ភ្នំពេញ: ចាកចេញពីក្រុងញូវយ៉កនៅថ្ងៃទី ២៨ ខែឧសភា ឆ្នាំ ១៩១៤ រថភ្លើង ក្មេងកំព្រាដែលដឹកកុមារកំព្រា ៩ នាក់ដោយឆ្ពោះដំណើរទៅតាមផ្ទះសំបែងគ្រប់ច្រកល្ហកនៃទីប្រជុំជននានាក្នុងបំណងស្វែងរកកុមារកំព្រា និងត្រូវបានបោះបង់ចោល។
សំឡេងស៊ីផ្លេបានបន្លឺសូរ ខណៈម៉ាស៊ីនរថភ្លើងរោទ៍ឡើងជាសញ្ញាចាប់ផ្ដើមដំណើរឆ្ពោះទៅមុខដែលធ្វើឲ្យបង្កើតជាអារម្មណ៍ចម្រុះរួមទាំងចិត្ដអន្ទះសា សំណើចក្អាកក្អាយ និងក្រៀមក្រំចិត្ដ។
ពួកគេជិះរថភ្លើងជាមួយក្ដីសង្ឃឹមក្នុងការស្វែងរកឪពុកម្ដាយផ្ដល់ភាពកក់ក្ដៅ ស្វែងរកគ្រែ និងអាហារគ្រប់គ្រាន់ដើម្បីបំពេញភាពស្រេកឃ្លាន។ ពួកគេជិះរថភ្លើងក្មេងកំព្រាក៏ព្រោះតែមជ្ឈមណ្ឌលកុមារកំព្រាជោរជន់ពេក និងទីក្រុងមិនស្វាគមន៍ក្មេងកំព្រាកខ្វក់ដែលដើរត្រាច់ចរពាសពេញផ្លូវ។
«រថភ្លើងក្មេងកំព្រា» ប្រលោមលោកនិពន្ធដោយកវី អាមេរិក អូរ៉ាដ ហារីស ត្រូវបានក្រុម Phnom Penh Players លើកយកមកសម្ដែងជាថ្មីដោយនាំអារម្មណ៍មហាជនវិលទៅកាន់សម័យកាលខ្មៅងងឹតនៃប្រវត្ដិសាស្ដ្រពេលកុមាររាប់សែននាក់ដែលត្រូវបានបោះបង់ អត់ទីពំនាក់ ឬរស់នៅតាមចិញ្ចើមផ្លូវ ដោយសារឪពុកម្ដាយបានស្លាប់ ឬអស់លទ្ធភាពចិញ្ចឹមបីបាច់ពួកគេ។
យោងតាមសេចក្ដីប្រកាសរបស់ Phnom Penh Players បានបង្ហាញថា៖ «ការសម្ដែងនឹងបង្ហាញពីសមត្ថភាពរបស់កុមារដ៏មានទេពកោសល្យ។ តួសម្ដែងជាកុមារទាំងនោះមកពីប្រវត្ដិគ្រួសារ ជនជាតិ និងសាលាផ្សេងៗ ដោយការជួបជុំគ្នាប្រារឰព្រឹត្ដិការណ៍ដើម្បីកុមារ»។
Phnom Penh Players បានឲ្យដឹងថាសហផលិតករ Chelsea Middendorf និង Jo-Ann Lim បានសម្រេចចិត្ដដឹកនាំ និងរៀបចំការសម្ដែងនេះរួមគ្នាដោយសារពួកគេចង់ផ្ដល់ឲ្យកុមារក្រុងភ្នំពេញនូវឱកាសសម្ដែងរឿងរ៉ាវស្ដីពីកុមារ។ ចំពោះតួអង្គជាច្រើនការសម្ដែងនេះជាលើកដំបូងរបស់ពួកគេ ដោយតួសម្ដែងក្មេងបំផុតគឺមានអាយុត្រឹមតែ ៨ ឆ្នាំព្រមទាំងតួអង្គជាមនុស្សធំ និងកុមារផ្សេងៗទៀត។
