The Phnom Penh Post Search

Search form




Logo of Phnom Penh Post newspaper Phnom Penh Post - ឧទ្យាន​រាជដំណាក់​ប៊ូប៊ីង​សួន​បុប្ផា​ចោល​ក្លិន​ឈ្ងុយ​ឈ្ងប់




ឧទ្យាន​រាជដំណាក់​ប៊ូប៊ីង​សួន​បុប្ផា​ចោល​ក្លិន​ឈ្ងុយ​ឈ្ងប់

Content image - Phnom Penh Post
​ភ្ញៀវទេសចរ​ចិន​ថតរូប​​អនុស្សាវរីយ៍នៅ​ក្នុង​សួនផ្កា​ក្បែរ​ច្រកចូល​ឧទ្យាន​រាជ​ដំណាក់​។ ហុង រស្មី

ឧទ្យាន​រាជដំណាក់​ប៊ូប៊ីង​សួន​បុប្ផា​ចោល​ក្លិន​ឈ្ងុយ​ឈ្ងប់

ក្រុងឈៀងម៉ៃ: ប៊ូប៊ីង ផាលេស គឺជា​រាជដំណាក់​រដូវរងា​របស់​រាជវង្សានុវង្ស​ថៃ ស្ថិត​នៅ​លើ​ខ្នងភ្នំ​ក្រៅ​ក្រុង​ឈៀង​ម៉ៃ ដែល​មាន​សីតុណ្ហភាព​ទាប​ជាង​ក្រុង និង​បរិយាកាស​ហ៊ុមព័ទ្ធ​ទៅ​ដោយ​អ័ព្ទ​សំណើម។

បើទោះ​បីជា​រាជដំណាក់​ដែល​កសាង​ឡើង​ក្នុង​ឆ្នាំ ១៩៦១ នេះ​បាន​បើកទ្វារ​ស្វាគមន៍​ភ្ញៀវទេសចរ​យ៉ាងណា​ក៏ដោយ ក៏​បច្ចុប្បន្ន​ភ្ញៀវ​មាន​ឱកាស​ត្រឹមតែ​គយគន់ និង​ស្រង់​ក្លិន​បុប្ផា​ឈ្ងុយ​ឈ្ងប់​ប៉ុណ្ណោះ។

ខណៈពេល​ដែល​រាជដំណាក់​មិនត្រូវ​បាន​បើកជា​សាធារណៈ ភាព​ទាក់ទាញ​ចម្បង​គឺ​សួនផ្កា​ចម្រុះ​ដែល​រង់ចាំ​ស្វាគមន៍​វត្ដមាន​ភ្ញៀវ ពេល​អត់​មាន​វត្ដមាន​រាជវង្សា​នុវង្ស។

ទោះបី​ជាសួន​បុប្ផា​ត្រូវបាន​អភិរក្ស​យ៉ាង​ល្អ​រំលេច​សម្រស់ និង​ចោល​ក្លិន​ឈ្ងុយ​ពេញ​មួយឆ្នាំ ពូជផ្កា​នីមួយៗ​បញ្ចេញ​ផ្កា​ទៅតាម​រដូវ​រៀងៗ​ខ្លួន។

ប៉ុន្ដែ​រដូវកាល​ដែល​ទាក់ទាញ​បំផុត​គឺនៅ​រដូវរងា ពេល​ផ្កា​ចេញ​ពណ៌​រីក​ស្គុសស្គាយ។ នៅ​ក្នុង​រដូវភ្លៀង ភ្នំ​ត្រូវបាន​ក្រាល​ដោយ​ពពក​ជា​វេលា​ដ៏ស័ក្ដិសម​សម្រាប់​គន់​ផ្កាអ័រ​គីដេ។

