.jpg)
ការជួបជុំគ្នារបស់សិល្បករ-សិល្បការិនី ក្នុងឱកាសពិសេសរបស់អង្គការសិល្បៈខ្មែរអមតៈកន្លងមក។ រូបថត សហការី
ភ្នំពេញ៖ ពិសោធន៍សិល្បៈខ្មែរអមតៈ គឺជាកម្មវិធីរបស់អង្គការសិល្បៈខ្មែរអមតៈដែលមានចក្ខុវិស័យផ្តល់នូវបទពិសោធសិល្បៈវប្បធម៌ខ្មែរ ជាគំរូដ៏ជក់ចិត្ត ប្រកបដោយភាពច្នៃប្រឌិត ដើម្បីដឹកនាំអភិវឌ្ឍវិស័យឧស្សាហកម្មសិល្បៈ និងទស្សនីយភាព ដែលមានការទទួលខុសត្រូវ និងរស់រវើកនៅកម្ពុជា។ ជាមួយគ្នានេះ អង្គការសិល្បៈខ្មែរអមតៈមានគម្រោងមួយឈ្មោះថា «Incubator» គឺជាកម្មវិធីបណ្តុះបណ្តាលវិជ្ជាជីវៈរយៈពេល ២៦ ខែ ចាប់ផ្តើមពីខែ ឧសភា ឆ្នាំ ២០២០ ដល់ខែមិថុនា ឆ្នាំ ២០២២ ដែលជាឱកាសផ្តល់ឲ្យសិស្ស និស្សិត ក្លាយជាសិល្បករ-សិល្បការិនីអាជីពមួយសម្រាប់ទីផ្សារសិល្បៈ។
តាមសេចក្តីប្រកាសព័ត៌មានរបស់អង្គការសិល្បៈខ្មែរ (CLA) បានឲ្យដឹងថា៖ «ក្នុងគម្រោងនេះ ពួកយើងនឹងធ្វើការជ្រើសរើស នាដក នាដកា របាំបុរាណ ប្រពៃណី ល្ខោនខោល ២០ នាក់ (ប្រុស ១០ នាក់ និងស្រី ១០ នាក់) តន្រ្តីករ វង់ភ្លេងពិណពាទ្យ ប្រពៃណី ចំនួន ៥ នាក់ អ្នកចម្រៀង ចំនួន ២ នាក់ (ស្រី ១ នាក់ ប្រុស ១ នាក់) ប្រធានក្រុមសិល្បៈ ១ នាក់ និងក្រុមការងារបច្ចេកទេស ចំនួន ៤ នាក់»។
សេចក្តីប្រកាសព័ត៌មានដដែលបន្តឲ្យដឹងថា៖ «នេះជាកម្មវិធីបណ្តុះបណ្តាលមួយ មានពហុគោលបំណង ដើម្បីបង្កើតស្នាដៃ សម្រាប់ការសម្តែង ដែលមានគុណភាព និងភាពច្នៃប្រឌិតបង្កើនបទពិសោធសិល្បៈ និងវប្បធម៌ខ្មែរឲ្យកាន់តែសម្បូរបែប។ ដើម្បីបង្កើតទីផ្សារសិល្បៈទស្សនីយភាពឲ្យកាន់តែធំទូលាយ និងបង្កើតឱកាសការងារដល់សិល្បករ-សិល្បការិនី និងអ្នកបច្ចេកទេស (ឆាក ភ្លើង សំឡេង) ផងដែរ។ ដើម្បីពង្រឹង និងបំពេញនូវសមត្ថភាពនិស្សិតដែលជាសិល្បករ-សិល្បការិនី និងអ្នកបច្ចេកទេស តាមរយៈកម្មវិធីកសាងសមត្ថភាព ហើយជាពិសេសនោះ កម្មវិធីក៏មានប្រាក់ចំណូលអាចជួយគាំទ្រអភិវឌ្ឍវិស័យសិល្បៈរបស់អង្គការសិល្បៈខ្មែរអមតៈផងដែរ»។
សិល្បការិនី ធ្លាប់ទទួលវគ្គបណ្តុះបណ្តាលសិល្បៈនៅអង្គការសិល្បៈខ្មែរអមតៈ។ សហការី
យ៉ាងណា ការផ្តល់ឱកាសឲ្យសិស្ស និស្សិត ប្រែក្លាយខ្លួនទៅជាអ្នកសិល្បៈ និងអ្នកបច្ចេកទេសអាជីព អាចមានដើមទុនដើម្បីទៅប្រកបរបរចិញ្ចឹមជីវិតលើវិថីសិល្បៈតាមរយៈគម្រោងពិសោធន៍សិល្បៈខ្មែរអមតៈ ក៏មានលក្ខខណ្ឌ និងការទទួលខុសត្រូវផងដែរពីសំណាក់សិស្ស និស្សិត ដែលបានជាប់ក្នុងវគ្គបណ្តុះបណ្តាលមានរយៈពេល ២៦ ខែនេះ។ កាលបរិច្ឆេទឈប់ទទួលពាក្យត្រឹមថ្ងៃទី ២៨ ខែ កុម្ភៈ ឆ្នាំ ២០២០ ម៉ោង ៥ ល្ងាចជាកំហិត។ សូមផ្ញើពាក្យស្នើសុំមកកាន់អ៊ីមែល lengcheng@cambodianlivingarts.org ឬមកដាក់ដោយផ្ទាល់ នៅការិយាល័យអង្គការសិល្បៈខ្មែរអមតៈ មានអាសយដ្ឋាននៅផ្ទះលេខ ១២៨ G ៩ ផ្លូវសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ តាមលេខទូរស័ព្ទ ០១៥ ៧១៩ ៥៣៦។
ពាក្យស្នើសុំ ត្រូវតែភ្ជាប់មកជាមួយអត្តសញ្ញាប័ណ្ណ ឬលិខិតឆ្លងដែន ឬសំបុត្រកំណើត។ តែសម្រាប់អ្នកនៅខេត្តសៀម ត្រូវទាក់ទងជាមួយនឹង កញ្ញា សុជា នៅមជ្ឈមណ្ឌលបេតិកភណ្ឌ (Heritage- Hub) តាមលេខទូរស័ព្ទ 077 480 483 និងលោក Chan Nha តាមរយៈលេខទូរស័ព្ទ 060 220 665។ សម្រាប់អ្នកដែលរស់នៅក្នុងខេត្តបាត់ដំបងវិញ អាចទាក់ទងជាមួយនឹងកញ្ញា Thang Vuthyra នៅសាលាហ្វារពន្លឺសិល្បៈ (Phare Ponleu-Selpak) ឬតាមលេខទូរស័ព្ទ 087 551 352៕