Phnom Penh Players ដែលមានឈ្មោះបោះសំឡេងក្នុងចំណោមសហគមន៍ជនបរទេសជាជាងពលរដ្ឋខ្មែរ រមែងរៃអង្គាសប្រាក់ជួយក្នុងទង្វើមនុស្សធម៌ជាហូរហែនៅកម្ពុជាបានបន្ដថា៖ «ការសុំកូនចិញ្ចឹម និងមជ្ឈមណ្ឌលកុមារកំព្រា ជាអ្វីដែលត្រូវបានជជែកយ៉ាងទូលំទូលាយនៅកម្ពុជា តែកុមារជាច្រើនមិនមានការយល់ដឹងច្រើនអំពីបញ្ហានេះឡើយ។ ការសម្ដែងនេះបានផ្ដល់ឲ្យកុមារ និងក្រុមគ្រួសារនូវឱកាសស្វែងយល់ពីបញ្ហាទាំងនេះសម្រាប់ជាការជជែកវែកញែកបន្ថែម»។
Phnom Penh Players បានសរសេរលើទំព័រហ្វេសប៊ុកភ្ជាប់រូបភាពក្រុមកុមារនៅជុំវិញរ៉ឺម៉កបិទប៉ាណូរឿង «រថភ្លើងក្មេងកំព្រា» ថា៖ «រាត្រីបើកសម្ពោធនៅប៉ុន្មានថ្ងៃទៀត។ ក្រុមការងារ និងក្រុមតួសម្ដែងរឿង រថភ្លើងក្មេងកំព្រាកំពុងមមាញឹកខ្លាំងដើម្បីបញ្ចប់កិច្ចការឲ្យបានល្អ។ យើងរំពឹងទទួលស្វាគមន៍វត្ដមានរបស់លោកអ្នកជាច្រើន»។
មិនខុសពីការសម្ដែងជាច្រើនកន្លងមកល្ខោនរឿង «រថភ្លើងក្មេងកំព្រា» របស់Phnom Penh Players ដែលកៀរគរក្រុមសម្ដែងជាច្រើនជាកុមារក៏ជាឱកាសរៃអង្គាសប្រាក់សម្រាប់ជួយដល់កិច្ចការសង្គមផងដែរ។
ប្រភពដដែលបានបញ្ជាក់ថា៖ «ចំណូលទាំងអស់ដែលទទួលបានពីការសម្ដែងនេះនឹងប្រគល់ជូនដល់ Cambodian Organization for Living and Temporary Care (COLT) ជាអង្គការដែលជួយដល់សហគមន៍គាំពារកុមារនៅកម្ពុជា។ COLT បានមូលនិធិដែលទទួលបានពីកិច្ចខិតខំប្រឹងប្រែងនានាដើម្បីឧបត្ថម្ភ និងផ្ដល់ការអប់រំដល់កុមារព្រមទាំងសេវាកម្មសង្គមឪពុកម្ដាយ។
ល្ខោនរឿង «រថភ្លើងក្មេងកំព្រា» នឹងត្រូវបានសម្ដែងនៅសមាគមសិល្បៈសុវណ្ណភូមិ ផ្ទះលេខ ១៦៦ ផ្លូវ ៩៩ រាជធានីភ្នំពេញនៅថ្ងៃទី ៥ និងទី ៦ ខែមេសា ម៉ោង ៧ យប់ និងថ្ងៃទី ៧ ខែមេសានៅម៉ោង ៥ ល្ងាច។
សំបុត្រមានតម្លៃ ១០ ដុល្លារម្នាក់ហើយសិស្សលើសពី ១០ នាក់នឹងទទួលបានការបញ្ចុះតម្លៃពិសេសដែលមហាជនអាចរកទិញបាននៅ The Box Office - Phnom Penh, Lot 369 Cafe & Bar - TTP, Lot 369 Cafe & Bar - BKK និង Kwest Restaurant ឬទាក់ទងផលិតករទាំង ២ Chelsea Middendorf និង Jo-Ann Lim តាមរយៈអ៊ីមែល chelsea.middendorf@gmail.com និងjoannconsultant@gmail.com៕