កណ្តាល៖ កញ្ចប់ ថង់ ទុយោចម្រុះពណ៌ និងសំរាមប្លាស្ទិកនានា ត្រូវបានសហគ្រាសមួយនៅខេត្តកណ្ដាល ប្រមូលមកច្នៃផលិតជាឥដ្ឋអេកូ ដើម្បីជួយសម្អាតបរិស្ថាន និងកាត់បន្ថយថវិកាចំណាយលើការសង់ផ្ទះរបស់ពលដ្ឋដែលមានចំណូលទាប និងមធ្យម។
ម្ចាស់សហគ្រាសសង្គមខ្មែរ នៅម្តុំព្រែកហូរ ខេត្តកណ្តាល លោក សុខ ធី បានចំណាយពេលទៅសិក្សានៅប្រទេសថៃ ឥណ្ឌា និងម៉ាឡេស៊ី ផ្សែផ្សំនឹងការសិក្សាអនឡាញជាមួយអ្នកជំនាញជនជាតិចិន និងហ្វីលីពីន មុននឹងច្របាច់បញ្ចូលបច្ចេកទេសផលិតឥដ្ឋរបស់ប្រទេសទាំង ៥ មកច្នៃប្រឌិតផលិតឥដ្ឋអេកូ ចេញពីសំរាមប្លាស្ទិក ដែលប្រមូលមកពីសាលារៀន និងសហគមន៍។
លោក សុខ ធី បានប្រាប់ឲ្យដឹងថា៖ «យើងសហការជាមួយនាយកសាលារៀន ឲ្យបង្រៀនកូនសិស្សអំពីការបែងចែក និងញែកសំរាមប្លាស្ទិកទុកដាក់ឲ្យត្រឹមត្រូវ ដូចជា កញ្ចប់នំ កញ្ចប់មី ថង់ ទុយោ ស្លាបព្រាជ័រ កំប៉ុងទឹកជ័រ និងរបស់ធ្វើពីជ័រច្រើនមុខទៀត។ បន្ទាប់មក យើងនឹងប្រមូលសំរាមទាំងនោះយកមកសម្អាត និងហាលវាឲ្យស្ងួត រួចយកមកកិនក្នុងម៉ាស៊ីនកិនឲ្យម៉ដ្ឋ យើងយកមកលាយជាមួយដី ខ្សាច់ ស៊ីម៉ងត៍ និងកែវ និងសារធាតុផ្សំផ្សេងទៀត រួចយកមកកៀបពុម្ពក្នុងម៉ាស៊ីនពុម្ពឥដ្ឋ ដើម្បីបង្កើតឥដ្ឋអេកូ»។
ឥដ្ឋអេកូមានកម្រាស់ ២ ជាន់ប្រវែង ១៥ សង់ទីម៉ែត្រ កម្ពស់ ១០ សង់ទីម៉ែត្រ និងបណ្តោយ ៣០ សង់ទីម៉ែត្រ ដែលជាខ្នាតធំ និងវែងជាងឥដ្ឋប្រហោងធម្មតា។
យោងតាមម្ចាស់សហគ្រាសលោក សុខ ធី ឥដ្ឋអេកូ មានប្រហោង ២ (ញី និងឈ្មោល)។ ប្រហោងខាងលើមានពក ២ និងប្រហោងខាងក្រោមមានខូង ២ ដែលផ្ដល់ភាពងាយស្រួលក្នុងការរៀបរបង និងសួនច្បារ ដោយគ្រាន់តែបន្តុបឥដ្ឋលើគ្នាមិនបាច់បូកស៊ីម៉ងត៍។
ការបន្តុបឥដ្ឋធ្វើជារបងនេះ ម្ចាស់ផ្ទះអាចធ្វើបានដោយខ្លួនឯង ហើយវាក៏ងាយស្រួលក្នុងការរុះរើ ឬលើកផ្លាស់ប្តូរទីតាំងនៅថ្ងៃក្រោយ។
ដោយឡែក ការសាងសង់ផ្ទះ លោក សុខ ធី ស្នើឲ្យម្ចាស់ផ្ទះជួលជាងខ្លះ ព្រោះការសង់ផ្ទះទាមទារឲ្យមានការបូកស៊ីម៉ងត៍តិចតួច។ ប្រសិនបើជាងសំណង់មិនមានបទពិសោធរៀបឥដ្ឋប្រភេទនេះ លោក សុខ ធី នឹងបង្រៀនពីការរៀបដល់ពួកគេដោយឥតគិតថ្លៃ។
នៅក្នុងឥដ្ឋអេកូ មានរន្ធតូចសម្រាប់តភ្ជាប់ខ្សែភ្លើងរួចជាស្រេច ងាយស្រួលមិនចាំបាច់ធ្វើការចោះជញ្ជាំង។ វាក៏មានរន្ធអ៊ីសូឡង់ ជួយទប់កម្តៅពីខាងក្រៅចូលក្នុងផ្ទះផងដែរ។
