The Phnom Penh Post Search

Search form




Logo of Phnom Penh Post newspaper Phnom Penh Post - Adda ចេញ​បទ​ទី ២ បន្ទាប់​ពីបទ Original ដំបូង​ទទួល​ផ្លែផ្កា​ខ្លាំង




Adda ចេញ​បទ​ទី ២ បន្ទាប់​ពីបទ Original ដំបូង​ទទួល​ផ្លែផ្កា​ខ្លាំង

Content image - Phnom Penh Post
កញ្ញា Adda Angel​ ម្ចាស់​បទ Original Song «ទីនេះ​មាន​មនុស្ស​ខូច​ចិត្ដ​»។ ឈឹម ស្រីនាង

Adda ចេញ​បទ​ទី ២ បន្ទាប់​ពីបទ Original ដំបូង​ទទួល​ផ្លែផ្កា​ខ្លាំង

ភ្នំពេញៈ ទីបំផុត​ចម្រៀង​បទ​ថ្មី​ប្រភេទ​ Original Song ទី២ ដែល​មាន​ចំណង​ជើង​ថា «រាត្រី​ចុង​ក្រោយ» របស់​តារា​ចម្រៀង​ស្រីល្បី​មួយ​រំពុះ​កញ្ញា Adda Angel បាន​បង្ហោះ​ចូល​ក្នុង​ YouTube ហើយ​កាលពី​រាត្រី​ថ្ងៃទី ១ ខែ​ឧសភា ឆ្នាំ ២០១៦ កន្លងមក​នេះ​ បន្ទាប់​ពីបទ​ទី ១ «ទីនេះ​មាន​មនុស្ស​ខូចចិត្ត» កំពុង​តែក្លាយ​ជា​មន្តសណ្តំ​ដួងចិត្ត​យុវវ័យ​ខ្លាំង ខណៈ​ទើប​បង្ហោះ​បាន​មួយខែ និងបាន​យកទៅ​សម្តែង​ក្នុង​កម្មវិធី​ស្មារតី​នៃ​សិល្បៈ​តន្រ្តី​ខ្មែរឆ្លង​ជំនាន់ ឬ ARAK MEGA DANCE 2016 នៅ​មជ្ឈមណ្ឌល​សហ​ប្រតិបត្តិ​ការកម្ពុជា​កូរ៉េ (CKCC) កាលពី​ថ្ងៃទី ៩ ខែ​មេសា នោះ។

កញ្ញា Adda Angel បាន​ឲ្យដឹង​ពី​អារម្មណ៍​សប្បាយ​រីករាយ​ចិត្ត​ពេលមាន​អ្នកគាំទ្រ​ជាយុវ​វ័យ​ច្រើន​ និងដើម​ចម​និពន្ធ​ប្រភេទ​បទ​ចម្រៀងទី ១​ ថា៖ «នាងខ្ញុំ​រំភើប​ចិត្ត​ខ្លាំងណាស់ ពេល​បាន​ដឹងថា បទ​ចម្រៀង​នាង​ខ្ញុំប្រភេទ Original Song ទី ១​ មាន​ចំណង​ជើង​ថា ទីនេះ​មាន​មនុស្ស​ខូចចិត្ត ទទួល​បាន​ការស្វាគមន៍ និង​និយម​ចូលចិត្ត​ខ្លាំង​គួរសម​ពី​មិត្តយុវ​វ័យ​ បន្ទាប់ពី​នាង​ខ្ញុំបាន​បង្ហោះ​វាចូល​ទៅ​ក្នុងបណ្តាញ​កម្សាន្តសង្គម YouTube​ កាលពី​ចុង​ខែមីនា​ ឆ្នាំ ២០១៦ មក។ បទនេះ​ចំណាយ​ពេល​និពន្ធ​ និង​កែសម្រួល​ត្រឹមតែ​ជាង​មួយ​សប្តាហ៍​ប៉ុណ្ណោះ​ក៏ចប់​សព្វគ្រប់ ហើយ​ក៏បង្ហោះ​ចូល YouTube តែម្តង»។

កញ្ញា បន្ត​ថា៖ «តាម​ពិត​ទៅបទ​នេះ ជា​សមិទ្ធផល​រួមគ្នា​របស់​នាង​ខ្ញុំ និង​លោក ហេង ពិទូ​សម្រាប់​បទចម្រៀង Original Song។ដំបូង​នាង​ខ្ញុំបាន​នឹកឃើញ​ដាក់​ចំណង​ជើង​នេះ​ជាមុន ហើយក៏​បាន​សរសេរ​ត្រួសៗ​ខ្លះដែរ ក្រោយ​មក​ក៏បាន​ពិភាក្សា​ជា​មួយលោក ​ពិទូ។​បន្ទាប់​មកទៀត​​ គាត់​ក៏ជួយ​កែសម្រួល​បន្ថែម និង​និពន្ធ​បទភ្លេង​បាន​យ៉ាងល្អ​ត្រឹមពេល​មួយ​អាទិត្យ​ប៉ុណ្ណោះ​ខណៈ​ដែល​ចំណង​ជើង​នៅ​ដដែល»។ ​​

Content image - Phnom Penh Post
កញ្ញា Adda និងលោក ហេង ពិទូ ច្រៀង​ក្នុង​កម្ម​វិធី ARAK MEGA DANCE។ ហ្វេសប៊ុក

