ភ្នំពេញ៖ សម្លឹងឃើញភាពលំបាករបស់មនុស្សស្រីដូចគ្នា ដែលមិនអាចទៅសាលារៀន ឬបំពេញការងារដូចធម្មតានៅពេលមករដូវ ស្រ្តីជនជាតិដាណឺម៉ាក និងជនជាតិហ្ស៊ីមបាវ៉េ បានសហការគ្នាបង្កើតអង្គការ Period Pride និងយុទ្ធនាការជំរុញកូនសិស្សស្រីឲ្យមកសាលារៀនក្នុងពេលមានរដូវ ឬ Keep Our Girl in School ដើម្បីអប់រំសិស្សនិស្សិតស្រីអំពីការថែទាំសុខភាព និងរក្សាអនាម័យនាអំឡុងពេលមករដូវប្រចាំខែ។
បច្ចុប្បន្ន ក្រុមការងាររបស់ Period Pride កំពុងស្វែងរកដៃគូសហការនៅប្រទេសនីមួយៗនៅក្នុងពិភពលោក ក៏ដូចជាក្នុងប្រទេសកម្ពុជា ផងដែរ។
សហស្ថាបនិកទាំង ២ មកពីតំបន់ ២ ផ្សេងគ្នា អ្នកស្រី Trine Sig អាយុ ៤៧ ឆ្នាំ មកពីប្រទេសដាណឺម៉ាក និងអ្នកស្រី Thelma Mafukidze អាយុ ៣៤ ឆ្នាំមកពីហ្ស៊ីមបាវ៉េ បង្កើតយុទ្ធនាការនេះឡើង ព្រោះពួកគេជឿថា ដរាបណាមនុស្សម្នាមិនផ្តល់ឱកាសឲ្យស្ត្រីគ្រប់រូបទទួលបានការអប់រំ និងប្រើប្រាស់ផលិតផលរក្សាអនាម័យ ព្រោះកង្វះខាតសម្ភារប្រើប្រាស់ពេលមករដូវនៅតែជាបញ្ហាដ៏ធំ រារាំងស្ត្រីពីការស្វែងរកសក្តានុពលរបស់ពួកគេ។
ការពិភាក្សារវាងអ្នកទាំង ២ បង្កើតឲ្យមានអង្គការ Period Pride និងយុទ្ធនាការឲ្យក្មេងស្រីទៅសាលារៀនពេលមករដូវតាំងពីថ្ងៃទី ៤ ខែតុលា ឆ្នាំ ២០១៨ ដែលយុទ្ធនាការនេះត្រូវបានចូលរួមពីសំណាក់យុវជនតាមប្រទេសនីមួយៗទូទាំងពិភពលោក។
យុទ្ធនាការនេះមានបំណងជួយដោះស្រាយវិបត្តិក្នុងពេលមករដូវរបស់ស្រ្តីនៅតាមសហគមន៍ ដែលងាយរងគ្រោះ និងមានការខ្វះខាតផ្នែកហិរញ្ញវត្ថុ ព្រមទាំងដើម្បីបង្កើនចំណេះដឹងអំពីសុខភាពអនាម័យក្នុងពេលមករដូវច្រើនជាងការបង្ខាំងពួកគេឲ្យនៅផ្ទះ។
អ្នកទាំង ២ បាននិយាយថា៖ «យើងនឹងមិនអង្គុយដោយមិនធ្វើអ្វីទាំងអស់ហើយចាំមើលភាពខ្វះខាតនៅពេលមករដូវរាំងស្ទះដល់ការបញ្ចេញសក្តានុពលរបស់ក្មេងស្រីក្នុងវ័យសិក្សា ហើយត្រូវខកខានការសិក្សារៀងរាល់ ៤ ថ្ងៃ ក្នុង ១ វដ្តរដូវ។
អ្នកនាង Thelma ដែលធ្លាប់ជា គ្រូបង្រៀននៅតាមសាលាជនបទ សង្កេតឃើញក្មេងស្រីជាច្រើនតែងអវត្តមានក្នុងថ្នាក់យ៉ាងហោចណាស់ ៣ ទៅ ៤ ថ្ងៃក្នុង ១ ខែ ដោយសារកង្វះខាតលទ្ធភាពប្រើប្រាស់សម្ភារអនាម័យពេលមករដូវ។
ក្រោយមក Thelma ព្យាយាមសិក្សា និងធ្វើការណែនាំបច្ចេកវិទ្យាថ្មី និងបានណែនាំផលិតផល ក្រណាត់អនាម័យដែលមិនឆ្លងមេរោគ និងរក្សាអនាម័យបានល្អ អាចជួយផ្លាស់ប្តូរការរស់នៅរបស់ក្មេងស្រីជាច្រើននៅតាមតំបន់ជនបទ ដែលកំពុងត្រូវការ សម្ភារអនាម័យ ហើយអាចធានាបានថា ពួកគេនៅតែអាចបន្តការទៅសាលារៀនទោះជាពេលមករដូវ។
