The Phnom Penh Post Search

Search form




Logo of Phnom Penh Post newspaper Phnom Penh Post - ឱក សុគន្ធ​កញ្ញា បង្ហើប​ពី​រូប​រាង​បុរស​ម្ចាស់​ចិត្ត​នាង​




ឱក សុគន្ធ​កញ្ញា បង្ហើប​ពី​រូប​រាង​បុរស​ម្ចាស់​ចិត្ត​នាង​

Content image - Phnom Penh Post
តារា​ចម្រៀង​ហង្សមាស កញ្ញា ឱក សុគន្ធ​កញ្ញា​។ ឈឹម ស្រីនាង

ឱក សុគន្ធ​កញ្ញា បង្ហើប​ពី​រូប​រាង​បុរស​ម្ចាស់​ចិត្ត​នាង​

ភ្នំពេញ: ទាំង​មិន​ធ្លាប់​ជំពប់​រឿង​អាស្រូវ​ស្នេហា​​ជាមួយ​អ្នកណា​សោះ​ ក្រោយពី​ចំណង​ស្នេហ៍​ជាមួយ​តន្ត្រីករ​មាឌធំ​រួមអាជីព​សិល្បៈ​ដែល​នាង​ទទូច​ថាជា​ការ​រាប់អាន​គ្នា​ធម្មតានោះ​ក៏​រលត់​សូន្យ​ឈឹង​ តារាចម្រៀង​ស្រី​សំណព្វ​ចិត្ត​យុវវ័យ​កញ្ញា ឱក សុគន្ធ​កញ្ញា​ ពុំស្រដី​ពីរឿង​គូស្រករ​​ និង​កម្រ​បកស្រាយ​វែងឆ្ងាយ​ទាក់ទិន​នឹង​ម្ចាស់បេះ​ដូង​ណាស់​។

ទើបតែ​កាលពី​ចុង​សប្ដាហ៍ ក្នុង​ជំនួប​ផ្ទាល់​នាថ្ងៃ​សម្ពោធ​ខុនដូ​ដ៏​ទំនើប​ ដោយ​មានការ​សួរពី​ប្រិយមិត្ត​គាំទ្រ​យ៉ាង​ទទូច តារា​ចម្រៀង​ស្រី​រូបនេះ​ក៏របូត​មាត់​ប្រាប់ថា ក្រាស់ (Crush អ្នក​ដែល​នាង​ស្រឡាញ់​)​ ជាបុរស​ដែល​មាន​កម្ពស់​ខ្ពស់។

ជាមួយ​នឹងការ​រក្សា​ប្រជា​ប្រិយ​ភាពខ្ពស់​ត្រដែត​បង្ហាញ​វត្តមាន​តាម​កញ្ចក់​ទូរទស្សន៍​ពីកម្មវិធី​ប្រកួត​ចម្រៀង​លំដាប់​អន្តរជាតិ The Voice ក៏ដូច​ជាឆាក​ប្រគំ​តន្ត្រី និងក​ម្មវិធី​សម្ពោធ​ធំៗ​ តារា​ចម្រៀង​វ័យ ២៩ ឆ្នាំ​កញ្ញា ឱក សុគន្ធ​កញ្ញា ក៏​ទទួល​បាន​ការ​សរសើរ​ពីមហាជន​ថា នាងជា​តារាស្រី​ពុំមាន​រឿង​អាស្រូវ​ស្នេហ៍​ហ៊ុមព័ទ្ធ​ ក្រោយពី​ពាក្យច​ចាមអារ៉ាម​សាង​ស្នេហ៍ ៧ ឆ្នាំ​ជាមួយ​តន្ត្រីករ​មាឌធំ រ៉េត ធីដូណា ត្រូវបាន​បញ្ចប់​យ៉ាង​ជ្រះ​ស្រឡះ​ក្រោម​ហេតុផល​ថា ជា​អ្នក​រាប់​អាន​គ្នា​ធម្មតា​ប៉ុណ្ណោះ។

ចេញផុត​ពី​ស្រមោល​រឿង​អាស្រូវ​ស្នេហ៍​តាំង​ពីឆ្នាំ ២០១២ កញ្ញា​ ឱក សុគន្ធ​កញ្ញា ត្រូវ​បាន​គេមើល​ឃើញ​ថា ប្រជាប្រិយ​ភាព​របស់​នាង​មាន​សន្ទុះ​យ៉ាង​ខ្លាំង ​មាន​ការងារ​សិល្បៈ​គ្រប់ខេត្ត​ក្រុង​​ផ្គត់ផ្គង់​ចំណូល​យ៉ាង​កាក់កប។

