ទេសភាពអាងហែលទឹកជាប់ឆ្នេរសមុទ្រ នៅរីសត Nora Resorts & Hotel Thailand។ ឈឹម ស្រីនាង
កោះសាមុយ: ស្ថិតនៅភាគខាងកើតឆ្នេរសមុទ្រថៃ កោះសាមុយ ជាដែនដីទេសចរណ៍ដ៏ល្បីល្បាញមួយ ដែលទទួលភ្ញៀវទេសចរបរទេស ១,៩ លាននាក់ កាលពីឆ្នាំ ២០១៧ (ការចុះផ្សាយដោយ Bangkok Post) ដោយសារតែទីនោះសម្បូរកន្លែងកម្សាន្តទាំងពេលថ្ងៃ និងរាត្រីកាល។
អំណោយផលពីធម្មជាតិ ឆ្នេរសមុទ្រស្រស់ស្អាត មច្ឆាជីវៈចម្រុះសម្បូរបែប អារាមមានចម្លាក់ធំៗបង្កប់ជំនឿស័ក្ដិសិទ្ធិ វិថីផ្សាររាត្រីដ៏ភ្លឺវែងអន្លាយ ហាងទំនិញតូចធំ ព្រមទាំងអាហាររសជាតិឆ្ងាញ់ត្រូវមាត់អ្នកទេសចរទូទៅ នាំឲ្យកោះសាមុយស័ក្ដិសមជាទីវិស្សមកាលលម្ហែកាយ ពិសេសភ្ញៀវខ្មែរតែម្ដង។
ដំណើរទៅកាន់កោះសាមុយ អាចធ្វើទៅបានយ៉ាងងាយស្រួលតាមរយៈជើងហោះហើរ បាងកក អ៊ែរវេ ពីរាជធានីភ្នំពេញទៅ ទីក្រុងបាងកក (ថិរវេលាប្រមាណ ១ ម៉ោង) មុននឹងបន្តទៅកោះសាមុយ ដោយចំណាយពេល ត្រឹមតែ ១ ម៉ោង ១៥ នាទី។
ភ្ញៀវទេសចរខ្មែរអុំទូកកាយ៉ាក់លេងកម្សាន្ត។ ឈឹម ស្រីនាង
គ្រាន់តែទៅដល់អាកាសយានដ្ឋានសាមុយ ហ៊ុមព័ទ្ធដោយសួនច្បារ និងព្រៃភ្នំ ភ្ញៀវទេសចរដែលទិញកញ្ចប់ដំណើរកម្សាន្ត មគ្គុទ្ទេសក៍ និងរថយន្តវ៉ែនបានសំចតរង់ចាំជាស្រេច ដើម្បីជូនភ្ញៀវទៅទទួលទានអាហារថ្ងៃត្រង់នៅ The Fair House Beach Resort & Hotel ជាប់ឆ្នេរសមុទ្រតែម្ដង។
ក្រោយពីភ្លក្សអាហារសមុទ្រ ទឹកដូងក្រអូបផ្អែមឈ្ងុយឆ្ងាញ់ រួមទាំងសម្លគ្រឿងរមៀតគមដូងប្រចាំកោះសាមុយ ពេលស្រកពោះបន្តិច មគ្គុទេ្ទសក៍បាននាំភ្ញៀវទៅកាន់សណ្ឋាគារ Nora Resorts & Hotel Thailand ដែលមានអាងហែលទឹកជាប់ឆ្នេរសមុទ្រ ងាយស្រួលក្នុងការហែលទឹក និងគយគន់ទេសភាពពេលរសៀល។
សម្រាប់អាហារពេលល្ងាច មគ្គុទេ្ទសក៍នាំភ្ញៀងទៅហាងម្ហូបឆ្ងាញ់ប្រចាំតំបន់មួយឈ្មោះថា Sabienglae នៅតំបន់ Fisherman''s Village ដែលល្បីម្ហូបបែបអ្នកកោះសាមុយ មានរសជាតិឆ្ងាញ់ប្លែកមាត់ពីម្ហូបនៅក្រុងបាងកក។
ភ្ញៀវទេសចរថតរូបលើនាវាល្បឿនលឿន មុនចុះជ្រមុជទឹក។ ឈឹម ស្រីនាង
ជាមួយទេសភាពដើមដូងបំភ្លឺដោយភ្លើងអគ្គិសនី ជាប់ឆ្នេរសមុទ្រតែម្ដង តំបន់ Fisherman''s Village នេះដែរ ក៏ជាផ្សាររាត្រីមានលក់ចំណីអាហារ ភេសជ្ជៈ ស្រាក្រឡុក ការសម្ដែងគ្រវីភ្លើង ការប្រគំតន្ត្រី សម្ភារប្រើប្រាស់ គ្រឿងសិប្បកម្ម និងវត្ថុអនុស្សាវរីយ៍ដ៏ច្រើន។
នៅថ្ងៃទី ២ នៃដំណើរកម្សាន្ត ភ្ញៀវត្រូវក្រោកពីដំណេកតាំងពីព្រលឹម ដើម្បីស្រស់ស្រូបអាហារពេលព្រឹក មុននឹង ចេញដំណើរតាមនាវាល្បឿនលឿនបោះពួយទៅលេងបណ្ដុំកោះ។
