The Phnom Penh Post Search

Search form

Logo of Phnom Penh Post newspaper Phnom Penh Post - ឥណ្ឌាដើរ​លក់​មុង និង​ខោអាវ​នៅ​ស្រុកខ្មែរ​ បារម្ភ​ខ្លាចអស់​ឆ្នាំង​បាយ​




ឥណ្ឌាដើរ​លក់​មុង និង​ខោអាវ​នៅ​ស្រុកខ្មែរ​ បារម្ភ​ខ្លាចអស់​ឆ្នាំង​បាយ​

Content image - Phnom Penh Post
ឥណ្ឌា​ស្ពាយ​ថង់ដើរ​លក់ខោអាវ និង​មុងភួយ​តាមផ្លូវ​។ Victoria Morck Madsen

ឥណ្ឌាដើរ​លក់​មុង និង​ខោអាវ​នៅ​ស្រុកខ្មែរ​ បារម្ភ​ខ្លាចអស់​ឆ្នាំង​បាយ​

ភ្នំពេញ: ក្រោម​ពន្លឺ​ភ្លើងពណ៌ មុខ​បារ៍សម្បូរនារី​ស្អាត​ៗ​មួយ​នៅ​ចុង​វិថីលេខ ១៣៦ បុរស​ជាតិ​ឥណ្ឌា​លក់អីវ៉ាន់​តាម​ដង​ផ្លូវ ឬ​ឥណ្ឌា​លក់មុង​ បាន​បង្ហាញ​ផលិត​ផល​របស់​ខ្លួន​ម្ដងមួយ​ៗ​ពី​បង្វេចនូវរ៉ូបវែង​ចម្រុះពណ៌​ ​តម្លៃ ១៦០០០ រៀល និងអាវ​រលុង​តម្លៃ​ ១ ម៉ឺន​រៀល​ ដល់​ក្រុ​មនារី​សិចស៊ីដែលហាក់​មិន​សូវ​ជា​ចាប់​អារម្មណ៍។

ដោយ​គ្មាននរណា​រវី​រវល់​ បុរស​ឥណ្ឌា​រូប​នេះ​បាន​បត់ទុកដាក់សម្លៀក​បំពាក់​របស់​ខ្លួន​វិញ​ រួច​ទាញយកឈុត​ផ្សេង​ៗ​ទៀត​។ កញ្ញា ស្រីណាក់ វ័យ ២៣ ឆ្នាំ ជា​នារី​ទទួល​ភ្ញៀវ​នៅបារ៍​មួយបាន​និយាយ​ថា ឥណ្ឌា​លក់​មុង​ពូកែ​បញ្ចុះ​បញ្ចូល​ណាស់។

កញ្ញា​និយាយ​ថា​៖ «​ខ្ញុំ​ទិញ​សម្លៀក​បំពាក់​ពី​ឥណ្ឌាទាំងនេះ​ពីព្រោះ​វា​មាន​តម្លៃ​ថោក​ដូចនៅ​ផ្សារ​ដែរ ហើយ​ណា​មួយ​ខ្ញុំ​គ្មានពេល​ដើរ​ផ្សារទិញ​ផង»។

រី​​ឯ​កន្លែង​ស្នាក់​របស់​លោក ស៊ូនៀ កុមឡា​ វ័យ ២៧ ឆ្នាំ គឺជា​ផ្ទះ​តូច​ចង្អៀត​នៅជាន់ទី ២ ក្បែរ​ផ្សារ​ទំនើបសូរិយា ​ដែល​លោក​បាន​រស់នៅ​ជាមួយបុរស​រួម​សញ្ជាតិ ៤ នាក់ទៀត​ សុទ្ធ​តែ​រកស៊ី​ដើរ​លក់​ខោអាវ​តាមផ្លូវ។ លោក គុមឡា បាន​និយាយ​ថា​៖ «ខ្ញុំ​ដើរ​លក់​គ្រប់​ច្រក​ល្ហក​នៅភ្នំពេញ។ ​អីវ៉ាន់​ភាគច្រើន​ ខ្ញុំ​ទិញ​ពី​ផ្សារ​អូឡាំពិក ហើយ​ខ្ញុំក៏លក់​គ្រឿង​អលង្ការ​ដែរ»។

