.jpg)
ធុងបន្លែរបស់ក្រុមហ៊ុន TWIN Agri-Tech ដែលច្នៃដាំល្ពៅ ឬបន្លែផ្សេងៗសម្រាប់លម្អ និងអាចធ្វើជាម្ហូបប្រចាំគ្រួសារ។ រូបថត សហការី
ភ្នំពេញ៖ កុំចាំបាច់ទាល់តែមានក្បាលដីទំនេរធំទូលាយ ឬដីចម្ការរាប់សិបម៉ែត្រនោះ ឲ្យតែមានកន្លែងសល់ទំនេរចន្លោះត្រឹមតែ ២-៣ ម៉ែត្រ ក៏អាចប្រែក្លាយជាកសិដ្ឋានដាំបន្លែបង្ការគ្រប់ប្រភេទមានទិដ្ឋភាពបៃតងនៅឯមុខផ្ទះ ការិយាល័យ អាហារដ្ឋាន និងហាងកាហ្វេបានហើយ ជាមួយធុងដាំបន្លែពីក្រុមហ៊ុនផលិតជីសរីរាង្គ TWIN Agri Tech Co.Ltd ដោយរីករាយ។
TWIN Agri Tech Co.Ltd គឺជាអ្នកជំនាញខាងផលិតជីសរីរាង្គធំមួយ ទាំងជីអាចម៍ជន្លេន និងជីកំប៉ុស ដែលចាប់ផ្តើមនៅឆ្នាំ ២០១៣ ខណៈការច្នៃធុងដាំបន្លែ ទើបមាននៅក្នុងរយៈពេលប៉ុន្មានឆ្នាំចុងក្រោយនេះប៉ុណ្ណោះ ដោយសារមានទំនោរនៃការដាំបន្លែនានារួមមាន ដូចជា ស្ពៃចង្កឹះ ស្ពៃតឿ ស្ពៃខ្មៅ ស្ពៃក្តោប សាលាដ ខាត់ណា ប៉េងប៉ោះ ឬដំណាំប្រភេទវល្លិនានា មានទិដ្ឋភាពបៃតង សម្រាប់ជាការលម្អ និងចម្អិនធ្វើម្ហូបអាហារជាលក្ខណៈគ្រួសារបានទៀតផង។
កសិកម្មលក្ខណៈគ្រួសារ ដែលប្រើធុងដាំបន្លែ និងជីពីក្រុមហ៊ុនTWIN Agri-Tech។ រូបថត សហការី
លោក គីម នីណូ នាយកប្រតិបត្តិក្រុមហ៊ុន TWIN Agri Tech Co.Ltd បានបង្ហើបប្រាប់ភ្នំពេញ ប៉ុស្តិ៍ ថា៖ «កាលពីដំបូង ក្រុមហ៊ុនយើងគ្រាន់តែបានផលិតជីលក់តែប៉ុណ្ណោះ ដែលក៏ជាការងារបានចូលរួមមួយចំណែកក្នុងការជួយរក្សាបរិស្ថាន គឺមិនទាន់ច្នៃធុងដាំបន្លែឡើយទេ។ តែប៉ុន្មានឆ្នាំចុងក្រោយនេះ សង្កេតឃើញបងប្អូនខ្មែរយើងហាក់មាននូវទំនោរចូលចិត្តដាំបន្លែបង្ការបែបសរីរាង្គធម្មជាតិ ឬរុក្ខជាតិវល្លិនានា ដើម្បីជាការដាក់លម្អនៅតាមផ្ទះក្តី នៅទីកន្លែងធ្វើការ ឬការិយាល័យនៃក្រុមហ៊ុនក្តី និងលម្អតាមអាហារដ្ឋាន ក៏ដូចហាងកាហ្វេជាដើមនោះ យើងក៏ច្នៃធុងដាំបន្លែនេះ ឆ្លើយតបតាមសេចក្តីត្រូវការ»។
