The Phnom Penh Post Search

Search form




Logo of Phnom Penh Post newspaper Phnom Penh Post - Ford Adventure លើក​ទី ៩ នាំ​ក្បួន​រថយន្ដ​​ទៅ​ខេត្ត​ចន្ទ​បុរី​




Ford Adventure លើក​ទី ៩ នាំ​ក្បួន​រថយន្ដ​​ទៅ​ខេត្ត​ចន្ទ​បុរី​

Content image - Phnom Penh Post
ក្បួន​រថយន្ដ​ Ford គ្រប់​ម៉ូដែល​ចំនួន​ជាង ៥០ គ្រឿង​ឈប់​តម្រៀប​គ្នា​នៅ​ប្រទេស​ថៃ​។ ហុង រស្មី

Ford Adventure លើក​ទី ៩ នាំ​ក្បួន​រថយន្ដ​​ទៅ​ខេត្ត​ចន្ទ​បុរី​

ចន្ទបុរី: ក្បួន​រថយន្ដ​ដំណើរ​ផ្សង​ព្រេង​ Ford Adventure ​ពី​ភ្នំ​ពេញ ឆ្លង​កាត់​ខេត្ត​បាត់​ដំបង និង​ទឹក​ដី​ត្បូង​ពេជ្រ​នៃ​ខេត្ត​ប៉ៃលិន ឆ្ពោះ​ទៅកាន់​រមណីយដ្ឋាន​នានា​ក្នុង​ខេត្ត​​ចន្ទបុរី ប្រទេស​ថៃ​ រយៈពេល​ ៤ ថ្ងៃ ៣​ យប់ ចាប់​ពីថ្ងៃ​ទី ១០ ដល់​ទី ១៣ ខែ​ធ្នូ ឆ្នាំ ២០១៥​ ជាមួយ​នឹង​វត្តមាន​រថយន្ដ​ Ford គ្រប់ម៉ូដែល​ ​ចំនួន​ជាង ៥០ គ្រឿង​ ដែលមាន​អ្នកចូលរួម​ប្រមាណ​ជា ៣០០ នាក់​។

ពី​ព្រឹក​ព្រលឹម​ស្រាង​ៗ​ ថ្ងៃ​ទី ១០ ខែ​ធ្នូ​ ឆ្នាំ ២០១៥ កន្លង​ទៅនេះ Ford Ranger, Ford Everest, Ford Explorer និង​ម៉ូដែល​ Ford ដទៃ​ទៀត​បាន​មក​ប្រមូលផ្ដុំ​គ្នា​បង្កើត​ជា​ក្បួន​រថយន្ដ​ដ៏​ធំ​មួយ​ដោយ​បានចេញ​ដំណើរ​បន្ដ​កន្ទុយ​គ្នា​​ពី​ភ្នំ​ពេញ​ឆ្លង​កាត់​ខេត្ត​កំពង់​ឆ្នាំង​ ពោធិ៍សាត់​ បាត់​ដំបង និង​ខេត្ត​ប៉ៃលិន​ ​ក្រោម​ក្រសែភ្នែក​ដ៏​គួរ​ឲ្យ​ភ្ញាក់​ផ្អើល​ពី​ប្រជាពលរដ្ឋ​រស់នៅ​អម​សង​ខាង​ផ្លូវ​។

ចំពោះ​ដំណើរ​កម្សាន្ដ​លើក​ទី ៩ នេះ លោក ញ៉ែម រិទ្ធី ប្រធាន​គ្រប់​គ្រង​អភិវឌ្ឍ​ផ្នែក​អាជីវកម្ម​ និង​ជា​តំណាងក្រុមហ៊ុន RMA Cambodia បាន​ឲ្យ​ដឹង​ថា​៖ «ជា​រៀងរាល់​ឆ្នាំ​ក្រុមហ៊ុន​តែងតែ​រៀបចំ​ដំណើរ​កម្សាន្ដ​សម្រាប់​អតិថិជន​ទៅកាន់​រមណីយដ្ឋាន​នានា​ទាំង​នៅ​ក្នុង និង​ក្រៅ​ប្រទេស​ ជាមួយ​នឹង​ក្បួន​រថយន្ដ​ Ford គ្រប់​ម៉ូដែល​ក្នុង​គោល​បំណង​រឹត​ចំណង​សាមគ្គី​ភាព​រវាងក្រុមហ៊ុន និង​អតិថិជន​ ក៏​ដូចជា​បង្កើត​​ការ​ប្រាស្រ័យ​ទាក់​ទង​ល្អរវាង​អតិថិជន និង​អតិថិជន​ទាំងអស់​»។