ចំណែកឯ Trine បានចាប់ផ្តើមស្វែងរកមធ្យោបាយដោះស្រាយបញ្ហាសុខភាពស្ត្រីពេលមករដូវ។ ការស្រាវជ្រាវរបស់អ្នកស្រីបានបង្ហាញថា ពលរដ្ឋនៅសហគមន៍មួយចំនួននៅតែហាមប្រាម មនុស្សស្រីនៅក្នុងផ្ទះ មិនឲ្យចេញទៅសាលារៀន និងកន្លែងធ្វើការក្នុងអំឡុងពេលមករដូវ។
អ្នកស្រីបានលើកឡើងថា៖ «ហេតុផលមួយក្នុងចំណោមហេតុផលដែលធ្វើឲ្យមានការហាមមិនឲ្យចេញទៅក្រៅ គឺកង្វះខាតក្រណាត់អនាម័យ និងព័ត៌មានអប់រំស្តីពីការរក្សាអនាម័យឲ្យបានត្រឹមត្រូវ។ ប៉ុន្តែ ក្រណាត់អនាម័យ ដែលអាចបោក និងប្រើប្រាស់ឡើងវិញបាន អាចជាផ្នែកមួយក្នុងការដោះស្រាយបញ្ហាទាំងនេះ»។
មុនបង្កើត Period Pride នៅឆ្នាំ ២០១៤ អ្នកស្រី Trine និងមិត្តភក្តិអ្នកស្រីម្នាក់ទៀតបានបញ្ជូនក្រណាត់អនាម័យបរិស្ថានជាង ១ លានក្រណាត់ ទៅកាន់តំបន់ដែលមានស្ត្រីកំពុងត្រូវការពួកវាខ្លាំងបំផុត ហើយវាក៏បានចូលរួមចំណែកយ៉ាងខ្លាំងក្នុងការលុបបំបាត់ភាពអាម៉ាស់ពីប្រឡាក់សម្លៀកបំពាក់ ចម្លងមេរោគ និងការផ្តាច់ខ្លួនពីសង្គមនៅពេលមករដូវ។
សហស្ថាបនិកជនជាតិ ដាណឺម៉ាក បានឲ្យដឹងទៀតថា៖ «កាលពីថ្ងៃទី ២៨ ខែ ឧសភា ឆ្នាំ ២០២០ ជាទិវាអនាម័យនៃការមករដូវ Period Pride បានអញ្ជើញក្រុមការងារ និងមិត្តភក្តិចូលរួមធ្វើការចែករំលែកចំណេះដឹង និងរឿងរ៉ាវពាក់ព័ន្ធនឹងសុខភាពពេលមករដូវ។ កម្មវិធីនេះរៀបចំឡើងនៅលើបណ្តាញទំនាក់ទំនងសង្គម WhatsApp និងធ្វើការពិភាក្សាគ្នាពេញ ១ ថ្ងៃ ដោយមានការចូលរួមពីស្រី្តដែលជាមាតា ក្មេងស្រី ស្ត្រីវ័យជំទង់ និងបុរសសរុបប្រហែល ២៥០ នាក់ ដើម្បីចូលរួមអបអរទិវាអនាម័យនៃការមករដូវនេះ»។
ទោះបីជា ទិវាអនាម័យនៃការមករដូវនេះបានបញ្ចប់ ប៉ុន្តែក្រុមការងាររបស់ Period Pride នៅតែបន្តសកម្មភាពនៅលើបណ្តាញសង្គម។
អ្នកស្រី Trine បានបន្តឲ្យដឹងថា៖ «យើងនឹងស្វែងរកយុវទូតតំណាងឲ្យក្រុមមនុស្សវ័យជំទង់ និងកុមារ ដូចដែលយើងមានគម្រោងបង្កើតក្រុមយុវទូតពិសេស និងផ្តល់ឱកាសឲ្យពួកគេបំពេញកាតព្វកិច្ចជារៀងរាល់ខែជាមួយក្រុមការងារនៅក្នុងប្រទេស និងតំបន់ដែលពួកគេរស់នៅ យោងទៅលើការអប់រំអំពីអនាម័យនាពេលមករដូវនេះ»។
ព័ត៌មានបន្ថែមសូមចូលទៅកាន់ហ្វេសប៊ុក @Period Pride ឬអ៊ីមែល ts@realreliefway.com៕