.jpg)
ND Strupler ស្ថាបនិកអង្គការ ICF។ រូបថត យូសុះ អាប់ឌុលរ៉ាស់ហ៊ីម
សៀមរាប: ឃើញទិដ្ឋភាពក្នុងបរិវេណបង្ហាញពីទីលានកីឡាចម្រុះ ប្រហែលជាគិតថាវាជាមជ្ឈមណ្ឌលកីឡាមួយនៅក្រៅក្រុងសៀមរាប។
ប៉ុន្ដែតាមពិត ICF Cambodia Campus មិនត្រឹមតែផ្ដល់ទីកន្លែងហ្វឹកហាត់ និងលេងកីឡាសម្រាប់កុមារ និងមនុស្សពេញវ័យប៉ុណ្ណោះទេ ប៉ុន្ដែវាថែមទាំងជាមជ្ឈមណ្ឌលគាំពារកុមារ និងក្រុមគ្រួសារឲ្យមានការរីកចម្រើនព្រមគ្នាផងដែរ។
លោក ND Strupler ដែលបង្កើតអង្គការគ្រិស្ដបរិស័ទអន្ដរជាតិនៅកម្ពុជា ឬ ICF Cambodia ជាចលនាអង្គការគ្រិស្ដដំបូងនៅតំបន់អាស៊ីដែលមានបេសកកម្មជួយកុមារ និងក្រុមគ្រួសារឲ្យទទួលបានការអប់រំប្រសើររបៀបរបបរស់នៅ និងទំនាក់ទំនងល្អបានរៀបរាប់ប្រាប់ ភ្នំពេញ-ប៉ុស្ដិ៍ពីដំណើរដើមចមនៃការបង្កើតអង្គការដូចខាងក្រោម។
លោកបាននិយាយថា៖ «គ្រប់យ៉ាងចាប់ផ្ដើមពីពេលដែលខ្ញុំបានស្គាល់ក្មេងស្រីម្នាក់ឈ្មោះ សុផល។ សុផល ប្រសូតក្នុងរាជធានីភ្នំពេញក្នុងឆ្នាំ ១៩៧៣។ មុនសម័យសង្គ្រាមគាត់ត្រូវបានគេបោះបង់ក្នុងអាយុទើប ៣ ខែហើយគិលានុបដ្ឋាយិកាអង្គការកាកបាទក្រហមម្នាក់មកពីស្វ៊ីសបាននាំគាត់ទៅកាន់មន្ទីរពេទ្យប៉ុលពត ហើយនៅក្នុងមន្ទីរពេទ្យនោះ អ្នកស្រីបានមើលថែគាត់ តែគ្មាននរណាមកទទួលយកក្មេងនេះទេ។ អកុសលពេលសង្គ្រាមបង្ហូរឈាមចាប់ផ្ដើម គិលានុបដ្ឋាយិការូបនោះក៏សម្រេចចិត្ដយកសុផលទៅចិញ្ចឹមបីបាច់»។
ទីលានកីឡាលើទឹក ស្វាគមន៍ភ្ញៀវជាង ១ ពាន់នាក់ក្នុង ១ សប្ដាហ៍។ រូបថត ភ្នំពេញ ប៉ុស្ដិ៍
លោកបន្ដថា៖ «ពេលគាត់អាយុ ១៧ ឆ្នាំយើងបានជួបគ្នា ស្រឡាញ់គ្នា និងរៀបការជាមួយគ្នា។ យើងមិនដែលគិតដល់កម្ពុជានោះទេ រហូតដល់យើងអាយុខ្ទង់ ៣០ ឆ្នាំ ទើបយើងមកលេងកម្ពុជាជាលើកដំបូង។ ក្នុងឆ្នាំ ២០១២ យើងមកដល់ទីនេះ ហើយយើងស្រឡាញ់ប្រទេសនេះទាំងប្រជាជន និងអ្វីៗគ្រប់យ៉ាងនៅទីនេះ»។
២ ឆ្នាំក្រោយមកពួកគេបានមកកាន់កម្ពុជាម្ដងទៀត និងជាទីសំចតចុងក្រោយរបស់ពួកគេ។
ICF មានបេសកកម្មជួយដល់ប្រជាជនកម្ពុជាតាមមធ្យោបាយផ្សេងៗ។ ចំពោះជំនឿរបស់ពួកគេ ក្រុមគ្រួសារត្រូវបានលើកទឹកចិត្ដឲ្យមានការតស៊ូក្នុងឆាកជីវិត។ ពួកគេនឹងទទួលបាននូវការអប់រំកាន់តែប្រសើរ របៀបរបបរស់នៅប្រកបដោយសុខុមាលភាពតាមរយៈការលេងកីឡាទទួលទានប្រសើរ និងការថែទាំសុខភាពល្អរួមទាំងការរក្សាទំនាក់ទំនងល្អក្នុងក្រុមគ្រួសារផ្ទាល់ផងដែរ។
លោក ND Strupler បានលើកឡើងថា៖ «តាមរយៈ ICF យើងនាំយកក្ដីសង្ឃឹម និងធនធានពីស្វ៊ីស ដូច្នេះកុមារ និងក្មេងជំទង់អាចធំលូតលាស់ក្លាយជាបុគ្គលវៃឆ្លាតមានសមត្ថភាពមានក្ដីរំពឹងខ្ពស់ និងអាចទទួលជោគជ័យក្នុងឆាកជីវិត។ យើងក៏ចង់ជួយដល់អ្នកម្ដាយ និងលោកឪពុកធ្វើជាឪពុកម្ដាយដ៏ល្អមានទំនាក់ទំនងផ្អែមល្ហែមក្នុងគ្រួសារ»។