ដោយ​ឡែក​វត្តមាននៃ​ការ​វិលត្រឡប់​មកកាន់​សង្វៀន​សិល្បៈ​ចម្រៀង​សម័យ​នេះ ក៏ជា​រឿង​មួយ​បង្កើតនូវ​ចម្ងល់​សម្រាប់​មហាជន​ដែរ​ដោយ​ចោទ​សួរថា​ តើ​កញ្ញា Adda ដែល​ធ្លាប់តែ​ច្រៀងបទ​ចម្រៀង​បែប​ជាភាសា​បរ​ទេស​ដ៏ពីរោះ​បាត់ទៅ​ណា​ហើយ ឬមួយ​ក៏នាង​បាន​ឈប់ពី​វិស័យ​សិល្បៈ​នេះ​ហើយ​ទេ​ដឹងហ្ន?

ស្រាយ​ចម្ងល់​នេះ តារា​ចម្រៀង​ស្រីវ័យ ២៧ ឆ្នាំ ក៏បាន​ថ្លែង​ប្រាប់​ភ្នំពេញ​ប៉ុស្តិ៍ថា​៖ «មូលហេតុ​ដែល​នាំ​ឲ្យនាង​ខ្ញុំ​បាត់មុខ​ពីវិស័យ​សិល្បៈ​មួយ​រយៈ ហើយខាន​បំពេ​អារម្មណ៍​ប្រិយ​មិត្ត​នោះ ព្រោះ​តែជាប់​រវល់មមាញឹក​ខ្លាំង​នឹង​ការងារ​អាជីវកម្ម​ក្រុម​គ្រួសារមិន​អាច​ដកឃ្លា​មកសម្រុក​នឹង​ការងារ​សិល្បៈ​ចម្រៀង​បាន​នោះ ក៏សម្រេច​សម្ងំ​មួយ​រយៈសិន។ ទោះ​យ៉ាង​ណាក៏​មិនមែន​មានន័យ​ថា នាងខ្ញុំ​បោះបង់​ចោលនូវ​ចំណូល​ចិត្តមួយ​នេះឡើយ​ព្រោះថា​នាងខ្ញុំ​ក៏នៅ​បន្ត​ចូលរួម​ក្នុងសកម្ម​ភាព​វិស័យ​សិល្បៈ​រហូតដែរ»។​

នៅក្នុង​អត្ថន័យ​បទ​ចម្រៀង​ទី ១ ថា «ទីនេះ​មាន​មនុស្ស​ខូចចិត្ត» បង្ហាញ​ពី​មនោស​ញ្ចេតនា​ដ៏កម្សត់​ឈឺចាប់ និងការ​ខូចចិត្ត​ដ្បិត​តែស្នេហា​របស់​នារីម្នាក់​បាន​បាត់បង់​បុរស​ដែល​ជាទី​ស្រឡាញ់​របស់​ខ្លួន។ នេះ​បើយោង​ទៅ​តាម​សេចក្តី​រៀបរាប់​ប៉ុន្មាន​ឃ្លា​នៅ​ក្នុង​បទនោះ​ថា៖ «មនុស្ស​ដែលធ្លាប់​តែ​រីករាយ មនុស្ស​ចូល​ចិត្តភាព​ក្អាកក្អាយ​ឥឡូវ​ប្រែក្លាយ​ជាស្ងៀម​ស្ងាត់ មិនចង់​ជួប​អ្នកណា យល់​អារម្មណ៍​មួយនេះ​ទេបេះដូង​លែង​មាន​ម្ចាស់ការ​អង្គុយនៅ​ស្ងៀម​ទឹកភ្នែក​ក៏ហូរ​ចង់ប្រាប់​ថា បេះដូង​ខ្ញុំឈឺ​ផ្សា​ព្រោះ​ត្រូវ​បាត់បង់​បង»។​

បើតាម​មើល​ទៅ​ទំនង​ជា កញ្ញា Adda Angel​ បាន​ធ្វើការ​ត្រៀម​ខ្លួន​រួចជា​ស្រេច​ហើយ ជាមួយ​នឹងការ​វិលមក​កាន់ទ្រនំ​សិល្បៈ​វិញ ដោយសារ​ការស្វាគមន៍​ និងមាន​ការគាំទ្រ​ច្រើន​ពីប្រិយមិត្ត​យុវវ័យ​សម្រាប់​ស្នាដៃ​ថ្មីៗ​ប្រភេទ​ជា​ Original Song។​កញ្ញា​ក៏បាន​ព្រលយ​បង្ហើប​ដែរថា៖ «នារាត្រី​ថ្ងៃទី ១ ខែ​ឧសភា នេះ​ នាងខ្ញុំ​បានចេញ​នូវបទ​ថ្មីទី ២ គឺជា​ប្រភេទ​បទ​ញាក់​កន្ត្រាក់​អារម្មណ៍​ដែល​មាន​ចំណង​ជើង​ថា «រាត្រី​ចុងក្រោយ» និង​បទមួយ​ទៀត​បែប​មនោសញ្ចេតនា​ចុង​ខែ​នេះ​ផងដែរ​»៕

អត្ថបទគួរចាប់អារម្មណ៍