ភ្នំពេញ៖ ផ្ដើមពីសំឡេងអ៊ឺនយ៉ាងគ្រលួចនូវសំនៀងខ្មែរលាយអង់គ្លេសថា «អើយ!!! Time to Rise» បន្ទរដោយសំឡេងចាប៉ីដងវែង មុនពេលបន្ថែមពាក្យពេចន៍ណែនាំបង្ហាញពីក្ដីស្រមៃរបស់សិល្បករ-សិល្បការិនីជំនាន់ថ្មី ដែលសុំបន្ដស្នាដៃពី គង់ ណៃ។
សំឡេងឧបករណ៍ខ្លុយចាប់ផ្ដើមបន្ទរអមសំឡេងចាប៉ីរហូតដល់តន្ដ្រីចាប់ផ្ដើមរន្ថាន់កញ្ឆក់អារម្មណ៍ ហើយភ្លាមៗនេះ សំឡេងចម្រៀងរ៉េបចាប់ផ្ដើមបន្លឺឡើងពីតារារ៉េប វណ្ណដា គ្រងឈុតបុរាណប្រពៃណី អង្គុយខាងក្រោម ក្បែរគ្រែលោកគ្រូចាប៉ីដងវែង គង់ ណៃ។
វីដេអូចម្រៀង «Time to Rise» ជាសំនៀងរួមគ្នារវាងអ្នកច្រៀងចាប៉ីដងវែងជើងចាស់ ជាមួយតារារ៉េបវ័យក្មេងទើបរះ ដែលផ្ដិតយកទិដ្ឋភាពដ៏ស្រស់ស្អាតនៅក្នុងសារមន្ទីរជាតិ បានទទួលការគាំទ្រខ្លាំងរហូតដល់ក្រុមអ្នកផលិត និងតារាចម្រៀងខ្លួនឯងរំភើបចង់គាំង។
«Time to Rise» ត្រូវបានបង្ហោះនៅលើបណ្ដាញសង្គម YouTube នៅយប់ថ្ងៃទី ២៨ ខែ មីនា ឆ្នាំ ២០២១ បានទទួលការទស្សនាជាង ១ លានដងក្នុងរយៈពេលក្រោម ២៤ ម៉ោង។
ទំព័រហ្វេសប៊ុករបស់ វណ្ណដា Vannda-វណ្ណដា បានសរសេរថា៖ «សុំនិយាយពាក្យក្នុងចិត្តមួយ! អ្នកគាំទ្រតន្ត្រីខ្ញុំអស្ចារ្យខ្លាំងណាស់។ អរគុណ!»។
ដោយមានកិច្ចសហការជាមួយនឹងខាងក្រុមហ៊ុនសែលកាត និងផលិតកម្មបារមី Time to Rise បានកើតចេញជារូបរាងក្រោមការខិតខំប្រឹងប្រែងរយៈពេល ៥ ខែ។
លោក ឡុង ភីតធ័រ ជាអ្នកចាត់ការទូទៅរបស់តារាចម្រៀង វណ្ណដា ប្រាប់ ភ្នំពេញ ប៉ុស្ដិ៍ថា៖ «មុនដំបូង យើងអត់សូវគិតប៉ុន្មានទេថា វាល្បីខ្លាំងកម្រិតនេះទេ។ ទោះបីជាយើងដឹងថា ក្រុមអ្នកគាំទ្រ វណ្ណដា មានចំនួនច្រើនស្រាប់យ៉ាងណាក៏ដោយ ក៏យើងអត់ធ្លាប់គិតថា វាផ្ទុះលឿនដល់ថ្នាក់នេះឡើយ។ វាផ្ទុះលឿនមែនទែន!»។
លោកនិយាយដោយពាំនាំពាក្យពេចន៍ វណ្ណដា ថា៖ «គាត់ត្រេកអរ និយាយអីអត់ចេញតែម្ដង។ គាត់មិនស្មានដល់ថា បទចម្រៀងនេះផ្ទុះខ្លាំងបែបនេះ។ អរគុណខ្លាំងមែនទែនទៅកាន់ក្រុមហ៊ុនសែលកាត និងផលិតកម្មបារមី»។
បទចម្រៀង Time to Rise ត្រូវបានចំណាយពេលផលិតរយៈពេល ៥ ខែ តាំងពីខែ វិច្ឆិកា ឆ្នាំ ២០២០ មិនយូរប៉ុន្មាន ក្រោយពី វណ្ណដា ក្លាយជាអ្នកតំណាងក្រុមហ៊ុនសែលកាត។
