ភ្នំពេញ : ផ្ដើមពីការបង្រៀនរាំ និងឧបត្ថម្ភរបស់លោកTuy Kay kaySobilចំពោះកុមាររស់នៅអនាថាលើចិញ្ចើមគ្មានគោលដៅជីវិតតែ ៩ នាក់រហូតដល់ការបើកសម្ពោធមជ្ឈមណ្ឌលជាផ្លូវការក្នុងឆ្នាំ២០០៨ ដែលមានសិស្សជាង ១០០ នាក់ក្នុងមួយថ្ងៃពេលនេះ Tiny Toonesដែលបានបំពេញបេសកកម្មដ៏វែងឆ្ងាយលើវិថីសិល្បៈហ៊ីបហបនិងការអប់រំវិជ្ជាជីវៈ ត្រៀមរៀបចំប្រារឰកម្មវិធីជប់លៀងហ៊ីបហបធំសម្បើមមួយដើម្បីអបអរខួប ១០ ឆ្នាំរបស់ខ្លួននាចុងសប្ដាហ៍នេះ។
ពិធីជប់លៀងហ៊ីបហប មួយទសវត្សរ៍ ដែលរំឭកពីការបើកទ្វារដំបូងរបស់ Tiny Toonesនិងការប្រើប្រាស់សិល្បៈហ៊ីបហបផ្សារភ្ជាប់ទំនាក់ទំនងកុមារអនាថាជាមួយសង្គម និងការអប់រំ នឹងមានកម្មវិធីកម្សាន្ដជាច្រើន រួមមាន ការបង្ហាញក្បាច់រាំហ៊ីបហប ឌីជេ សកម្មភាពទេពកោសល្យគំនូរលើជញ្ជាំង ព្រមទាំង ការសម្ដែងជាច្រើនទៀតពីសំណាក់តារាល្បីៗប្រចាំកម្ពុជា។
ជាមួយនឹងគម្រោងជួយកុមារចាកផុតពីអំពើអបាយមុខ បងធំ គ្រឿងញៀន និងទង្វើឧក្រិដ្ឋក្នុងសង្គម ដោយឈានចាប់ការអប់រំ និងពន្លឺជីវិត រយៈពេល ១០ ឆ្នាំមកនេះ Tiny Toonesបានជួយកុមារជាង ១៥០០០ នាក់ ទទួលបានការសិក្សា និងមុខជំនាញពិតប្រាកដ។
របាយការណ៍របស់ Tiny Toonesបានបង្ហាញថា៖ «ក្នុងចំណោមកុមារជាង ១៥០០០ នាក់ មជ្ឈមណ្ឌលទទួលសិស្សចូលរៀនជាង ១០០ នាក់រៀងរាល់ថ្ងៃ។ សិស្ស ៨០ ភាគរយ ដែលភាគច្រើនជាកុមារបោះបង់ការសិក្សា ឬមិនធ្លាប់ចូលរៀនទាល់តែសោះ បានវិលទៅកាន់ការអប់រំសាលារដ្ឋវិញ។ ៩៦ ភាគរយទទួលបានការងារដ៏សមរម្យក្នុងសង្គម ខណៈរាប់ពាន់នាក់ផ្សេងទៀត ចាកផុតពីគ្រឿងញៀន និងបទឧក្រិដ្ឋនានា ហើយខ្លះទៀតបានក្លាយជាតារារ៉េប ក្រុមរាំ និងសិល្បករល្បីៗ»។
លោក Tuy “KK” Sobil ជាស្ថាបនិក Tiny Toonesបានឲ្យដឹងថា៖ «ពេលយើងបង្កើត Tiny Toonesកាលពី ១០ ឆ្នាំមុន ក្ដីសង្ឃឹមធំបំផុតរបស់ខ្ញុំគឺថា យ៉ាងហោចណាស់ក្នុងចំណោមពួកគេម្នាក់អាចស្វែងរកពន្លឺជីវិតដ៏ជោគជ័យ។ ថ្ងៃនេះខ្ញុំបានឃើញកុមារជំនាន់ថ្មីដំបូងថាពួកគេជាអ្នកសិល្បៈល្បីឈ្មោះជាអ្នកជំនួញដ៏ជោគជ័យនិងគ្រូបង្រៀនប្រកបដោយវិជ្ជាជីវៈ»។