មុននឹងចេញដំណើរសូមកុំភ្លេច ឡេការពារកម្តៅថ្ងៃ ឆត្រ អាវភ្លៀង ស្បែកជើងផ្ទាត់ ខោអាវមុជទឹកដៃវែង វ៉ែនតាការពារពន្លឺថ្ងៃ កាបូបមិនជ្រាបទឹក និងថ្នាំពុលទូកផងដែរ។ ដំណើរតាមនាវាលឿនរលាក់បន្តិច ប៉ុន្តែសំឡេងតន្ត្រី និងការជជែកគ្នាលេង ធ្វើឲ្យរយៈពេលជាង ១ ម៉ោង លើអូប៊័រដូចជាមិនសូវយូរទេនឹងទៅដល់ឧទ្យានមច្ឆជាតិ Angthong National Marine Park។
ភ្ញៀវទេសចរគយគន់ទេសភាពបឹងពណ៌បៃតង Talenai Lagoon នៅកណ្ដាលកោះ។ ឈឹម ស្រីនាង
ទីនោះ នាវាបានសំចតឲ្យភ្ញៀវជ្រមុជទឹកមើលត្រី និងថតរូបលេងនៅកោះ Koh Wao រយៈពេល ១ ម៉ោងសិន ទើបបន្តទៅមើលបឹងបៃតង (Talenai Lagoon) កណ្ដាលកោះដែលមានទេសភាពស្រស់ត្រកាល រួចក៏ធ្វើដំណើរទៅឆ្នេរឯកជន ១ ទៀតដើម្បីអុំទូកកាយ៉ាក់លេង មុននឹងទៅបញ្ចូលថាមពលអាហារនៅភូមិអ្នកនេសាទផាលួយ។
នៅថ្ងៃទី ៣ បន្ទាប់ពីញ៉ាំអាហារពេលព្រឹក ភ្ញៀវត្រូវបាននាំទៅអារាមចិន មានរូបសំណាកមេទ័ព គួនអ៊ី (Guan Yu) រួចបន្តទៅទស្សនាថ្មមានរាងដូចអវយវៈភេទប្រុស និងស្រី ដែលត្រូវបានអ្នកភូមិហៅថា «ថ្មតា ថ្មយាយ» ជាទីបួងសួងសុំសេចក្តីសុខ។ នៅទីនោះក៏សម្បូរអ្នកស្រុកធ្វើការ៉េមដូង និងនំកាឡាមែ ប្រចាំសាមុយ ដែលអ្នកទេសចរកម្ររំលងណាស់។ គោលដៅចុងក្រោយនៃដំណើរកម្សាន្ត គឺទៅកាន់វត្ត Pra Yai ដែលមានបដិមាព្រះធំពណ៌មាសឆ្អិនឆ្អៅ។
ភ្ញៀវទេសចរណ៍កំពុងជ្រមុជទឹកមើលត្រី និងផ្តាថ្ម។ ឈឹម ស្រីនាង
សម្រាប់ដំណើរកម្សាន្តនេះ អ្នកនាង ឡេង ផល្លី អ្នកផ្ដល់ប្រឹក្សាពាណិជ្ជកម្មប្រចាំការិយាល័យបាងកក អ៊ែរវេ នៅកម្ពុជា បានបញ្ជាក់បន្ថែមថា៖ «ដំណើរទៅកោះសាមុយ ២ យប់ ៣ ថ្ងៃ នេះ បាងកកអ៊ែរវេ បានផ្តល់ជូនជាកញ្ចប់ពិសេសតម្លៃចាប់ពី ៤២៥ ដុល្លារឡើងទៅ ក្នុងម្នាក់រួមមាន សំបុត្រយន្តហោះទៅមក ដឹកជញ្ចូនពីសណ្ឋាគារទៅព្រលានយន្តហោះ សណ្ឋាគារស្នាក់នៅ ២ យប់ជាមួយអាហារពេលព្រឹក ជាដើម។ ភ្ញៀវអាចកក់កញ្ចប់កម្សាន្តពីភ្នំពេញ ឬសៀមរាប ទៅសាមុយនេះនៅតាមភ្នាក់ងារទេសចរណ៍នានាហើយសម្រាប់កញ្ចប់នេះមានសុពលភាពរហូតដល់ខែធ្នូ ឆ្នាំ ២០១៨»៕
កូនត្រីស្អាតៗ និងផ្កាថ្មនៅក្នុងសមុទ្រកោះសាមុយ។ឈឹម ស្រីនាង
តំបន់ផ្សាររាត្រី Fisherman's Villageឈឹម ស្រីនាង
ទេសភាពស្រស់ស្អាតនៃ ថ្មតា។ឈឹម ស្រីនាង
រូបសំណាកមេទ័ព គួនអីុ នៅកោះសាមុយ។ ឈឹម ស្រីនាង
ភ្ញៀវទេសចរថតរូបនៅពីមុខវត្ត Pra Yai ដែលមានបដិមាព្រះធំពណ៌មាសឆ្អិនឆ្អៅ។ឈឹម ស្រីនាង