នាយកប្រតិបត្តិរូបនេះ បន្តថា៖ «ធុងដាំបន្លែនោះ យើងមាន ២ ប្រភេទ គឺធុងដាំបន្លែទី១ អាចដាំបន្លែចន្លោះពី ៥៥ ទៅ ៦០ គុម្ព ហើយអាចផ្ទុកជីចំណុះជិត ២០០ គីឡូក្រាម និងប្រភេទទី២ អាចដាំបន្លែចន្លោះ ២៥ ទៅ ៣០ គុម្ព ដែលអាចផ្ទុកជីចំណុះជិត ៩០ គីឡូក្រាម។ ចំពោះតម្លៃធុងដាំបន្លែទី១ លក់ក្នុងតម្លៃ ១២០ ដុល្លារ សម្រាប់ ១ កញ្ចប់ ដែលមានធុងដាំបន្លែ ១ កំប្លេ មានជីចំណុះជិត ២០០ គីឡូក្រាម និងអាចជ្រើសប្រភេទពូជដំណាំ ឬបន្លែ ដែលចង់ដាំជាមុន គឺក្រុមហ៊ុន នឹងជួយបណ្តុះ ដាំជូនរួចជាស្រេច ទើបដឹកជូនដល់ទីកន្លែងទៅតាមស្ថានភាពជាក់ស្តែង រីឯធុងទី២ តម្លៃ ៩០ ដុល្លារ។ សម្រាប់ក្រុងភ្នំពេញ យើងមានសេវាកម្មដឹកជូនឥតគិតថ្លៃឡើយ។ បច្ចុប្បន្ននេះ អ្នកជាវនិយមកុម្ម៉ង់ធុងប្រភេទទី១ ជាងទី២ ដោយសារអាចដាំបន្លែបានច្រើនគុម្ព ខណៈ ១ ខែ ក្រុមហ៊ុនអាចលក់បានចន្លោះ ១០-២០ ធុង ប៉ុណ្ណោះ ដោយសម្បូរគេជាវជីច្រើន គឺក្នុងរយៈពេល ១ ខែ អាចលក់បានជីរាប់រយតោនឯណោះ»។
កសិកម្មលក្ខណៈគ្រួសារ ដែលប្រើធុងដាំបន្លែ និងជីពីក្រុមហ៊ុនTWIN Agri-Tech។ រូបថត សហការី
TWIN Agri Tech Co.Ltd ជាក្រុមហ៊ុនធំជំនាញផលិតជីសរីរាង្គ ដែលបច្ចុប្បន្នក្រុមហ៊ុនចែកចាយលក់ជីទាំង ២ ប្រភេទនេះ ទូទាំងប្រទេស ដោយតម្លៃជីអាចម៍ជន្លេន ១ តោន តម្លៃ ១៥៥ ដុល្លារ និងជីកំប៉ុស ១ តោន តម្លៃ ១២៥ ដុល្លារ សម្រាប់លក់ដុំ ខណៈតម្លៃលក់រាយ ១ បេ (ទម្ងន់ ៥០ គីឡូក្រាម)តម្លៃ ១០ ដុល្លារ។
ចំពោះប្រភពកាកសំណល់ដែលផលិតជាជីកំប៉ុស និងជីអាចម៍ជន្លេន លោក គីម នីណូ ឲ្យដឹងថា៖ «យើងមានក្រុមការងារប្រមូលកាកសំណល់ពីទីតំបន់ផ្សារ និងភោជនីយដ្ឋាននានា ក្នុងក្រុងភ្នំពេញ ដែលសម្បូរកាកសំណល់ច្រើននោះ គឺផ្សារដើមគ។ ចំណែកឯបច្ចេកទេសធ្វើជីនេះ យើងបានសហការជាមួយអ្នកជំនាញធ្វើជីសរីរាង្គមកពីប្រទេស សិង្ហបុរី»។
ប្រសិនបើចង់បានជីគុណភាពខ្ពស់ តម្លៃសមរម្យ និងចង់ជាវធុងដាំបន្លែនោះ អាចទាក់ទងតាមរយៈគេហទំព័រហ្វេសប៊ុក www.facebook.com/twinagri និងតាមទូរស័ព្ទ 016 494 016៕
កាកសំណល់រុក្ខជាតិនានា ដែលក្រុមហ៊ុនTWIN Agri-Tech បានយកមកច្នៃធ្វើជាជីកំប៉ុស។ រូបថត សហការី
