ក្រុងម៉ិកស៊ីកូ៖ បុរាណវិទូបានថ្លែងកាលពីសប្ដាហ៍មុនថា ពួកគេបានប្រទះឃើញឆ្អឹងដំរី mammoth រហូតដល់ ៨០០ បំណែក ពីដំរីយក្សយ៉ាងហោចណាស់ ១៤ ក្បាល នៅភាគកណ្ដាលប្រទេស ម៉ិកស៊ិក។
ពួកគេជឿថា របកគំហើញពីការធ្វើកំណាយស្រាវជ្រាវនេះ គឺជាករណីដ៏ចម្លែក ដោយពួកគេសន្និដ្ឋានថា ដំរីយក្សលើកនេះជាប់អន្ទាក់មនុស្សកាលពីជាង ១៤ ០០០ ឆ្នាំមុន។ នេះបើយោងតាមវិទ្យាស្ថានជាតិស្រាវជ្រាវនរវិទ្យា និងប្រវត្តិសាស្ត្រ នៃប្រទេស ម៉ិកស៊ិក (INAH)។
វិទ្យាស្ថានបានធ្វើសេចក្ដីថ្លែងការណ៍យ៉ាងដូច្នេះថា៖ «នេះគឺជាការរកឃើញដ៏ធំធេងមួយក្នុងប្រវត្តិសាស្ត្រមនុស្ស»។
ឆ្អឹងដំរីយក្សមានភ្លុកវែង Anthropology ត្រូវបានរកឃើញនៅ Tultepec ក្បែរតំបន់ដែលកំពុងមានសកម្មភាពសាងសង់អាកាសយានដ្ឋានថ្មីសម្រាប់ទីក្រុងម៉ិកស៊ីកូ។
ការរកឃើញនេះ បាននាំឲ្យអ្នកជំនាញទាញការសន្និដ្ឋានថា ពួកគេបានប្រទះឃើញអន្ទាក់ចាប់សត្វដំរីយក្សដំបូងបំផុតក្នុងលោកផងដែរ។
អ្នកជំនាញបុរាណវិទ្យា ល្វីស ខ័រដូបា បានថ្លែងប្រាប់អ្នកសារព័ត៌មានថា៖ «ដំរីភ្លុកវែង mammoth មានកំណើតនៅទឹកដីនេះរាប់សិបពាន់ឆ្នាំមកហើយ។ ពួកវាបានកើតកូនចៅ ខ្លះរស់រានបានអាយុវែង និងខ្លះត្រូវបានប្រមាញ់។ ពួកវារស់រានក្នុងយុគសម័យដំណាលនឹងពូជសត្វសេះ និងអូដ្ឋ ជាដើម»។
អ្នកស្រាវជ្រាវបានលើកឡើងថា យ៉ាងហោចណាស់ក៏មានដំរីយក្ស ៥ ហ្វូងធំៗ នៅម្ដុំបរិវេណកំណាយថ្មីថ្មោងនេះផងដែរ។
កាលពីទសវត្សរ៍ឆ្នាំ ១៩៧០ កម្មករដែលកំពុងសាងសង់ផ្លូវក្រោមដីនៅទីក្រុងម៉ិកស៊ីកូ ធ្លាប់បានប្រទះឃើញឆ្អឹងដំរីយក្ស ខណៈកំពុងជីកដីនៅភាគខាងជើងក្រុង៕ AFP