ភ្នំពេញ៖ នៅផ្ទះជាពាក្យពេចន៍ដ៏ខ្លី តែមានន័យជ្រៅ។ រដ្ឋាភិបាលតាមបណ្ដាប្រទេសនានា ជុំវិញពិភពលោកបានប្រើប្រាស់ពាក្យពេចន៍ និងបង្ខំប្រជាជនឲ្យអនុវត្ដ ដើម្បីទប់ទល់នឹងការរីករាលដាលនៃវីរុសកូរ៉ូណាថ្មី។
នៅកម្ពុជា ប្រជាជនមិនត្រូវបានលើកទឹកចិត្ដឲ្យធ្វើដំណើរ បើមិនចាំបាច់រួមទាំងការជួបជុំផងដែរ។ រាជរដ្ឋាភិបាលបានដាក់ចេញនូវវិធានការនានា ដូចជាការដាក់ឲ្យសាលារៀនទាំងអស់វិស្សមកាលមុនកាលកំណត់ ការបិទសារមន្ទីរ បៀរហ្គាដេន ខារ៉ាអូខេ និងកាស៊ីណូទាំងអស់។
ឥឡូវ មនុស្សផ្ដើមនឹកភាពស្រស់ស្អាតនៃសមុទ្រ នឹកមនុស្សម្នាមកពីគ្រប់ជាតិសាសន៍ដែលមកប្រជ្រៀតគ្នាតាមប្រាង្គប្រាសាទនានា ក៏ដូចជានឹកសកម្មភាពខាងក្រៅជុំៗផងដែរ។
ផ្ទៃទឹកខៀវស្រងាត់ បោកបក់រលៃតាមចង្វាក់រលកមួយៗ អមដោយខ្យល់ជំនោរត្រសៀកដែលរសាយអស់ភាពតានតឹង ខណៈគ្រាប់ខ្សាច់សក្បុសនៅលើឆ្នេរផ្ដល់នូវភាពស្រស់ស្រាយ និងជាកន្លែងក្មេងលេងយ៉ាងរីករាយ។ អ្នកខ្លះថែមទាំងជ្រមុជទឹកមើលត្រី និងរុក្ខជាតិនានាក្រោមផ្ទៃទឹកសមុទ្រផងដែរ។ ទីឋានទាំងនេះ មាននៅឆ្នេរក្រុងព្រះសីហនុ កំពត កែប និងកោះកុង។
មុនពេលថ្ងៃរះ ភ្ញៀវទេសចរជាច្រើននាំគ្នាមកឈរចាប់ទីតាំងល្អ ដើម្បីគយគន់ថ្ងៃរះដែលផុសលើកំពូលប្រាសាទអង្គរវត្ដ ខណៈទីឋានគយគន់ថ្ងៃហៀបអស្ដង្គតដ៏ល្អបំផុតនៅប្រាសាទបាក់ខែង បាគង និងភ្នំក្រោម។
យ៉ាងណាមិញ ក្នុងកាលៈទេសៈនេះ បច្ចេកវិទ្យា VR អាចជួយ និងនាំយកទិដ្ឋភាពទាំងនោះមកដល់ក្នុងបន្ទប់ក្នុងផ្ទះសម្រាប់អ្នកត្រូវសំងំក្នុងផ្ទះរយៈពេលជាច្រើនថ្ងៃ ជាច្រើនសប្ដាហ៍ ឬរហូតដល់ខែ។
លោក អៀ សារ៉ាបុត្រ ជាស្ថាបនិក Virtual Reality Cambodia និងជានាយកគ្រប់គ្រង Hiverlab Cambodia បានឲ្យដឹងថា៖ «យើងអាចទៅលេងអង្គរវត្ដ យើងទៅសមុទ្រ ទៅកោះ ទៅស្រុកអីផ្សេងទៀត ដូចជា ក្រុងប៉ារីស អូស្ដ្រាលី និងគ្រប់កន្លែង រួមទាំងទិដ្ឋភាពបាតសមុទ្រនៅក្នុងកម្រិតរូប ៣៦០ ដឺក្រេ»។
ភ្ញៀវទេសចរថែមទាំងហោះហើរលើអវកាស និងពុះជ្រែកអាកាស ព្រមទាំងទស្សនាទិដ្ឋភាព ៣៦០ ដឺក្រេ ជុំវិញខ្លួនជាមួយរូបភាពគុណភាពខ្ពស់នៅក្នុងផ្ទះផងដែរ។