ឈរ​កណ្ដាល​បន្ទប់​ស្នាក់ លោក​បាន​បន្ដ​ថា លោក​បាន​ចាកចេញ​ពី​មាតុភូមិ​កំណើតអ៊ុតតា ប្រាដេស​ ភាគ​ខាង​ជើង​ប្រទេស​ឥណ្ឌា ជារដ្ឋ​ដ៏​កកកុញ​បំផុត​របស់​ប្រទេស​ដែល​មាន​ប្រជាជនច្រើន​លំដាប់​លេខ ២ ក្នុង​លោក​ ពីព្រោះ​លោកពិបាក​រក​ការងារ​ធ្វើណាស់។

អង្គុយ​ពែនភ្នែន​ពី​ក្រោយ​លោក​ គុមឡា មិត្ដភក្ដិ​រួមបន្ទប់​កំពុង​ស្ដាប់​ចម្រៀង​ និង​ជក់​បារី​ ហើយ​លើកម្រាល​សុទ្ធ​តែ​ថង់​ប្លាស្ទិក​ខ្ចប់​សម្លៀក​បំពាក់​។

លោក គុមឡា បាន​និយាយ​ភាសា​ខ្មែរ​យ៉ាង​ច្បាស់​ពេល​កំពុង​វេច​ខ្ចប់​សម្លៀក​បំពាក់​ដាក់បង្វេច​ថា​៖ «​ខ្ញុំ​បានស្គាល់​មិត្ដភក្ដិ​ដែល​បាន​មក​ទី​នេះ​មុនខ្ញុំ​។ ការ​លក់ដូរ​នៅ​ទី​នេះ​ពិត​ជា​ល្អ​ណាស់​។ ខ្ញុំ​អាច​រក​ប្រាក់បានពី ៣២០០០ រៀល ទៅ ៤ ម៉ឺន​រៀល​ក្នុងមួយថ្ងៃ​។ ខ្ញុំ​តែងតែ​ទៅ​ទិញ​អីវ៉ាន់​នៅ​ផ្សារចាប់ពីម៉ោង ៦ ដល់​ម៉ោង ១១ ព្រឹក​ ហើយ​ខ្ញុំដើរលក់​ពី​ម៉ោង ៤ រសៀល​ដល់ម៉ោង​ ១០ យប់​»។

Content image - Phnom Penh Post

លោក N Sitlhou ជា​លេខាទី ១ ប្រចាំ​ស្ថានទូតឥណ្ឌា​ក្នុង​ក្រុង​ភ្នំពេញ បាន​ឲ្យ​ដឹងថា ដោយសារតែ​ស្ថានទូត​អត់​តួលេខ​ច្បាស់​អំពី​ចំនួនជនអន្ដោប្រវេសន៍​​ លោក​បាន​សន្និដ្ឋាន​ថា មាន​ជនជាតិ​ឥណ្ឌា​មិនលើសពី ១ ពាន់​នាក់​ទេ​ ដែល​មកពីក្រុង​ហ្គូរ៉ាកពូរ​ ក្បែរ​ព្រំ​ដែន​ប្រទេស​នេប៉ាល់​ អ្នករស់នៅ​ជើង​ភ្នំហិមពាន្ត​ ជា​ទឹក​ដី​ដ៏​ពិសិដ្ឋ​នៃព្រះពុទ្ធសាសនា និង​ព្រហ្មញ្ញ​សាសនា​​តាំងនៅ។

ចំណែក​ឯ​បន្ទប់​ផ្ទះ​ល្វែង​នៅ​ជាន់ទី ៣ មាន​ជនជាតិ​ឥណ្ឌា​រស់​នៅ​រហូត​ដល់ ៧ នាក់​។ បន្ទប់​ស្នាក់​តម្លៃ​ ១៥០ ដុល្លារ​ក្នុង​មួយ​ខែ​នេះ​ ត្រូវ​បាន​ជួល​ក្រោមឈ្មោះបុរស​ឥណ្ឌា បាល់ម៉ា សៀយ៉ា វ័យ ៣៥ ឆ្នាំ មក​ពី​ក្រុង​ហ្គូរ៉ាកពូរ​ ផង​ដែរ​។

