.jpg)
ក្រៅពីធ្វើការបញ្ចុះសព ទាំងបារម្ភពីសុវត្ថិភាពខ្លួនឯង ក្រុមជីកផ្នូរក៏សម្គាល់ពីការខ្លាចរអារបស់អ្នកជិតខាងមកលើខ្លួនដែរ។ រូបថត AFP
ក្រុងហ្សាការតា : អ្នកជីកផ្នូរ ជូណៃឌីហាគីម ស្រែកថា «ប្រញាប់ឡើង» ខណៈលោកតឿនក្រុមការងារពាក់ឈុតការពារក្នុងសកម្មភាពដ៏មមាញឹក ដើម្បីជីកកប់សពជនរងគ្រោះពីជំងឺកូវីដ-១៩ នៅទីស្មសាន្ដ ឯក្រុងហ្សាការតា។
ក្រុមការងារបញ្ចុះសពត្រូវជីកប្ដូររណ្ដៅសពប្រញាប់ប្រញាល់ ក្នុងបំណងឲ្យកិច្ចការរួចរាល់ត្រឹមរយៈពេលតិចជាង ១០ នាទី ដើម្បីកាត់បន្ថយហានិភ័យការឆ្លងជំងឺពីសពចំពោះពួកគេ។
បុរសអាយុ ៤២ ឆ្នាំ លោក ហាគីម ជាឪពុកកូន ៤ នាក់បាននិយាយថា៖ «អ្វីដែលគួរឲ្យព្រួយបារម្ភបំផុតនោះគឺនៅពេលយើងទម្លាក់មឈូសចុះ ពីព្រោះយើងត្រូវប៉ះពាល់ផ្ទាល់។ យើងមានអារម្មណ៍ធូរស្បើយបន្ដិច នៅពេលបញ្ចុះរួចភ្លាម»។
សាច់ញាតិសព បានត្រឹមតែធ្វើការបួងសួងមួយភ្លែត រួចក៏ត្រូវបានស្នើឲ្យចាកចេញពីកន្លែងបញ្ចុះសព។ រូបថត AFP
អ្នកជីកផ្នូរប្រមាណ ៥០ នាក់នៅទីស្មសាន្ដ Pondok Ranggon ជាកន្លែងបញ្ចុះសពអ្នកជំងឺកូវីដ-១៩ ក្នុងចំណោម ២ ទីតាំង នៅទីក្រុងរបស់ឥណ្ឌូនេស៊ី កំពុងធ្វើការរហូតដល់ ១៥ ម៉ោងក្នុងមួយថ្ងៃ និងពេញ ៧ ថ្ងៃក្នុងមួយសប្ដាហ៍ ជាថ្នូរនឹងប្រាក់ខែ ៤,២ លានរូព្យា (២៩០ ដុល្លារ)។
ពួកគេជីកផ្នូរយ៉ាងតិច ២០ រណ្ដៅថ្មីៗក្នុងមួយថ្ងៃ ដោយដោតស្លាកសញ្ញាពណ៌សសម្គាល់ សម្រាប់សរសេរឈ្មោះ ថ្ងៃកំណើត និងថ្ងៃមរណៈរបស់សពនីមួយៗ។
លោក ហាគីម បានបន្ដថា៖ «ឡានពេទ្យដឹកសពមកទីនេះបន្ដកន្ទុយគ្នា»។
ក្រុមការងារពុះពារនឹងកម្ដៅថ្ងៃក្ដៅខ្លាំង ដោយឮសំឡេងយំសោកក្ដុកក្ដួលរបស់សាច់ញាតិសពនៅក្បែរត្រចៀកផងដែរ។
ពួកគេជីកផ្នូរយ៉ាងតិច ២០ រណ្ដៅថ្មីៗក្នុងមួយថ្ងៃ ជាមួយស្លាកសម្គាល់សម្រាប់សរសេរឈ្មោះ ថ្ងៃកំណើត និងថ្ងៃមរណៈនៃសព។ រូបថត AFP
ក្រុមគ្រួសារសពទាំងនោះមិនត្រូវបានអនុញ្ញាតឲ្យនៅអែនអនយូរ ដោយទុកឱកាសឲ្យតែបួងសួងជូនមនុស្សជាទីស្រឡាញ់ចុងក្រោយមួយភ្លែតប៉ុណ្ណោះ។
ប្រទេសប្រជុំកោះនៅអាស៊ីអាគ្នេយ៍ ដែលមានប្រជាជនសរុបជាង ២៦០ លាននាក់នេះមានតួលេខអ្នកស្លាប់ ១៣៧២ នាក់ ហើយឥណ្ឌូនេស៊ីជាប្រទេសមួយដែលមានសមត្ថភាពតេស្ដវិរុសកូរ៉ូណាទាបបំផុត។
មន្ដ្រីរដ្ឋាភិបាលបានទទួលស្គាល់ថាទិន្នន័យពិតប្រាកដមានចំនួនខ្ពស់ជាងនេះ។
អ្នកបញ្ចុះសព ដែលធ្វើការ ១៥ ម៉ោងក្នុងមួយថ្ងៃ ជាថ្នូរនឹងប្រាក់ខែ ៤,២ លានរូព្យា (២៩០ ដុល្លារ)។ រូបថត AFP
យ៉ាងហោចណាស់ សព ២១០៧ នាក់ត្រូវបានបញ្ចុះក្រោមពិធីការសុវត្ថិភាពកូវីដ-១៩ ក្នុងតំបន់ផ្ទុះមេរោគក្រុងហ្សាការតា ស្ទើរតែលើសពីដងនៃរបាយការណ៍ទូទាំងប្រទេស។
ទោះបីជាមានប្រុងប្រយ័ត្នយ៉ាងណាមិញអ្នកជីកផ្នូរ ហាគីម បាននិយាយថា អ្នកជិតខាងរបស់លោកនាំគ្នាដើរគេចៗពីរូបលោក តាំងពីករណីដំបូងផ្ទុះឡើងក្នុងខែមីនា។
លោកនិយាយថា៖ «ថ្វីដ្បិតតែពួកគេមិននិយាយចំហ តែខ្ញុំអាចដឹងថាពួកគេព្យាយាមរក្សាគម្លាតឲ្យឆ្ងាយ មិនខុសអីពីពួកគេខ្លាចខ្ញុំនោះទេ»៕ AFP/HR
ក្រុមការងារបញ្ចុះសពត្រូវជីកប្ដូររណ្ដៅសពប្រញាប់ប្រញាល់ ក្នុងបំណងឲ្យកិច្ចការរួចរាល់ត្រឹមរយៈពេលតិចជាង ១០ នាទី។ រូបថត AFP