ដោយសារតែបទចម្រៀងនេះជាការបញ្ចូលគ្នារវាងសិល្បៈចម្រៀងចាប៉ីដងវែង និងសម័យការស្នើសុំពីក្រសួងវប្បធម៌ និងវិចិត្រសិល្បៈ ក៏ដូចជានាយកដ្ឋានភាពយន្ដ ក៏ត្រូវបានធ្វើដើម្បីទទួលបានការអនុញ្ញាតទាំងលើអត្ថន័យនៃបទចម្រៀង និងការថតនៅក្នុងសារមន្ទីរជាតិ។
លោក ភីតធ័រ អាយុ ២៤ ឆ្នាំ ឱ្យដឹងថា៖ «យើងចង់ថែរក្សាកេរដំណែលបុរាណយើងនៅក្នុងវីដេអូចម្រៀងបុរាណលាយសម័យនេះ។ យើងក៏ចង់ឱ្យប្រជាជនខ្មែរដឹងពីវប្បធម៌យើងកាន់តែច្រើន ជាពិសេសយុវវ័យដែលបច្ចុប្បន្នខ្លះមិនសូវខ្វាយខ្វល់ពាក់ព័ន្ធជាមួយសិល្បៈបុរាណប៉ុន្មានទេ»។
លោកបញ្ជាក់ពីសារៈសំខាន់ក្នុងបទចម្រៀងរបស់ វណ្ណដា ដែលជាអ្នកចូលចិត្ដចម្រៀងតាំងពីតូចជាមួយចង្វាក់ភ្លេងបែប Hip hop Trap ថា៖ «អ៊ីចឹងយើងចង់ដាស់តឿនពួកគាត់ឱ្យគិតរឿងវប្បធម៌របស់យើងផងដែរ»។
លោកបន្ដថា បទចម្រៀងដែលនិពន្ធដោយ វណ្ណដា ផ្ទាល់នេះ ក៏គិតអំពីទស្សនៈផ្សេងៗជុំវិញការបញ្ចូលទម្រង់ចាប៉ីដងវែងក្នុងបទចម្រៀងរ៉េបយុវវ័យនេះផងដែរ ទើបក្រុមការងារធ្វើការជាមួយខាងនាយកដ្ឋានភាពយន្ដ និងក្រសួងវប្បធម៌ និងវិចិត្រសិល្បៈ។
ភីតធ័រ អះអាងថា៖ «យើងត្រូវសុំការអនុញ្ញាតដោយការឆ្លងគាត់ទាំងអស់ ទាំងប៉ារ៉ូល និងអូឌីយ៉ូ ក៏ដូចជាប្លង់ថត»។
ខុសស្រឡះ ក្ដីបារម្ភរលករិះគន់ បទចម្រៀងចាប៉ីដងវែងលាយនឹងចង្វាក់កន្ដ្រាក់អារម្មណ៍ ដែលច្រៀងដង្ហោយឱ្យយុវវ័យចាប់អារម្មណ៍ចំពោះទម្រង់សិល្បៈប្រពៃណីក្នុងទិដ្ឋភាពសារមន្ទីរជាតិ បន្ថែមរូបភាពចាស់ៗ បានទាក់ទាញចិត្ដអ្នកប្រើហ្វេសប៊ុកឱ្យសរសេរការកោតសរសើររបស់ខ្លួន។
អ្នកប្រើហ្វេសប៊ុក Kann Pech សរសេរថា៖ «ពេលបានឮសំឡេងចាប៉ីដងវែង និងខ្លុយ ធ្វើឱ្យខ្ញុំឡើងព្រឺរោម។ ខ្ញុំពិតជាមានក្ដីរំភើបដែលបានឃើញវីដេអូនេះ។ យើងដឹងច្បាស់ថា តន្ដ្រីយើងមានការរីកចម្រើនខ្លាំង ហើយពិតជាកោតសរសើរចំពោះតារាចម្រៀង និងមានមោទនភាពចំពោះក្លាយជាតារារ៉េបកំពូលនៅកម្ពុជា»។