ICF បង្កើតកម្មវិធីសម្រាប់មនុស្សពេញវ័យ អ្នកម្ដាយ និងកុមារក្នុងគ្រួសារទាំងមូលតាមរយៈការជួយឧបត្ថម្ភលើការដាំដុះបន្លែទទួលទានអាហារសុខភាព បង្កើតមុខជំនួញតូចៗ និងរក្សាទំនាក់ទំនងល្អ។
ទីលានកីឡាបាល់ទាត់មានមនុស្សមកលេងចំនួន ១៨០ នាក់ក្នុង ១ សប្ដាហ៍។ រូបថត ភ្នំពេញ ប៉ុស្ដិ៍
លោកបន្ដថា៖ «សម្រាប់កុមារយើងបង្រៀនពីសុខភាពផ្លូវភេទ រៀនចេះគោរពគ្នា ហើយយើងក៏មានកម្មវិធីកីឡាមួយចំនួនទៀតដែលជួយជំរុញ ពួកគេឲ្យមានភាពស្វាហាប់ឡើង»។
លោកមើលឃើញថានៅមានក្រុមគ្រួសារជាច្រើនទៀតដែលត្រូវការជំនួយប្រភេទនេះ តែ ICF ចង់ពង្រឹង និងពង្រីកវិសាលភាពជំនួយប្រកបដោយភាពវៃឆ្លាតពីព្រោះក្រុមគ្រួសារទាំងនោះក៏ត្រូវការគុណភាពនៃការរស់នៅផងដែរ។
រយៈពេលប៉ុន្មានឆ្នាំមកនេះលោក ND Strupler មើលឃើញពីការរីកចម្រើនខ្លះៗដែលអង្គការរបស់លោកបានធ្វើការជាមួយក្រុមគ្រួសារគ្មានលទ្ធភាពបញ្ជូនកូនទៅសាលារៀន ហើយបច្ចុប្បន្នពួកគេខ្លះជិតបញ្ចប់ការសិក្សា។
ធ្វើការក្នុងប្រទេសកម្ពុជាប្រមាណ ៥ ឆ្នាំលោក Strupler បានប្រាប់ពីផលលំបាកទាំងអស់សំណើចថា ICF ត្រូវការ ២ ឆ្នាំដើម្បីចុះបញ្ជីជាអង្គការផ្លូវការ និងការរៀនភាសាជាតិរបស់លោក។
លោកបាននិយាយថា៖ «ភាសាខ្មែរពិតជាមិនងាយស្រួលរៀននោះទេរួមទាំងវប្បធម៌ផងដែរ។ ខ្ញុំជាជាតិស្វ៊ីស ហើយខ្ញុំត្រូវរៀនច្រើនពីវប្បធម៌ខ្មែរពីរបៀបនិយាយ ស្ដាប់ និងស្វែងយល់ពាក្យពេចន៍នានា»។
សកម្មភាពហាត់សមសម្ដែងសម្រាប់កម្មវិធីគ្រិស្តសាសនានៅអង្គការ ICF។ រូបថត ភ្នំពេញ ប៉ុស្ដិ៍
បច្ចុប្បន្ន ICF មានបុគ្គលិក ៧៧ នាក់ហើយរៀងរាល់ចុងសប្ដាហ៍ អង្គការទទួលភ្ញៀវចំនួនជាង ១ ពាន់នាក់ដោយការលេងកីឡានានា រួមមាន ១៨០ នាក់លេងបាល់ទាត់ ៧០៨ នាក់ក្នុង ១ សប្ដាហ៍មកលេងកីឡាលើទឹក។
លោកបន្ដថា៖ «ខ្ញុំរីករាយដែលអាចធ្វើការនៅកម្ពុជា។ ភរិយាខ្ញុំត្រូវបានសង្គ្រោះពីសង្គ្រាម ហើយពេលនេះយើងនៅទីនេះ និងអាចជួយកុមារ និងក្រុមគ្រួសាររបស់ពួកគេរាប់រយនាក់»។
អង្គការដែលរំលេចនូវទិដ្ឋភាពទីលានកីឡាទទួលបានការឧបត្ថម្ភពីសប្បុរសជននានាទូទាំងពិភពលោក ជាពិសេសពលរដ្ឋនៅអឺរ៉ុប អាល្លឺម៉ង់ ស្វ៊ីស និងបណ្ដាព្រះវិហារឯទៀត។
ឧបត្ថម្ភអង្គការ ICF Cambodia លើបេសកកម្មជួយកុមារ និងក្រុមគ្រួសាររបស់ពួកគេ លោកអ្នកអាចចុះឈ្មោះតាមវេបសាយ https://digital.icf.church/campus/sponsor-registration/ ឬចូលទៅកាន់វេបសាយរបស់អង្គការផ្ទាល់ https://digital.icf.church/campus/៕
វីដេអូ៖
