.jpg)
ភ្ញៀវទេសចរសប្បាយរីករាយនឹងបទពិសោធជិះក្របី នៅជាយក្រុងហ៊ុយអាន ប្រទេសវៀតណាម។ រូបថត VNS
ក្រុងហាណូយ៖ ក្របីត្រូវបានចាត់ទុកជាគូកនជិតស្និទ្ធ និងស្ថិតក្នុងចំណោមទ្រព្យសម្បត្ដិដ៏ងាយរងគ្រោះបំផុតរបស់ប្រជាកសិករ។
សម្រាប់កសិករក្រុងហ៊ុយអាន ខេត្ដក្វាងណាម សត្វក្របីក៏ជាមគ្គុទេ្ទសក៍អេកូទេសចរណ៍ រៀបចំឡើងដោយក្រុមហ៊ុនទេសចរណ៍ ជេក ត្រាន់។
ឆ្នាំឆ្លូវនេះ ពួកគេបានលើកឡើងពីគុណសម្បត្ដិរបស់សត្វបម្រើវិស័យកសិកម្មផងដែរ។
ត្រាន់ វ៉ាន់ខាវ អ្នកគ្រប់គ្រងផ្នែកលក់ និងជាម្ចាស់ក្រុមហ៊ុនបានប្រាប់ Vietnam News ថា គំនិតទេសចរណ៍ក្របីនេះបានកើតឡើង ពេលលោកដឹកនាំក្រុមទេសចរបរទេសទៅភូមិបន្លែត្រាឃ្វេ នៃទីក្រុងបុរាណហ៊ុយអាន កាលពី ១០ ឆ្នាំមុន។
លោកនិយាយថា៖ «ទេសចរបរទេសចាប់អារម្មណ៍នឹងក្របីស៊ីស្មៅ។ ពួកគេបានសុំម្ចាស់ក្របីថតរូបជាមួយក្របី។ ពួកគេតែងតែផ្ដល់ប្រាក់ធីបឱ្យប្រជាកសិករ ១ ឬ ២ ដុល្លារសម្រាប់ការថតរូបម្ដង។ ខ្ញុំគិតថា ក្របីប្រហែលជាផលិតផលទេសចរណ៍សំខាន់ ដែលនឹងអាចនាំយកប្រាក់ចំណូលបន្ថែម»។
ស្ថាបនិកហ្វេសប៊ុក ជិះក្របីលេងនៅវៀតណាមកាលពីឆ្នាំ ២០១១។ រូបថត AFP
វេលាក្រោយមកទៀត ក្រុមហ៊ុនបានប្រមែប្រមូលពលរដ្ឋចិញ្ចឹមក្របីជិត ២០ គ្រួសារ ដែលបានក្របីសរុបជាង ១០០ ក្បាលក្នុងបំណងបង្កើតទេសចរណ៍កសិកម្មដែលផ្ដល់ឱកាសឱ្យទេសចរគយគន់វាលស្រែវាលស្រូវលើខ្នងក្របី។ មុនពេលវិបត្ដិកូវីដក្នុង ១ ឆ្នាំក្រុមហ៊ុនទទួលភ្ញៀវចន្លោះពី ២ ពាន់ទៅ ៣ ពាន់នាក់ ដោយនាំចំណូលដល់គ្រួសារនីមួយៗពី ១០ ទៅ ១៥ លានដុង (ពី ៤៣៤-៦៥១ ដុល្លារ) ក្នុង ១ ឆ្នាំ។
ទេសចរក្របីប្រើពេលវេលា ៥ ម៉ោង ដោយអនុញ្ញាតឱ្យភ្ញៀវភ្លក្សរសជាតិកិច្ចការរបស់កសិករនៅលើវាលស្រែ។
លោក ខាវ បាននិយាយថា៖ «ដំបូង ប្រជាកសិករក្នុងមូលដ្ឋានមិនមានបំណងចូលរួមសេវាកម្មនេះឡើយ។ ពួកគេគិតថា ភ្ញៀវទេសចរបរទេសមិនចូលចិត្ដប្រឡាក់ប្រឡូកលើវាលស្រែ។ ខ្ញុំបានចំណាយពេលយ៉ាងច្រើន ដើម្បីបញ្ចុះបញ្ចូលពួកគេឱ្យចូលរួម»។
សំបុត្រម្នាក់តម្លៃ ១,៣ លានដុង (២៣ ម៉ឺនរៀល) បូកទាំងអាហារថ្ងៃត្រង់នៅផ្ទះស្នាក់។
កសិករ ឡេ ញៀន អាយុខ្ទង់ ៥០ ឆ្នាំ ដែលចិញ្ចឹមក្របីតាំងពីកុមារភាព ស្ថិតក្នុងចំណោមកសិករ ដែលធ្វើការជាមួយក្រុមហ៊ុនយូរបំផុត។
លោកនិយាយថា៖ «យើងតែងតែជ្រើសរើសក្របីឈ្មោលរឹងមាំ ស្លូត មានរូបរាងស្អាត ចោះច្រមុះ ត្រចៀកធំៗ និងខ្នងអ៊ែន ដែលបង្ហាញថា វាជាក្របីឧស្សាហ៍។ ក្របីភ្នែកក្រហមធំៗមិនត្រូវបានជ្រើសរើសឡើយ ដោយសារវាកាច»។
ភ្ញៀវទេសចរបរទេស និងភ្ញៀវក្នុងស្រុកចាប់អារម្មណ៍ការជិះក្របីកម្សាន្ត។ រូបថត VNS
លោកបន្ដថា៖ «យើងបង្ហាត់បង្រៀនពួកវាឱ្យចេះក្រោកឈរពេលឮសំឡេងបញ្ជា និងរួសរាយជាមួយភ្ញៀវ។ ក្របីគួរតែមានបទពិសោធលើកសិដ្ឋាន ២ ឆ្នាំ ដោយសារពួកវារហ័សរហួន និងឧស្សាហ៍។ ខ្ញុំឱ្យពួកវាហិតទឹកអប់ និងលាបក្រែមការពារកម្ដៅថ្ងៃ ដើម្បីឱ្យសាំងនឹងវត្ដមានរបស់ភ្ញៀវ»។
វិបត្ដិកូវីដសកលបានប៉ះពាល់យ៉ាងខ្លាំងលើវិស័យទូទៅ រួមទាំងទេសចរណ៍ក្របី។
លោកបន្ថែមថា៖ «មុនពេលជួបវិបត្ដិ ១ ថ្ងៃយើងទទួលភ្ញៀវពី ២០ ទៅ ១០០ នាក់។ ឥឡូវមានត្រឹម ១ ឬ ២ នាក់ ឬគ្មានសោះកាលពីឆ្នាំមុន»។
ទិសដៅត្រូវបានបង្វែរមក ភ្ញៀវទេសចរជាមួយការបញ្ចុះតម្លៃពិសេស ដោយរយៈពេល ៤៥ នាទី មានតម្លៃ ៥០ ម៉ឺនដុង (៨៨ ០០០ រៀល) ក្នុងម្នាក់។
លោកបញ្ជាក់ថា៖ «យើងតែងតែធ្វើការប្រដូចក្របីយើងនឹងរថយន្ដ BMWs បរនៅលើវាលស្រែ ដោយសារវាខ្លាំង និងមានតម្លៃថ្លៃ»៕ VNS/HR
