.jpg)
TADA មិនរកប្រាក់ចំណូលផ្ទាល់ពីអ្នកបើកបរតាក់ស៊ីទេ ហើយពួកគេក៏មិនបាច់បារម្ភពីការអស់កម្រៃជើងសា។ ហុង មិនា
ភ្នំពេញ: កម្ពុជាគឺជាគោលដៅទី ២ បន្ទាប់ពីប្រតិបត្ដិការដ៏ជោគជ័យក្នុងទឹកដីសិង្ហបុរីលើសេវាកម្មតាក់ស៊ីដំណើរការហៅតាមកម្មវិធីទូរស័ព្ទដៃដែលកំពុងពេញនិយមចំពោះកម្មវិធីក្រុមហ៊ុន Pass App និង Grab។
TADA ជាភាសាកូរ៉េដែលមានន័យថា «តោះជិះ» គឺជាក្រុមហ៊ុនផ្ដល់សេវាកម្មរថយន្ដតាក់ស៊ីមិនគិតប្រាក់កម្រៃជើងសាដំបូងបំផុត និងថ្មីបំផុតនៅកម្ពុជា ទើបបានចុះបញ្ជីសហការជាមួយអ្នកបើកបររថយន្ដតាក់ស៊ីជាង ២០០ នាក់នៅថ្ងៃបើកសម្ពោធកាលពីពាក់កណ្ដាលខែមករាកន្លងទៅ។
ក្រោមទស្សនវិស័យជំនួញ «បង្កើតទំនាក់ទំនងជ្រាលជ្រៅ និងមានអត្ថន័យជាមួយដៃគូអ្នកបើកបរទាំងអស់» TADA ចង់ឲ្យអ្នកបើកបរផ្ដល់សេវាកម្មជូនភ្ញៀវឥតមានស្ដ្រេសដោយមិនចំណាយកម្រៃជើងសា ១ កាក់ ១ សេនឡើយ។
ស្ថាបនិក និងអគ្គនាយក TADA លោក កាយ វូ បានឲ្យដឹងថា៖ «ពេលនេះយើងបើកទ្វារស្វាគមន៍អ្នកបើកបរទាំងអស់នៅក្រុងភ្នំពេញ។ យើងប្ដេជ្ញាជំរុញកំណើនចំណូលដល់អ្នកបើកបរនៅកម្ពុជាតាមរយៈសេវាកម្មគ្មានកម្រៃជើងសាពីពួកគាត់»។
លោកបញ្ជាក់ទៀតថា៖ «អ្នកបើកបរមិនចាំបាច់បារម្ភពីការចំណាយប្រាក់កម្រៃជើងសាដល់ក្រុមហ៊ុនទៀតទេ គឺយើងចង់ឲ្យអ្នករត់តាក់ស៊ីរីករាយក្នុងការបើកបរដោយឥតខ្វល់ខ្វាយ និងផ្ដល់សេវាកម្មល្អជូនភ្ញៀវ។ ក្រុមការងារ TADA នឹងស្ដាប់គ្រប់តម្រូវការទាំងអ្នករត់តាក់ស៊ី និងអ្នកជិះ ដើម្បីអភិវឌ្ឍសហគមន៍យើងទាំងអស់គ្នា»។
ខុសពីសេវាកម្មគូប្រជែង TADA បំពាក់នូវបច្ចេកវិទ្យា Mass Vehicle Ledger (MVL) ដើម្បីបង្កើតបណ្ដាញទំនាក់ទំនងសម្ព័ន្ធយានយន្ដដោយផ្អែកលើបច្ចេកវិទ្យាកំណត់ត្រាទិន្នន័យដូចជា ប្រតិបត្ដិការ ចលនា ឧប្បត្ដិហេតុ ការរក្សាថែទាំ និងការផ្ដល់សេវាកម្មជាក់ស្ដែងដែលត្រូវបានកត់ត្រា និងភ្ជាប់ទៅកាន់បណ្ដាញ MVL។