ទោះបីយ៉ាងណា ការផលិតឥដ្ឋអេកូ ក៏ប្រឈមការកកស្ទះដោយសារតែខ្វះឧបករណ៍ផងដែរ។
ម្ចាស់សហគ្រាសសង្គម វ័យក្បែរ ៤០ ឆ្នាំរូបនេះ បានប្រាប់ ភ្នំពេញ ប៉ុស្តិ៍ ទាំងក្រៀមក្រំថា៖ «បច្ចុប្បន្ន យើងមិនអាចផលិតឥដ្ឋច្រើនទៅតាមតម្រូវការរបស់អតិថិជនបានទេ ព្រោះយើងមានម៉ាស៊ីនផលិតតែ ២ គឺម៉ាស៊ីនកិនប្លាស្ទិក និងម៉ាស៊ីនកៀបពុម្ព តែយើងនៅខ្វះម៉ាស៊ីន ២ ទៀត គឺម៉ាស៊ីនវាយបំបែកដី និងម៉ាស៊ីនក្រឡុក»។
ម៉ាស៊ីនផលិតទាំង ២ របស់លោក និងឥដ្ឋអេកូជាផលិតផលសម្រេច សុទ្ធតែបានឆ្លងកាត់ការពិសោធត្រឹមត្រូវតាមស្តង់ដាបច្ចេកទេស នៅវិទ្យាស្ថានបច្ចេកវិទ្យាកម្ពុជា។
ទោះជាយ៉ាងណាក្ដី សន្ទុះផលិតកម្មនៅមិនទាន់រលូននៅឡើយ ដោយលោក សុខ ធី លើកឡើងទៀតថា៖ «រាល់ថ្ងៃនេះយើងប្រើចប ប៉ែល កាយលាយវត្ថុធាតុដើមបញ្ចូលគ្នា ហើយ យើងយកសំណាញ់ កញ្ច្រែង មករែងយកដីម៉ដ្ឋ ព្រោះយើងគ្មានម៉ាស៊ីន»។
«យើងមានតែបច្ចេកទេស តែយើងខ្វះដើមទុន» នេះជាសម្ដីដែលលោក សុខ ធី បានពោលក្នុងពេលសន្ទនាជាមួយ ភ្នំពេញ ប៉ុស្តិ៍។
លោក សុខ ធី ក៏នៅតែទទូចសូមឲ្យមានការជួយដល់ការផលិតរបស់លោក ព្រោះសហគ្រាសរបស់លោកក៏បានជួយបណ្តុះបណ្តាលប្រជាជនពីបញ្ហាសំរាម ជួយសម្អាតបរិស្ថាន និងផ្តល់ឱកាសការងារដល់ប្រជាជនក្នុងតំបន់ជាច្រើននាក់ផងដែរ។
បច្ចុប្បន្នឥដ្ឋអេកូ មិនទាន់ត្រូវបានកំណត់តម្លៃជាក់លាក់នៅលើទីផ្សារទេ ប៉ុន្តែលោក សុខ ធី បានប្រាប់ថា វាមានតម្លៃប្រហែល ៨,៥ ដុល្លារ ក្នុង ១ ម៉ែត្រការ៉េ ដែលស្មើនឹងចំនួនប្រហែល ៣៣ ដុំ។
ពាក់ព័ន្ធជាមួយតម្លៃ លោកបានពន្យល់ថា៖ «បើគិតពីតម្លៃក្នុង ១ ដុំ ឥដ្ឋអេកូអាចមានតម្លៃថ្លៃជាងឥដ្ឋធម្មតា ប៉ុន្តែការយកឥដ្ឋអេកូ ទៅរៀបរបង ឬសង់ផ្ទះ គិតទៅចំណេញបានច្រើនជាង ព្រោះឥដ្ឋរបស់យើងមានប្រវែង វែង ប្រើស៊ីម៉ងត៍តិចក្នុងការរៀប ហើយតម្រូវការកម្លាំងពលកម្មជាងតិច»។
លោកបានធ្វើការប្រៀបធៀបទៀតថា៖ «ការប្រើប្រាស់ឥដ្ឋអេកូរៀបផ្ទះ អាចចំណេញប្រហែល ៣ ដង បើប្រៀបជាមួយនឹងឥដ្ឋធម្មតា។ ឧបមាថា រៀបផ្ទះ ១ ប្រើឥដ្ឋធម្មតាចំណាយអស់ ១ ម៉ឺនដុល្លារ តែម្ចាស់ផ្ទះអាចចំណាយខ្ទង់ប្រមាណ ៣ ០០០ ដុល្លារប៉ុណ្ណោះជាមួយឥដ្ឋអេកូ»។
សម្រាប់ព័ត៌មានបន្ថែមមាននៅទំព័រហេ្វសប៊ុក @ឥដ្ឋអេកូ Eco-Bricks ឬទូរស័ព្ទលេខ ០៨៥ ២២ ៤៤ ៦៦៕