គោលដៅ​ចម្បង​មួយគឺ សួនផ្កា​កុលាប​ឈ្មោះ​ថា សួន​ស៊ូវ៉ារី។ សួន ស៊ូវ៉ារី គឺជា​សួន​ផ្កា​កូលាប ដែលជា​ហឫទ័យ​ផ្ដួចផ្ដើម​របស់​ព្រះមហា​ក្សត្រិយានី ស៊ូវ៉ារី ដែល​ឧទ្ទិស​ថ្វាយ​អតីត​ស្ដេច​ឡាស៊ូវ៉ារី តេផាកាម។ ក្រៅពី​កុលាប សួន​បុប្ផា​ដ៏ធំ​ល្វឹង​ល្វើយ​នេះ ក្រាល​ដោយ​ផ្កា និង​រុក្ខជាតិ​ប្លែកៗ ដូចជា ពូជផ្កា​ខា​មេលៀ បណ្ណង្គ​ជាតិ ឫស្សី​យក្ស និង​អ័រគីដេ​ចម្រុះ​ពណ៌​ជាដើម។

រាជដំណាក់​នេះ​ស្ថិត​នៅ​លើ​កំពូល​ភ្នំ​ដូយ​បួកហា ក្បែរ​វត្ដ​ប្រាថាត​ដូយ​ស៊ូថេប ជា​អារាម​ដ៏​សំខាន់​បំផុត​នៅ​ថៃ ចម្ងាយ​ប្រមាណ ២០ គីឡូម៉ែត្រ​ភាគ​ពាយព្យ​ក្រុង​ឈៀង​ម៉ៃ និង​ចម្ងាយ​ប្រមាណ ៤ គីឡូម៉ែត្រ​ពី​វត្ដ​ប្រាថាត។

Content image - Phnom Penh Post
ភ្ញៀវទេសចរ​ដើរ​ទស្សនា​សួន​ផ្កា​ចម្រុះ​ពណ៌​។ ហុង រស្មី

មាន​មធ្យោបាយ​ជាច្រើន​នៅក្នុង​ការធ្វើ​ដំណើរ​ទៅកាន់​រាជដំណាក់​ប៊ូប៊ីង។ មធ្យោបាយ​ងាយស្រួល​បំផុត​គឺការ​ជិះ​តាក់ស៊ី​ឯកជន។ ការធ្វើដំណើរ​កម្សាន្ដ​ទៅកាន់​រាជដំណាក់​ប៊ូប៊ីង និង​អារាម​ប្រាថាត ដូយ​ស៊ូថេប កន្លះ​ថ្ងៃ​មាន​តម្លៃ​ប្រមាណ ១០០០ បាត (៣០ ដុល្លារ)។

បើ​មិនចង់​ចំណាយ​ខ្ពស់ ភ្ញៀវ​ក៏រក​រ៉ឺម៉ក (ទុក​ទុក) ជិះ​ពេញ​មួយថ្ងៃ​ត្រឹមតែ​តម្លៃ ៥០០ បាត (១៥ ដុល្លារ) ដែល​អាច​សល់​ពេល​ទស្សនា​ទីឋាន​ដទៃ​ថែម​ទៀត។

មិន​ខុសពីការ​កម្សាន្ដ​នៅ​តំបន់​ប្រវត្ដិសាស្ដ្រ ទីសក្ការៈ និង​រាជដំណាក់​កម្ពុជា​នោះ​ទេ ដំណើរការ​ទៅកាន់​រាជដំណាក់​ប៊ូប៊ីង ភ្ញៀវទេសចរ​តម្រូវ​ឲ្យ​ស្លៀកពាក់​សមរម្យ គ្មាន​ខើច​លើ​លេច​ក្រោម ចំហ​ដើម​ទ្រូង និង​ខោរ​ហែក​រយ៉ៃ​ឡើយ៕

Content image - Phnom Penh Post
ភ្ញៀវទេសចរ​ដើរ​កាត់​រាជ​ដំណាក់​រាជវង្ស​ក្សត្រ​ថៃ​។ ហុង រស្មី

អត្ថបទគួរចាប់អារម្មណ៍