លោក កុល សុភា អាយុ ៤២ ឆ្នាំដែលមានបទពិសោធបើកបររថយន្ដតាក់ស៊ីម៉ែត្រ ១១ ឆ្នាំបានបង្ហាញចំណាប់អារម្មណ៍ក្នុងការចាប់ដៃគូជាមួយ TADA ថា៖ «វាមានលក្ខណពិសេសខុសប្លែកពីក្រុមហ៊ុនដទៃដោយសារ TADA ជាក្រុមហ៊ុនអត់កាត់កម្រៃជើងសាពីអ្នកបើកបរ។ វាពិតជាល្អណាស់»។
ទោះបីជាសារភាពថាលោកក៏នឹងអាចជួបផលលំបាកក្នុងកិច្ចសហការជាមួយក្រុមហ៊ុនថ្មីសន្លាង ដែលមិនទាន់មានអ្នកស្គាល់ទូលំទូលាយក្ដី ក៏លោក សុភា បង្ហាញនូវជំនឿចិត្ដមោះមុតថា ដំបូងវាលំបាកបន្ដិច ទាល់តែអ្នកបើកបរជួយផ្សព្វផ្សាយ។
អ្នកនាង សាណេល តាន់ ជាប្រធានផ្នែកទីផ្សារបាននិយាយថា៖ «យើងមិនរកប្រាក់ចំណូលផ្ទាល់ពីអ្នករត់តាក់ស៊ីទេ។ ពួកគាត់មិនបាច់បារម្ភពីការបាត់បង់កម្រៃជើងសាឡើយ។ ដូច្នេះអ្នកដំណើរក៏អាចទទួលបានអត្ថប្រយោជន៍តម្លៃទាបផងដែរ»។
លោក ឌីន រ៉ាដែត នាយកប្រតិបត្ដិនៅ TADA ប្រាប់ពីអត្ថប្រយោជន៍ថា៖ «ឧបមាថាពីទីនេះទៅព្រះបរមរាជវាំង Grab អស់ ៨៥០០ រៀល តែធាតុពិតអ្នកបើកឡានគាត់បានតែជាង ៦០០០ រៀល។ ចំពោះ TADA ពីទីនេះទៅដូចគ្នា ភ្ញៀវចំណាយតែ ៨០០០ រៀលទេ ហើយតែអ្នកបើកឡានទទួលបាន ៨០០០ រៀលពេញ ខណៈយើងមានកម្មវិធីបញ្ចុះតម្លៃដូចគ្នា»។
ជាមួយដំណើរការរថយន្ដតាក់ស៊ីហៅតាមរយៈកម្មវិធីទូរស័ព្ទដែលកំពុងមានការពេញនិយមលើប្រភេទរ៉ឺម៉កកង់ ៣ TADA ក៏បានត្រៀមខ្លួនសហការជាមួយអ្នកបើកបររ៉ឺម៉កគ្រប់ប្រភេទផងដែរ។
អ្នកនាង សាណេល តាន់ បានបន្ដថា៖ «បច្ចុប្បន្នយើងមានតែប្រភេទរថយន្ដតាក់ស៊ីធម្មតា ហើយអ្នកបើកបររ៉ឺម៉កកំពុងតែមកចុះបញ្ជីបណ្ដើរៗ។ សេវាកម្មរ៉ឺម៉កកង់ ៣ របស់យើងនឹងបើកដំណើរការបន្ដបន្ទាប់»។
TADA ត្រូវបានបើកដំណើរការដំបូងក្នុងប្រទេសសិង្ហបុរីកាលពីថ្ងៃទី ២៦ ខែកក្កដា ឆ្នាំ ២០១៨ និងមានរថយន្ដតាក់ស៊ីជាង ២៧០០០ គ្រឿង និងអ្នកប្រើប្រាស់កម្មវិធីទូរស័ព្ទ ២០ ម៉ឺននាក់។ ក្រុមហ៊ុននឹងបន្ដសម្ពោធសេវាកម្មរបស់ខ្លួននៅវៀតណាម និងម៉ាឡេស៊ីនៅប៉ុន្មានខែខាងមុខទៀតបន្ទាប់ពីសិង្ហបុរី និងកម្ពុជា៕
