ក្រុងអូរ៉េនចេស្ដេដ: បើតាមដានរាល់ដំណើរទស្សនាចរណ៍របស់អ្នកនិយមផ្សងព្រេងនៅតាមទីឋានប្លែកៗលើបណ្ដាញសង្គមអ៊ីនស្ដាក្រាមមកពីជុំវិញពិភពលោក អ្នកប្រហែលជាបានឃើញរូបភាពសត្វកុកពណ៌ផ្កាឈូកនៅលើឆ្នេរត្រូពិកឯដែនកោះអារូប៊ី។
បក្សីពណ៌ផ្កាឈូកចេញមកស៊ីចំណី ប្រឡែងលេងជាមួយនារីៗគ្រងឈុតប៊ីគីនី នៅដែនកោះអារូប៊ីកំពុងតែបង្កើតភាពល្បីល្បាញពាសពេញបណ្ដាញសង្គមក្នុងឆ្នាំនេះ។
កុកផ្កាឈូក (Flamingo) បាននាំគ្នាមករស់នៅដែនកោះអារូប៊ីអស់រយៈពេលជាច្រើនឆ្នាំ។ កាលពី ១៥ ឆ្នាំមុន កុកផ្កាឈូកមួយហ្វូងបានហោះទៅកាន់កោះឯកជន Renaissance ដោយរស់នៅលើឆ្នេរ និងចូលចិត្ដលេងជាមួយភ្ញៀវទេសចរ។ ជម្រកថ្មីមិនមែនជាទ្រុងរបស់ពួកវានោះទេ។ ពួកវាក៏រស់នៅក្នុងបរិស្ថានធម្មជាតិឯតំបន់ព្រៃកោងកាងផងដែរ។
ពពួកសត្វបក្សីកុកសម្បុរផ្កាឈូកទាំងនេះដែលអ្នកបានឃើញលើអ៊ីនស្ដាក្រាមមិនប្រាកដជាគោលដៅទេសចរណ៍សាធារណៈឡើយ ហើយបើអ្នកចង់ឃើញពួកវាអ្នកត្រូវត្រៀមគម្រោងទុកជាមុន។
ទីកន្លែងដែលអ្នកចង់ឃើញបក្សីកម្រនេះដ៏ល្បីឈ្មោះគឺកោះ Renaissance តែបើមិនទាន់កក់សណ្ឋាគារ អ៊ីចឹងភ្ញៀវមកពីក្រៅអាចទិញសំបុត្រដែលអាចឲ្យពួកគេចូលទស្សនាកោះពេញមួយថ្ងៃ ក្នុងតម្លៃ ៩៩ ដុល្លារ ដោយរួមបញ្ចូលទាំងអាហារថ្ងៃត្រង់ និងភេសជ្ជៈលើកោះថែមទៀត។
ដំណើរជិះនាវាទៅកាន់ដែនកោះកុកផ្កាឈូកនេះចំណាយពេល ១៥ នាទី និងជាបទពិសោធដ៏រីករាយ។ ដើម្បីទាក់ទាញបក្សីពណ៌ផ្កាឈូក នៅទីនោះមានម៉ាស៊ីនតូចមួយ ដែលលក់ចំណីអាហារឲ្យកុកស៊ី។
ម៉ាស៊ីននេះស៊ីប្រាក់កាក់តែប៉ុន្មានសេនដុល្លារប៉ុណ្ណោះ។ វាងាយស្រួលសម្រាប់អ្នកយកចំណីមកដាក់បញ្ចុកលើបាតដៃ តែអ្នកទៅមិនទាន់ពេលវេលាទេពួកវានឹងមិនរវីរវល់នឹងចំណីរបស់អ្នកឡើយ។ យ៉ាងណាពួកវានៅតែជាបក្សីព្រៃដែលត្រូវការធ្វើអ្វីៗដោយខ្លួនឯង។ ដូច្នេះកុំអស់សង្ឃឹម បើសម្លាញ់ពណ៌ផ្កាឈូកទាំងនេះដើរចេញពីអ្នក។
ដែនកោះនេះគឺជាជម្រកដ៏សុខុដុមរបស់ពពួកសត្វដទៃទៀត។ ក្រៅពីបក្សីកុកផ្កាឈូកដែលជាតារាល្បីប្រចាំកោះនៅមានសត្វត្រកួត បក្សីព្រៃនានា បារ៍ ភោជនីយដ្ឋាន អាងស្ប៉ា អង្រឹងចងភ្ជាប់ដើមកោងកាង និងខ្ទមឯកជនឆ្នេរជាច្រើនទៀត ដែលអ្នកគួរសម្រាកយ៉ាងតិច ១ យប់ដែរ៕HR