ជាមួយនឹងការបើកទូលាយសម្រាប់កុមារគ្រប់មជ្ឈដ្ឋាន ទោះភាគច្រើនជាកុមារក្រីក្រ អង្គការកុមារមួយនេះ បានផ្ដល់ការអប់រំលើសមត្ថភាពចំណេះដឹងបន្ថែមលើជំនាញហ៊ីបហប និងក្បាច់រាំ ជាមួយវគ្គសិក្សាភាសាខ្មែរ អង់គ្លេស កុំព្យូទ័រ និងគណិតវិទ្យាដើម្បីជាទុនបំភ្លឺផ្លូវ។
លោកShhortជាអ្នកគ្រប់គ្រងទូទៅ Tiny Toonesបានឲ្យដឹងថា៖ «ចំពោះការបង្រៀនក្បាច់រាំ យើងមិនមានការលំបាកណែនាំប្រាប់ក្មេងប្រុសៗនោះទេ តែយើងត្រូវការពេលវេលាច្រើនក្នុងការបញ្ចុះបញ្ចូលឪពុកម្ដាយក្មេងស្រីៗ ពីព្រោះពួកគេមិនចង់ឲ្យកូនខ្លួនរៀនរាំដោយខ្លាចបារម្ភពីវប្បធម៌។ តាមពិត យើងបានផ្ដល់ការអប់រំដល់កុមារលើសពីការរៀនរាំ ដែលនាំចិត្ដកុមារីចង់ចូលរួមជាមួយយើង»។
ដោយបានក្លាយជាតារារ៉េបអាជីពដ៏ល្បីល្បាញម្នាក់ កញ្ញា សាំង សុខសេរី ជាតារារ៉េបព័ត៌មានស្ដ្រីដំបូងបំផុតនៅកម្ពុជា និងជាអតីតសិស្សនៅ Tiny Toonesបានឲ្យដឹងថា៖ «ខ្ញុំមិនដឹងថាត្រូវធ្វើអ្វីនោះទេបើគ្មានTiny Toones។ ពួកគេបានជួយស្វែងរកទេពកោសល្យឲ្យខ្ញុំ។ Tiny Toonesបានជួយកុមារដែលស្រែកឃ្លានការសិក្សាតែគ្មានលទ្ធផលចំណាយប្រាក់។ ពួកគេថែមទាំងអាចគៀងគងកុមារមកពីគ្រប់ទិសទី។ កុមារអាចមានលទ្ធភាពសិក្សានូវអ្វីដែលខ្លួនចូលចិត្ដ។ វាពិតជាល្អខ្លាំងណាស់ ហើយខ្ញុំចង់ឃើញកុមារទាំងនេះជួបពន្លឺជីវិតនាពេលអនាគត»។
ចំពោះការបង្កើតឱកាសឲ្យកុមារក្រីក្រកម្ពុជាបានទទួលការអប់រំ និងជំនាញក្បាច់រាំ ស្ថាបនិក Tiny Toones បានរៀបរាប់អំពីដំណើរជីវិតជាជនភៀសខ្លួនទៅដល់ទឹកដីអាមេរិក និងការនិរទេសមកមាតុភូមិកំណើតវិញ។