ប៉ៃលិន​ជា​ទី​សំចត​មួយ​រាត្រី​របស់​ក្រុមដំណើរ​កម្សាន្ដ​អតិថិជន​ Ford លើ​ទីវាល​ដ៏​ធំល្វឹងល្វើយ​​។ នៅ​ក្នុង​ឱកាស​នៃ​ដំណើរ​កម្សាន្ដ​ដ៏​រីករាយ​នេះ អតិថិជន​ Ford និង​ក្រុម​ការងារ បាន​ធ្វើការចែក​អំណោយ​សប្បុរសធម៌​ដល់​ប្រជាពលរដ្ឋ​ក្រីក្រ​រស់​នៅ​ក្នុង​ខេត្ត​ប៉ៃលិន​ ២០០ គ្រួសារ​ រួមមាន អង្ករ ទឹក​ត្រី មី មុង ភួយ​ជាដើម។ បន្ទាប់​ពី​បាន​រៀបចំ​ដំឡើង​តង់​សម្រាក​​រៀង​ៗ​ខ្លួន​ អ្នក​ចូល​រួម​ទាំង​អស់​បានទទួល​ទាន​អាហារ​ពេល​ល្ងាច​ក្រោម​ជំនោរ​ត្រសៀក​ៗ​បក់​ផាត់​ពី​ចម្ការ​មៀន​ប៉ៃលិន (តាង៉ែន​)​ កំដរ​អារម្មណ៍​ដោយ​ក្រុមតន្ត្រីប៉ៃលិន។

Content image - Phnom Penh Post
អ្នក​ចូលរួម​ដំណើរ​កម្សាន្ដ​នាំ​គ្នា​បោះតង់​នៅ​ក្បែរ​ជើង​ភ្នំ​។ ហុង រស្មី

ថ្ងៃ​ចាប់​ផ្ដើម​រះ​បញ្ចេញ​រស្មី​ជះ​លើ​កំពូល​ភ្នំ​នា​ទិស​ខាងកើត តង់​ទាំង​អស់​ត្រូវបាន​ប្រមូល​បត់​ទុកដាក់​រួចស្រេច​ ហើយ​ភ្ញៀវ​ផ្ដើម​រូត​រះ​ចេញ​ដំណើរ​ទៅកាន់​ព្រំ​ដែន​កម្ពុជាថៃ​ត្រង់​ច្រក​ភូមិ​ផ្សារ​ព្រំ​។ សម្រាប់​ដំណើរ​កម្សាន្ដ​ថ្ងៃ​ទីពីរ ក្បួន​រថយន្ដ​ Ford បានឆ្លង​ចូល​ទឹក​ដី​ថៃ ​ទៅកម្សាន្ដ​ឧទ្យាន​បាត​សមុទ្រ​ និង​មជ្ឈមណ្ឌល​ស្រាវជ្រាវ​ព្រៃ​កោង​កាង Kung Krabean Bay ក្នុង​ខេត្តចន្ទ​បុរី​ចម្ងាយ​ប្រមា​ណ​ជាង ១០០ គីឡូម៉ែត្រ​ពី​ព្រំ​ដែន។

​ពេល​ថ្ងៃ​បាក់​រសៀល ក្បួន​រថយន្ដ​បាន​មក​កាន់រមណីយដ្ឋាន​ Beautiful The Sea ក្បែរ​ឆ្នេរ​សមុទ្រ​ Chaolao ​ដើម្បី​រៀបចំ​ដំឡើង​តង់​សម្រាប់​សម្រាក​រយៈ​ពេល​ពីរ​ថ្ងៃ​។

ឈាន​ចូល​ដល់ថ្ងៃ​ទី ៣​ ក្បួន​រថយន្ដ Ford Adventure បាន​បន្ដ​ដំណើរ​របស់​ខ្លួន​នា​ថ្ងៃ​ទី ៣ ឆ្ពោះទៅកាន់​ទឹក​ធ្លាក់ ១៣ ជាន់ និង​ទទួល​ទាន​អាហារថ្ងៃ​ត្រង់​នៅ​ឧទ្យាន​ជាតិ​ Khao Khit-chahkut ក្នុង​ខេត្ត​ចន្ទ​បុរី​ដដែល​។ ​អ្នក​ចូលរួម​ក៏ឆ្លៀត​ឱកាស​ដើរផ្សារ​ទិញ​ទំនិញ​តម្លៃ​ថោក​បោះ​ដុំ​ក្នុង​ផ្សារ​ម៉ាក្រូ​វិចខ្ចប់​យក​មក​ផ្ទះផង​ដែរ។ ​

នារាត្រី​ដ៏​សែន​មនោរម្យ តន្ដ្រី​ចាប់ផ្ដើម​ប្រគំ​ជា​ចង្វាក់​ប្រពៃណី​ខ្មែរ​លើ​ទឹក​ដីប្រទេស​ថៃ អតិថិជន​ ​ទទួល​ទាន​​អាហារ​គ្រឿង​សមុទ្រ​អាំង​ និងរីករាយ​កម្មវិធី​កំប្លុក​កំប្លែង​ពី​បុគ្គលិក​ Ford ក្នុងគោល​បំណង​ផ្ដល់​ស្នាម​ញញឹម​មិន​អាច​បំភ្លេច​បាន​។​ទោះបីជា​យ៉ាង​ណាក៏ដោយ ក៏​អតិថិជន​មួយ​ចំនួន​ដែលមិន​ផ្សាំនឹង​ការ​សម្រាក​បែប​ពាក់​កណ្ដាល​ផ្សងព្រេង​នេះ មាន​ការ​ត្អូញ​ត្អែរ​លើ​បញ្ហា​កង្វះ​បន្ទប់​ទឹក​ជា​ចម្បង​៕

អត្ថបទគួរចាប់អារម្មណ៍