដូចដឹងស្រាប់ហើយសម័យនេះគេចូលចិត្តមើលរឿងស្នេហាច្រើនជាង អ៊ីចឹងខ្ញុំក៏សាកល្បងបកប្រែរឿងបែបរ៉ូមែនទិក ប៉ុន្តែលទ្ធផលគឺមានការគាំទ្រច្រើនជាងរឿងខ្មោចពិតមែន»។
លោកប្រាថ្នាចង់មានផ្ទះបោះពុម្ពសៀវភៅខ្លួនឯង។ រូបថត ហ្វេសប៊ុក
មុននឹងយករឿងមកបកប្រែ អ្នកនិពន្ធបញ្ចប់ការសិក្សាផ្នែកអក្សរសាស្ត្រអង់គ្លេស លោក ឡុង សំរឹទ្ធ ត្រូវអានប្រលោមលោកនោះឲ្យចប់សិន ហើយរិះរកមើលថា តើរឿងនោះមានតម្លៃអប់រំអីខ្លះ?។
លោក ឡុង សំរឹទ្ធ បានលើកឡើងថា៖ «បើមានគំនិតអប់រំ ទើបខ្ញុំបកប្រែហើយផូស្តឲ្យអ្នកគាំទ្ររបស់ខ្ញុំមើល។ ចំពោះប្រលោមលោកបែបរ៉ូមែនទិក ខ្ញុំទើបតែបកប្រែបាន ២ រឿងនោះទេរឿងទី ១ គឺ «រៀបការជាមួយភរិយាជាទីស្រលាញ់» ដែលបានបញ្ចប់ហើយ ចំណែករឿងទី ២ «កិច្ចសន្យាស្នេហ៍» មិនទាន់បញ្ចប់នោះទេ។ រឿងនេះដែរគឺបានបង្ហាញពីភាពតស៊ូរបស់តួឯកស្រីដែលខិតខំធ្វើការដើម្បីចិញ្ចឹមគ្រួសារសងគុណដល់ឪពុកម្តាយចិញ្ចឹម ទោះបីជាមិនមែនជាឪពុកម្តាយបង្កើតក៏ដោយ»។
មានកំណើតក្នុងរាជធានីភ្នំពេញលោក ឡុង សំរឹទ្ធ ក៏ជាគ្រូបង្រៀនភាសាអង់គ្លេសមួយរូបផងដែរ បន្ថែមពីលើការងារជាអ្នកនិពន្ធរឿងខ្លី និងបកប្រែប្រលោមដែលលោកអះអាងថាមិនទទួលបានប្រាក់ចំណូលអ្វីនោះទេ ក្រៅពីជួយបង្កើនចំណេះដឹងផ្នែកភាសាអង់គ្លេសរបស់លោក។
អ្នកនិពន្ធ និងអ្នកបកប្រែរូបនេះបានលើកឡើងទៀតថា៖ «ចំពោះអ្នកចូលចិត្តមើលប្រលោមលោកមិនបាច់ចំណាយលុយទៅទិញសៀវភៅយកមកអាន និងផ្តល់មកវិញនូវការបំបាត់ភាពស្ត្រេស និងផ្តល់គំនិតអប់រំតាមរយៈសាច់រឿងផងដែរ ហើយមួយទៀតខ្ញុំចង់ឲ្យផេចរបស់ខ្ញុំមានគេស្គាល់ច្រើន ដើម្បីថ្ងៃក្រោយទៅបើវាកាន់តែល្បីទៅខ្ញុំអាចលក់រឿងដែលខ្ញុំនិពន្ធខ្លួនឯងបានដោយការបោះពុម្ពជាសៀវភៅ»។
លោក ឡុង សំរឹទ្ធ ក៏បានបង្ហើបពីបំណងប្រាថ្នាថ្ងៃអនាគតផងដែរថា៖ «ខ្ញុំបានមានគម្រោងថាចង់មានផ្ទះមួយសម្រាប់បោះពុម្ពសៀវភៅខ្លួនឯងដោយសារតែបើយកទៅបោះពុម្ពកន្លែងគេវាមានតម្លៃថ្លៃហើយបើតិចតួចគេមិនបោះពុម្ពឲ្យទេ ទោះបីជាគេបោះពុម្ពឲ្យក៏តម្លៃវាគុណនឹង ២ ឬ ៣ ដែរ។ សព្វថ្ងៃនេះខ្ញុំក៏មានរឿងភាគប្រភេទស្នេហាចំនួន ២ រឿងដូចគ្នាដែលមិនទាន់បានបោះពុម្ព ហើយថ្ងៃខាងមុខខ្ញុំក៏មានគម្រោងថាចង់បើកសាលាបង្រៀនដោយខ្លួនឯងផ្ទាល់ផងដែរ»៕