លោកKK និយាយថា៖ «ខ្ញុំមានឱកាសច្រើនណាស់ ក្រោយពេលភៀសខ្លួនទៅអាមេរិក។ ខ្ញុំទទួលការអប់រំឥតគិតថ្លៃ និងមានឪពុកម្ដាយល្អ។ វាជាកំហុសរបស់ខ្ញុំដែលខ្ញុំធ្វើឲ្យបាត់បង់ឱកាសនេះ ដោយទៅសេពគុបជាមួយបងតូចបងធំ។ ពេលខ្ញុំត្រូវបាននិរទេសមកកាន់កម្ពុជា ខ្ញុំឃើញថា កុមារទាំងនេះគ្មានអ្វីទាំងអស់ សូម្បីតែចំណុចចាប់ផ្ដើមដ៏ល្អមួយ ក៏គ្មានដែរ។ ម្នាក់ៗ និយាយថា ពួកគេគ្មានផ្លូវងើបផុតពីទីនេះឡើយ។ តើពួកគេមានឱកាសអ្វី?»។
ស្ថាបនិក Tiny Toonesដែលប្រសូតនៅជំរំជនភៀសខ្លួនក្នុងប្រទេសថៃនិងធ្លាប់រស់នៅក្នុងក្រុងឡុងប៊ិករដ្ឋកាលីហ្វរនីញ៉ាសហរដ្ឋអាមេរិកបានបន្ដថា៖ «វាបានក្លាយជាក្ដីសុបិនរបស់ខ្ញុំដែលចង់ធ្វើជាបងធំម្នាក់។ ខ្ញុំចង់ជួយពួកគេឆ្លងឧបសគ្គជីវិតនេះដោយមិនធ្លាក់ទៅក្នុងអំពើឧបាយមុខដូចរូបខ្ញុំ។ ដឹងទេថាពេលខ្ញុំនៅក្មេង ខ្ញុំគ្រាន់តែចង់ទទួលជោគជ័យនិងប្រាក់ប៉ុណ្ណោះ។ ប៉ុន្ដែខ្ញុំឆ្លងផុតដំណាក់កាលនោះហើយ។ ពេលនេះខ្ញុំចង់ឲ្យកូនៗរបស់ខ្ញុំទាំងកូនបង្កើតនិងកូនក្នុងមជ្ឈមណ្ឌល Tiny Toonesទទួលជោគជ័យក្នុងជីវិត»។
លោកបានបញ្ជាក់ថា៖ «ពេលអនាគតខ្ញុំចង់ឲ្យ Tiny Toonesពង្រីកខ្លួនកាន់តែធំ មានទីកន្លែងកាន់តែប្រសើរ ដើម្បីបើកទ្វារស្វាគមន៍សហគមន៍ទាំងមូល ជាពិសេស កុមារដែលត្រូវការការអប់រំ។ ខ្ញុំចង់ជួយកុមារបន្ថែមទៀតដើម្បីទទួលបានពន្លឺជីវិតថ្មី។ ទោះបីជាខ្ញុំ និងអ្នករាល់គ្នានៅទីនេះទៅបាត់ ខ្ញុំសង្ឃឹមថា Tiny Toonesនៅតែបន្ដបេសកកម្មរបស់ខ្លួនជាដរាប។ ខ្ញុំរំពឹងថាវិស័យអប់រំនៅកម្ពុជានឹងកាន់តែប្រសើរតែទោះជាចឹងក៏ដោយ ក៏ខ្ញុំនៅតែចង់ឲ្យពួកយើងបន្ដជួយកុមារដែលត្រូវការយើង»។
ពិធីជប់លៀងហ៊ីបហប Tiny Toonesអបអរខួប ១០ ឆ្នាំ ដែលនឹងមានការចូលរួមពីសិល្បករជាច្រើន ដូចជា កញ្ញា សាំង សុខសេរី KlapYaHandz, 12me, Kreative Kings, Nikki Nikki, Khmer Thorsue, DJ Cake, DJ Niko Yu, DJ Jay, DJ Shadow, DJ B-Roc, Kbach Crew នឹងប្រារឰឡើងនៅFactory Phnom Penh ផ្លូវជាតិលេខ ២ ថ្ងៃទី ៣០ ខែមិថុនា ឆ្នាំ២០១៨ វេលាម៉ោង ១២ ថ្ងៃត្រង់ដល់ម៉ោង ៦ ល្ងាច។ ព្រឹត្ដិការណ៍ បើកទ្វារស្វាគមន៍មហាជនចូលរួមដោយសេរី៕