លោក សារ៉ាបុត្រ បានប្រាប់ភ្នំពេញប៉ុស្ដិ៍ថា៖ «មានប្រ៉ូក្រាមមួយ គេហៅ Google Earth ដែលល្អ ពីព្រោះបើយើងចង់ហោះទៅណា យើងអាចហោះបានជុំវិញពិភពលោក។ យើងអាចមើលតាមលម្ហអាកាស និងបណ្ដែតខ្លួនលើទីអវកាសក៏បានដែរ។ យើងអាចទស្សនារូបភាព ៣៦០ ដឺក្រេ ដែលច្បាស់ត្រជាក់ភ្នែក»។
កូនខ្មែរដែលធ្លាប់រត់ភៀសខ្លួនទៅកាន់អាមេរិកក្នុងសម័យសង្គ្រាមរូបនេះបានឲ្យដឹងថា៖ «អ្នកខ្លះនៅផ្ទះយូរពេក ដោយអត់អាចចេញជួបពួកម៉ាក បងប្អូន ពួកគេអាចមានអារម្មណ៍ស្ដ្រេស ធុញថប់ និងឯកោ។ បច្ចេកវិទ្យាអាចជួយពួកគេចាកផុតពីភាពឯកា និងស្វែងរកមិត្ដភក្ដិថ្មីៗ»។
លោកថា៖ «កម្មវិធី ឬ Social Application អាចឲ្យយើងប្រាស្រ័យទាក់ទងរវាងបុគ្គលនៅឆ្ងាយៗពីគ្នាឲ្យមកក្បែរគ្នា។ វាលែងជាបញ្ហាឯកោទៀតហើយ បើយើងផ្សារទំនាក់ទំនងតាមជាមួយអ្នកផ្សេងទៀត»។
បច្ចេកវិទ្យា VR នេះក៏បានផ្ដល់នូវបទពិសោធដូចបានទៅដល់ទីឋាននោះពិតៗ។
លោក សារ៉ាបុត្រ បានបន្ដថា៖ «VR មាន applications ច្រើនទៀត។ វាជួយទាំងសុខភាពផ្លូវកាយ និងសុខភាពផ្លូវចិត្ដ។ ជាក់ស្ដែង យើងអាចទៅស្ទូចត្រីបាន ដែលវាហាក់ដូចជាសកម្មភាពពិតៗអ៊ីចឹង។ យើងអាចលេង Tennis ហើយយើងអាចលេង Golf បើកឡាន ជិះទូក និងសកម្មភាពផ្សេងៗទៀត»។
យ៉ាងណាមិញ សកម្មភាពជាច្រើននៅលើកម្មវិធី VR App អាចដំណើរការទៅដោយការបំពាក់នូវឧបករណ៍ផ្សេងៗ ហើយសំខាន់វាមិនមានតម្លៃថោកនោះទេ ខណៈកម្ពុជាត្រូវនាំចូលសម្ភារទាំងនោះពីបរទេស។
លោក សារ៉ាបុត្រ ថា៖ «ចំពោះការរៀបចំមួយឈុតនៅផ្ទះ វាត្រូវមានឧបករណ៍ច្រើនដែរ ដូចជា កុំព្យូទ័រល្អ មានល្បឿនលឿន តម្លៃរាប់ពាន់ដុល្លារ រួមទាំងឧបករណ៍ VR និងសេនស័រជំនួយ ក៏ដូចជាសម្ភារផ្សេងៗទៀត។ ប៉ុន្ដែ VR Headset ស៊េរីថ្មីមិនចាំបាច់ប្រើខ្សែ ឬបំពាក់សេនស័រជំនួយឡើយ។ ដោយសារយើងត្រូវនាំចូល វាអាចមានតម្លៃចន្លោះពី ៦០០ ទៅ ៧០០ ដុល្លារ ក្នុង ១ គ្រឿង»។
លោកបានលើកឡើងថា នៅកម្ពុជា ពលរដ្ឋខ្លះអាចទិញត្រឹមឧបករណ៍ VR Headset ដែលមានលក់នៅក្នុងស្រុកស្រាប់ ដោយមិនចាំបាច់បញ្ជាទិញ និងរង់ចាំទំនិញយូរ។
លោក សារ៉ាបុត្រ បានបញ្ជាក់ថា៖ «វាជាឧបករណ៍បំពាក់ជាមួយទូរស័ព្ទដៃ។ យើងអាចសាកប្រើឧបករណ៍ ទោះវាមិនសូវមានគុណភាពដែលតម្លៃប្រមាណ ២០ ដុល្លារ។ យើងអាចប្រើវាមើលភាពយន្ដ 3D ឬមើលរូបភាព VR ធម្មតាៗ»៕