អ្នកប្រើហ្វេសប៊ុកម្នាក់ទៀត Slick បន្ថែមថា៖ «អរគុណច្រើន វណ្ណដា សម្រាប់ជំនាន់ថ្មីនេះ ដែលចូលរួមដោយលោកតាព្រឹទ្ធាចារ្យចាប៉ីដងវែង គង់ ណៃ បូកបន្ថែមជាមួយឧបករណ៍តន្ដ្រីបុរាណខ្មែរយើង រួមនឹងវីដេអូតន្ដ្រីដ៏ល្អ រស់រវើក បង្ហាញពីសម្បត្ដិវប្បធម៌ និងអរិយធម៌ដ៏ថ្កុំថ្កើងរបស់ជាតិ»។
វណ្ណដា ដែលបានចាកចេញពីស្រុកកំណើតនៃខេត្ដព្រះសីហនុមកស្វែងរកក្ដីស្រមៃនៅរាជធានីភ្នំពេញ មកស្នាក់នៅក្នុងវត្ដអារាម និងអាស្រ័យការធ្វើដំណើរជាមួយមិត្ដភក្ដិ។
យុវជនវ័យ ២៣ ឆ្នាំរូបនេះ ចេះនិពន្ធចម្រៀងតាំងពីឆ្នាំ ២០០៩ និងចាប់ផ្ដើមប្រឡូកក្នុងវិស័យសិល្បៈឆ្នាំ ២០១៦ ហើយបទ Hip hop Trap ដំបូងរបស់ វណ្ណដា គឺ «J+O ជោរ» ដែលមានអ្នកទស្សនារាប់លានដង។
យ៉ាងណាមិញ ការច្រៀងបញ្ចូលគ្នារវាងទម្រង់សិល្បៈ ២ សម័យនៅក្នុងបទចម្រៀងតែ ១ មិនមែនជាកិច្ចការងាយស្រួលប៉ុន្មានទេ ដោយត្រូវពឹងអាស្រ័យច្រើនលើបច្ចេកទេសកាត់ត និងតាក់ទិកភ្លេង។
ភីតធ័រ បាននិយាយលាយសំណើចតិចៗថា៖ «ទាក់ទងនឹងចំណុចនៃការច្រៀង និងថតរួមគ្នារវាង វណ្ណដា និងលោកគ្រូ គង់ ណៃ ដោយសារលោកជាតារាជើងចាស់ ហើយពាក្យពេចន៍គាត់មានអត្ថន័យបង្កប់ច្រើន។ យើងអាចនិយាយថា លំបាកក៏បាន ហើយអាចថា អត់លំបាកក៏បានដែរ ដោយសារគាត់អាចបត់បែនតាមយើង»។
លោកបន្ដថា៖ «ចំពោះការកាត់ត យើងពឹងទៅលើ producer ក្នុងការបញ្ចេញបញ្ចូលតាមបច្ចេកទេស»។
អ្នកចាត់ការទូទៅរូបនេះ បញ្ជាក់ពីសក្ដានុពលទៅលើការទស្សនាវីដេអូចម្រៀង Time to Rise នេះថា ចំពោះការទស្សនានេះ វាមានបញ្ហារអាក់រអួល។
លោកប្រាប់ថា៖ «យើងមានបញ្ហាជាមួយខាង YouTube ដោយសារប្រវត្ដិសាស្ដ្រយើង អត់មានវីដេអូណា មានអ្នកទស្សនា ១ លានដងរយៈពេល ២៤ ម៉ោងបែបនេះ។ YouTube ត្រូវការត្រួតពិនិត្យមើល ដែលមានការកាត់ចំនួនទស្សនា ដោយសារថ្ងៃដំបូងមានអ្នកទស្សនាជាង ១ លានដង តែគាត់កាត់នៅសល់ជាង 600k»។
លោកបញ្ជាក់ថា៖ «ម៉ោង ៨ យប់មិញ [ថ្ងៃទី ៣០] យើងបាន ១,៦ លានរួចហើយ តែ YouTube កាត់នៅសល់ត្រឹម ១ លានវិញ ហើយឥឡូវយើងបាន ១,៣ លានដងវិញ»។
ក្រៅពីច្រៀងលើកស្ទួយទម្រង់សិល្បៈបុរាណ Time to Rise ក៏លើកពីវីរភាពតារាចម្រៀងរៀមច្បងផងដែរ៕