ជាមួយ​នឹង​ការ​ខិតខំសង្វាត​រៀន​ភាសា​ខ្មែរដោយ​ខ្លួន​ឯង ក្រុម​ឥណ្ឌាលក់​មុង​ទាំង​នេះ​បាន​មកកាន់​កម្ពុជា​ ៥ ឆ្នាំ​ហើយ។ ចំណូល​ភាគ​ច្រើន​របស់​ សៀយ៉ា​ ត្រូវ​បាន​ផ្ញើទៅ​ឲ្យ​ភរិយា និង​កូន ២ នាក់​ទៀត​នៅ​រដ្ឋ​អ៊ុតតា ប្រាដេស​។

លោក​បាន​បន្ថែម​ថា ការ​លក់​ដូរបែប​នេះ​ពិត​ជាល្អ​ ហើយ​អ្នក​លក់​ជា​ច្រើន​បាន​បន្ដ​ដំណើរ​ទៅ​ដល់​តាមបណ្ដា​ខេត្ដ​នានា​ផង​ដែរ​។

ដ្បិតតែ​កម្ពុជា​អាច​ឲ្យ​លោក ​សៀយ៉ា ផ្ញើ​ក្ដីសង្ឃឹម​រកប្រាក់ចិញ្ចឹម​ប្រពន្ធ​កូន​ក៏ពិត​មែន ​ប៉ុន្តែ​លោក​បានប្រាប់​ពី​កង្វល់​ខ្លួន​ថា​៖ «​សព្វថ្ងៃ​ ច្បាប់​កម្ពុជា​កាន់តែរឹត​បន្ដឹង​ជាង​ពេល​មុន»។

វាជា​អ្វី​ដែល​លោក​ចង់​សំដៅ​លើច្បាប់​ការងារ​របស់ជនបរទេស​។ លោក​បាន​លើក​ឡើង​ថា​៖ «​ដើម្បី​ទទួល​បាន​សិទ្ធិ​ស្របច្បាប់ យើង​ត្រូវ​ទៅ​កាន់​ក្រសួង​ការងារ​ និង​ត្រូវ​បង់​ប្រាក់​ពិន័យ​ក្នុង​ពេល​ធ្វើ​ការ​ដោយ​គ្មាន​ច្បាប់​ពី​ ៣០០ ទៅ ៤០០ ដុល្លារ​ ហើយ​បង់​ ១០០ ដុល្លារ​ក្នុង​មួយឆ្នាំសម្រាប់​ការ​សុំច្បាប់​ថ្មី​»។

លោក​ថា លោក និង​មិត្ដភក្ដិ​មិន​ទាន់​បាន​បង់ប្រាក់​ទេ​ ដោយ​បន្ត​​​ផ្សង​គ្រោះ​ថ្នាក់​ប្រកប​របរក្រៅច្បាប់។ ​

យោង​តាម​លោក ហេង សួរ អ្នក​នាំពាក្យ​ក្រសួង​ការងារ បាន​ឲ្យ​ដឹងថា សិទ្ធិការងារ​របស់​ជនបរទេស​តម្រូវ​តែ​លើ​ការ​ជួល​ពី​និយោជក​ប៉ុណ្ណោះ​។ ចំពោះ​អ្នកលក់​ដូរ​កំប៉ិក​កំប៉ុក​ក្រៅ​ស្ថាប័ន​ដូច្នេះ​អាច​មានបញ្ហា​។

លោក​បាន​បន្ដ​ថា​៖ «​បើ​ជនជាតិ​ឥណ្ឌា​ទាំង​នោះកាន់ទិដ្ឋាការ​ទេសចរ អ្នក​ជំនួញ​ ឬ​ផ្សេង​ៗ​ទៀត​ តែឆ្លៀត​ប្រកបរបរ​ផ្ទាល់​ខ្លួន ពួកគេ​កំពុង​តែ​ធ្វើ​ខុស​ច្បាប់​ហើយ​»។

ចំពោះ​​លោក សៀយ៉ា ទៅអនាគត​​ឆ្នាំង​បាយរបស់​ពួកគេ​នៅ​តែ​មាន​ភាព​ស្រពេចស្រពិល​ ដោយ​លោកលើក​ឡើង​ថា​៖ «​បើ​យើង​មិន​អាច​ធ្វើ​លិខិត​បញ្ជាក់​អំពី​សិទ្ធិ​ស្រប​ច្បាប់​ទេ​ យើង​មិន​អាច​បន្ដ​អាជីព​នោះ​ទេ​»៕ Brent Crane​​

អត្ថបទគួរចាប់អារម្មណ៍