.jpg)
ចេកបិទស្គុតលើជញ្ជាំងជាស្នាដៃសិល្បៈសិល្បករអុីតាលីតម្លៃ ១២ ម៉ឺនដុល្លារ។ AFP
ក្រុងញូវយ៉ក៖ សិល្បករផ្នែកសម្ដែង ដាវីដ ដាធូណា រង់ចាំ ២ ម៉ោង រហូតដល់រមូលពោះឃ្លានខ្លាំង មុនដាច់ចិត្ដទំពារចេកសិល្បៈដ៏មានតម្លៃនៅក្រុងម៉ៃអាមី ដែលលោកបានពន្យល់ទាំងអស់សំណើចកាលពីថ្ងៃចន្ទ ក្រោយពីវិលទៅកាន់ក្រុងញូវយ៉កវិញ។
លោកនិយាយក្នុងសន្និសីទសារព័ត៌មានថា៖ «វាជាលើកទី ១ ដែលក្នុងនាមជាអ្នកសិល្បៈហ៊ានញ៉ាំស្នាដៃសិល្បៈរបស់អ្នកដទៃ»។
លោក ដាធូណា មានដើមកំណើតនៅទីក្រុងប៊ីលីស៊ី ដែលមកតាំងលំនៅក្នុងក្រុងញូវយ៉ក ២២ ឆ្នាំ បានបង្កការភ្ញាក់ផ្អើលនៅពិព័រណ៍សិល្បៈទំនើប Art Basel Florida កាលពីថ្ងៃសៅរ៍ ពេលលោកទទួលទានចេកពិតមួយផ្លែដែលបិទភ្ជាប់លើជញ្ជាំង ជាផ្នែកមួយនៃស្នាដៃសិល្បៈរបស់សិល្បករអ៊ីតាលី ម៉ូរីហ្ស៊ីយ៉ូ កាតាឡាន។ ស្នាដៃសិល្បៈនោះលក់ក្នុងតម្លៃ ១២ ម៉ឺនដុល្លារ។
លោក ដាធូណា ថា៖ «ចំពោះបញ្ហារឿងតម្លៃ វាមានរសជាតិឆ្ងាញ់ដូចចេកធម្មតា»។ លោកបន្ថែមថា លោកមិនចង់បានល្បីនោះទេ។ តែលោកហួសចិត្ដ និងបានបង្ហោះវីដេអូពីទង្វើរបស់ខ្លួនរហូតដល់មានសារចំនួន ៥ ម៉ឺន លើអ៊ីនស្ដាក្រាម ដែលភាគច្រើនសុទ្ធតែសាទរចំពោះលោក។
លោក ដាវីដ ដាធូណា ជាសិល្បករដែលទទួលទានចេកសិល្បៈលើជញ្ជាំង។ AFP
សិល្បករមកពីចចចៀ លោក ដាធូណា បានកោតសរសើរ កាតាឡាន ដែលទំនងបានល្បីដោយសារស្នាដៃ «អាមេរិក» ជាបង្គន់មួយផលិតឡើងពីមាស ១៨ ការ៉ាត់។ លោកបន្ដថា៖ «គំនិតរបស់ កាតាឡាន ពិតជាល្អគ្មាន ២។ ប៉ុន្ដែខ្ញុំក៏ចូលចិត្ដនូវស្នាដៃរបស់ខ្ញុំផងដែរ»។
កាលពីខែមិថុនា ឆ្នាំ ២០១៧ មិនយូរប៉ុន្មាន លោក ដូណាល់ ត្រាំ ប្រកាសដកសហរដ្ឋអាមេរិកចេញពីកិច្ចព្រមព្រៀងអាកាសធាតុទីក្រុងប៉ារីស លោក ដាធូណា បានបង្កើតស្នាដៃមួយដោយប្រើឈ្មោះលោក ត្រាំ ក្នុងទឹកកកស្ងួតនៅលើដងវិថីម៉ាន់ហាតាន់។
សិល្បៈដំឡើង ឈ្មោះ «this too shall pass» បានរលាយបន្ដិចម្ដង នៅពេលអ្នកក្រុងញូវយ៉កឈរមើលស្នាដៃសិល្បៈនេះ។
លោក ដាធូណា បាននិយាយថា លោកគ្រោងបង្កើតភាពភ្ញាក់ផ្អើលនៅ Super Bowl ជាពានបាល់ទាត់ជាតិប្រចាំឆ្នាំនៅថ្ងៃទី ២ ខែកុម្ភៈ ក្នុងក្រុងម៉ៃអាមីផងដែរ៕ AFP/HR
