.jpg)
តារាចម្រៀងស្រីចាស់វស្សាឈរជើងយូរនៅទ្រនំហង្សមាស កញ្ញា ឱក សុគន្ធ និងគូស្នេហ៍លោក អ៊ឹង សុខលី ថត Pre-Wedding នៅសៀមរាប។ ហ្វេសប៊ុក ហេង ជីវ័ន
ភ្នំពេញៈ មើលទៅដំណឹងចូលរោងជ័យមង្គលដែលល្បីថា បានកំណត់ពេលក្រាបផ្ទឹមរវាងតារាចម្រៀងស្រីកំពូល កញ្ញា ឱក សុគន្ធកញ្ញា និងលោក អ៊ឹង សុខលី ប្អូនប្រុសថៅកែផលិតកម្មហង្សមាសនាពាក់កណ្តាលឆ្នាំ ២០១៩ នេះគឺទំនងជាពិតប្រាកដមែនទែនហើយ ដោយសារគូស្នេហ៍ ១ គូនេះចេះតែបានព្រលយរូបថត Pre-Wedding តាមបណ្តាញសង្គមជារឿយៗដោយបើកចំហតែហាក់នៅមិនទាន់ហ៊ានប្រាប់ថ្ងៃកំណត់ពិតនៅឡើយ។
ក្រោយពីដំអក់វេលារំលងអស់ពេល ១ ឆ្នាំ ធ្វើឲ្យមហាជនគាំទ្រខកបំណងមិនស្ទើរទៅនឹងការចាំអ៊ុតមើលកំពូលតារាចម្រៀងស្រីនៅលើទ្រនំហង្សមាស គ្រងឈុតកូនក្រមុំចូលរោងជ័យជាមួយប្អូនប្រុសថៅកែផលិតកម្មនោះ ស្រាប់តែដើមឆ្នាំថ្មីនេះក៏ឮដំណឹងថា កញ្ញា ឱក សុគន្ធកញ្ញា និងលោក អ៊ឹង សុខលី កំណត់ថ្ងៃចូលរោងជ័យពាក់កណ្តាលឆ្នាំ ២០១៩ នេះហើយ។
ដំណឹងនេះលេចឮម្តងហើយម្តងទៀតក្រោយពីតារាចម្រៀងស្រីជើងខ្លាំងចាស់វស្សាដែលឈរលើទ្រនំផលិតកម្មហង្សមាសបានយូរ និងថែមទាំងជិតក្លាយជាសាច់ឈាមនៃក្រុមគ្រួសារថៅកែខ្លួនដោយសារមានចំណងស្នេហ៍ជាមួយនឹងលោក អ៊ឹង សុខលី ប្អូនប្រុសបង្កើតលោក អ៊ឹង ឆៃងួន ជាម្ចាស់ផលិតកម្មនោះបានវិលត្រឡប់ពីដំណើរកម្សាន្តនៅប្រទេសចិនដែលក៏ល្បីដែរថា នោះគឺជាការបណ្តើរគ្នាយ៉ាងផ្អែមល្ហែមដើម្បីថត Pre-Wedding និងនាពេលថ្មីៗនេះធ្លាយរូបថតនៅតំបន់អង្គរនៃខេត្តសៀមរាបថតជាមួយនឹងឈុតប្រពៃណីខ្មែរជាគូវិញម្តង។
យ៉ាងណាដំណឹងចូលរោងជ័យពិតប្រាកដហាក់ដូចជានៅជារឿងបែបស្រពេចស្រពិលដដែល ខណៈគេក៏នៅតែមិនអាចទទួលបានការបញ្ជាក់ឲ្យច្បាស់ពីតារាចម្រៀងស្រីកញ្ញា ឱក សុគន្ធកញ្ញា បានឡើយដោយប្រព័ន្ធទូរស័ព្ទតេចូលច្រើនដងគ្មានអ្នកទទួល។
ជាក់ស្តែងកាលពីលើកមុននោះ ពេលភ្នំពេញប៉ុស្តិ៍បានទូរស័ព្ទសួរនាំរឿងនេះក៏ត្រូវកញ្ញា ឱក សុគន្ធកញ្ញា បានលើកទូរស័ព្ទ ហើយក៏បានឆ្លើយយ៉ាងខ្លីដោយសំអាងពាក្យលេសថា៖ «ចាស!ពេលនេះ ខ្ញុំកំពុងតែជាប់រវល់ថត ហើយចាំខ្ញុំទំនេរ ចាំនាងខ្ញុំនឹងនិយាយរឿងនេះប្រាប់ទៅបង» ហើយក៏បានបិទទូរស័ព្ទទៅវិញមួយរំពេចក្រោយដឹងថាខាងសារព័ត៌មាន។
ប្រហែលជាតារាស្រីរូបនេះនៅតែឆ្លៀតបន្តនូវការទាមទារចំណាប់អារម្មណ៍ពីមហាជនរហូតដល់ថ្ងៃចូលរោងជ័យមង្គលហើយមើលទៅ ដោយសារសូម្បីតែការបង្ហោះរូបថតអាពាហ៍ពិពាហ៍ខ្លួនឯងសោះក៏នាងមានលក្ខខណ្ឌលលេងជាថ្នូរនឹងប្រិយមិត្តដែរ។ នេះបើតាមសាររបស់កញ្ញា ឱក សុគន្ធកញ្ញា សរសេរថា៖ «សួស្ដីមិត្តភក្តិ បងប្អូនទាំងអស់គ្នា! ថ្ងៃនេះមានរូបបែកធ្លាយរូប Pre-Wedding អាពាហ៍ពិពាហ៍នាងខ្ញុំ តើបងប្អូនជឿដែរឬទេ? បើចង់ដឹងការពិតរូបថត Preweddings ជាផ្លូវការសូម Share Status នេះឲ្យបានចំនួន 168k Share ខ្ញុំនឹងបង្ហាញរូបជាផ្លូវការរបស់នាងខ្ញុំជូនបងប្អូនទាំងអស់គ្នា»៕
