ភ្នំពេញ៖ ជាឱកាសពិសេសល្អសម្រាប់អ្នកមានចំណូលចិត្តខាងសរសេរអត្ថបែបវិភាគផ្នែកសិល្បៈ ខណៈអង្គការសិល្បៈខ្មែរអមតៈ បានបើកវគ្គបណ្តុះបណ្តាលដំបូង ដែលស្តីអំពី «ការសរសេរវិភាគពីសិល្បៈ» ដែលជាការផ្តល់ការសិក្សាឥតគិតថ្លៃ មានចំនួន ២ ថ្ងៃពេញ គឺនៅថ្ងៃទី ២៥-២៦ ខែ មិថុនា ឆ្នាំ ២០២០ ខាងមុខ ខណៈពាក្យសុំចូលរៀនវិញ នឹងឈប់ទទួលនៅត្រឹមថ្ងៃទី ២៥ ខែ ឧសភា ឆ្នាំ ២០២០ ខាងមុខនេះហើយ។
បើតាមការបង្ហើបពីលោក គាត សុគីម ជាបុគ្គលិកផ្នែកទំនាក់ទំនងព័ត៌មាន នៃអង្គការសិល្បៈខ្មែរអមតៈបានបង្ហើបឲ្យដឹងពីគោលបំណង និងអត្ថប្រយោជន៍នៃការបើកនូវវគ្គនេះថា៖ «នេះជាវគ្គបណ្ដុះបណ្ដាលស្តីពី ការសរសេរវិភាគពីសិល្បៈ ដំបូងគេ ដែលនឹងចាប់ផ្ដើមពីថ្ងៃទី ២៥ ដល់ថ្ងៃទី ២៦ ខែ មិថុនា ឆ្នាំ ២០២០។ អ្នកចូលរួមនឹងមានឱកាសស្វែងយល់ និងអនុវត្តផ្ទាល់ជាមួយនឹងអ្នកសម្របសម្រួលជាជនជាតិខ្មែរគឺលោក យាន រស្មី ដែលជាអ្នកតស៊ូមតិផ្នែកសិល្បៈ ជាគទានុរក្សសិល្បៈ ជាអ្នកស្រាវជ្រាវ និងជាអ្នកសរសេរ។
គាត់មានបទពិសោធន៍ច្រើននៅក្នុងការសរសេរអំពីសិល្បៈ សម្រាប់ទស្សនាវដ្ដី នៅបរទេសក្នុងតំបន់ ហើយគាត់ត្រៀមខ្លួនជាស្រេចនៅក្នុងការចែករំលែកពីចំណេះដឹងអំពីការសរសេរប្រភេទនេះផងដែរ សម្រាប់សិក្ខាកាមខ្មែរ។
លោក យាន រស្មី នឹងចែករំលែកនូវបទពិសោធរបស់លោកជាមួយនឹងសិក្ខាកាម ពីរបៀបសរសេរវិភាគទៅលើទម្រង់សិល្បៈគ្រប់ប្រភេទមិនថា បែបសិល្បៈសម័យបុរាណ ឬសហសម័យនោះទេ។ សិក្ខាកាមសិក្សាវិញបើកទូទាយក្នុងការទទួលពាក្យចូលរៀន តែទទួលត្រឹម ១២ នាក់ប៉ុណ្ណោះ (រួមទាំងមានអាហារថ្ងៃត្រង់ អាហារសម្រន់ និងវិញ្ញាបនបត្របញ្ជាក់ការសិក្សា)។ ការឈប់ទទួលពាក្យនៅត្រឹមថ្ងៃទី ២៥ ខែ ឧសភា ឆ្នាំ ២០២០ ហើយលក្ខខណ្ឌវិញនោះ សិក្ខាកាមត្រូវភ្ជាប់មកជាមួយនូវសំណៅជាប្រវត្តិរូបសង្ខេបលិខិតបញ្ជាក់គោលបំណងនៃការសិក្សា និងគំរូសំណេរ (ប្រសិនមាន)»។
បុគ្គលិកផ្នែកទំនាក់ទំនងនៃអង្គការសិល្បៈខ្មែរអមតៈលោក គាត សុគីម បានបន្តឲ្យដឹងថា៖ «ក្រោយពីបានបញ្ចប់វគ្គបណ្តុះបណ្តាលវគ្គនេះទៅ សិក្ខាកាមក៏មានឱកាសបញ្ចេញស្នាដៃសរសេរវិភាគសិល្បៈរបស់ខ្លួន ក្នុងពេលដែលអង្គការសិល្បៈខ្មែរអមតៈ រៀបចំនូវព្រឹត្តិការណ៍សិល្បៈជាច្រើន នៅខែ តុលា ឆ្នាំ ២០២០ ខាងមុខផងដែរ»។
សម្រាប់លោកអ្នកកំពុងស្វែងរកវគ្គបណ្ដុះបណ្ដាលពី «ការសរសេរវិភាគពីសិល្បៈ» នេះ គ្រាន់តែបំពេញនូវលក្ខខណ្ឌងាយៗប៉ុណោះ ដោយលោកអ្នកអាចផ្ញើនូវសំណៅឯកសារ ដែលគោរពទៅតាមលក្ខខណ្ឌទៅកាន់សារអេឡិចត្រូនិក sokim@cambodianlivingarts.org ឬទំនាក់ទំនងតាមទូរស័ព្ទលេខ 070 596 076 ដើម្បីសួរនាំព័ត៌មានលម្អិតបន្ថែមពីការចុះឈ្មោះចូលរៀនជាមួយនឹងអ្នកជំនាញខាងសរសេរសំណេរវិភាគទៅលើសិល្បៈជាតិខ្មែរ និងមានសញ្ញាបត្របញ្ចប់ការសិក្សាពីបរទេស គឺលោក យាន រស្មី មានបទពិសោធច្រើន៕