ប៉ុន្តែ​ខណៈ​មមាញឹក​នឹង​បង្ហើរ​សំនៀង​កើប​ប្រាក់​នោះ តារា​ចម្រៀង​ក្នុង​ដួង​ចិត្ត​យុវវ័យ កញ្ញា ឱក សុគន្ធកញ្ញា ឲ្យតែ​និយាយ​ពីរឿង​ស្នេហា នាង​តែង​បរិយាយ​ថា៖ «មិន​ទាន់មាន​ពេល​គិត​ដល់​រឿង​ហ្នឹង​ទេ»។

កន្លង​មក នាង​តែង​លើក​ហេតុផល​ថា៖ «ខ្ញុំមិន​មាន​ពេល​គិត​រឿង​ស្នេហា​ទេ​ បើ​អាល័យ​តែគិត​ស្នេហា គ្មាន​ពេល​គ្រប់​គ្រាន់​រិះរក​អ្វី​ថ្មីនិង​ប្លែកជា​សិល្បៈ​មកជូន​បងប្អូន​ទេ»។

ជា​រឿយៗ​សំណួរ​អំពី​សង្សារ​​របស់តារា​ចម្រៀង​ស្រី​ដ៏ល្បីល្បាញ​របស់​ផលិតកម្ម​ហង្សមាស ​កញ្ញា ឱក សុគន្ធ​កញ្ញា ​តែង​ធ្វើឲ្យ​មហាជន ក៏​ដូច​ជាមិត្ត​យុវវ័យ​អន្ទះ​សាចង់បាន​ចម្លើយ​ ខណៈ​រូបនាង​ពុំ​ដែល​បង្ហាញ​តម្រុយ ឬបង្ហើប​ដំណឹង​អ្វី​ទាល់តែ​សោះ​ជុំវិញ​ប្រធាន​បទ​ស្នេហា។

យ៉ាង​ណា​មិញ ក្នុង​ជំនួប​ជាមួយ​ ភ្នំពេញ ប៉ុស្ដិ៍ នា​ថ្ងៃ​សម្ពោធ​ខុនដូ​ដ៏​ទំនើប ​The View នៅ​ផ្សារ​ទំនើប​អ៊ីអន​ម៉ល ​កាលពី​ចុង​សប្ដាហ៍​កន្លង​ទៅនេះ​ នៅពេល​ដែល​អ្នក​គាំទ្រ​នាង​សួរបែប​ឆថា៖ «តើ ក្រាស់ របស់​បង​ញ៉ា អ្នកណា​គេ ហើយ​ ក្រាស់ បងឯង​កម្ពស់​ប៉ុន្មាន?» នោះ។

ក្នុង​ទឹកមុខ​បែប​អៀន​ប្រៀន តារា​ចម្រៀង​ស្រី​លេច​ធ្លោ​ប្រចាំ​ទ្រនំ​ហង្សមាស​កញ្ញា ឱក សុគន្ធ​កញ្ញា បាន​របូតមាត់​តប​វិញថា៖ «ក្រាស់ ខ្ញុំ​កម្ពស់.កម្ពស់. អឺ. ធ្វើ​ម៉េចខ្ញុំ​ដឹង​កម្ពស់​ប៉ុន្មាន​ទៅ! បើខ្ញុំ​អត់​មាន ក្រាស់ ផង»។

តារា​ចម្រៀង​ស្រី​ដែល​ប្រិយមិត្ត​ចាប់​អារម្មណ៍​ចង់​ដឹង​ពីជីវិត​ឯកជន​ដ៏អាថ៌​កំបាំង​រូបនេះ បាន​បង្ហើប​ឲ្យដឹង​ពីលក្ខណ​សម្បត្តិ​​បុរសដែល​នាង​ប្រាថ្នា​ចង់​បាន ដោយ​នាង​បង្ហើប​ប្រាប់​យ៉ាង​ខ្លីថា៖ «​ប៉ុន្តែ​បើខ្ញុំ​មាន ក្រាស់ វិញ ខ្ញុំ​ចង់បាន​ ក្រាស់​ ដែល​មាន​កម្ពស់​ខ្ពស់»៕

អត្ថបទគួរចាប់អារម្មណ៍