.jpg)
ក្យូសប្រក់ស្បូវតម្រៀបប្របតាមផ្លូវស្ពាន លម្អដោយរុក្ខជាតិបៃតង និងផ្កាចម្រុះពណ៌។ រូបថត យូសុះ អាប់ឌុលរ៉ាស់ហ៊ីម
សៀមរាបៈ រំលេចទេសភាពផ្កាចម្រុះពណ៌ ក្លិនពិដោរឈ្ងុយឈ្ងប់ លាយឡំជាមួយជំនោរធម្មជាតិត្រជាក់កាយក្រោមម្លប់ឈើត្រឈឹងត្រឈៃ ភោជនីយដ្ឋាន «ម្លប់បៃតង» ទីឋានសម្រាកលម្ហែស្ងប់ស្ងាត់បំបាត់កង្វល់ ស្រូបខ្យល់ធម្មជាតិ ភ្លក្សអាហារខ្មែរស្រុកស្រែចម្ការ កំពុងទាក់ទាញភ្ញៀវទេសចរ នៅក្នុងខេត្តសៀមរាប។
ម្លប់បៃតង ត្រូវបានបង្កើតដោយអ្នកជំនាញបដិសណ្ឋារកិច្ចម្នាក់ ដែលបានមើលឃើញពីទីតាំងអំណោយផលសម្រាប់វិស័យទេសចរណ៍។
លោក លី សុភ័ក្ត្រា អ្នកគ្រប់គ្រងបានប្រាប់ពីមូលហេតុនៃការបង្កើតភោជនីយដ្ឋាននេះថា៖ «ខ្ញុំសិក្សាទៅលើទីផ្សារភោជនីយដ្ឋាន ខ្ញុំមើលឃើញថា នៅម្តុំហ្នឹងមានតែក្យូសបែបធម្មតាអត់មានលក្ខណៈបែបគ្រួសារទេ អ៊ីចឹងបានខ្ញុំក៏សម្រេចរៀបចំបើកភោជនីយដ្ឋាននេះ គឺធ្វើតាមបែបធម្មជាតិ សម្រាប់ភ្ញៀវកម្សាន្តលក្ខណៈគ្រួសារ និងមានរៀបចំម្ហូបខ្មែរគឺចង់ឲ្យពួកគាត់ភ្លក្សរសជាតិឆ្ញាញ់បែបស្រុកស្រែ»។
បើកដំណើរការជាង ៣ ឆ្នាំ ភោជនីយដ្ឋាន ម្លប់បៃតង ត្រូវបានសាងសង់លើផ្ទៃដីជិត ២ ហិកតា ដោយរចនាបឹងឈូក និងព្រលឹត នៅចំកណ្តាល ភ្ជាប់ជាមួយស្ពានឫស្សីសម្រាប់ឆ្លងកាត់បឹងដែលមានបណ្តោយ ៤០ ម៉ែត្រ និងទទឹង ២៥ ម៉ែត្រ និងជម្រៅត្រឹមតែ ១ ម៉ែត្រ។
ស័ក្ដិសមនឹងឈ្មោះភោជនីយដ្ឋាន ម្លប់បៃតង ក្យូសឈើប្រក់ស្បូវចំនួន ១៧ ក្យូស ដែលហែហមដោយដើមត្នោត ដើមស្វាយ ដើមផាសិន ចេកទឹក ដើមរុន និងមានផ្កាចម្រុះដូចជាផ្កាស្វាយ ផ្កាស្បៃរឿង ផ្កាម៉ោងដប់ និងផ្កាឈូករ័ត្ន ផ្កាឈូក ផ្កាព្រលឹត បង្កើតបានជាបរិយាកាសអង្គុយសម្រាកគេងយោលអង្រឹងលម្ហែកាយយ៉ាងរីករាយ។
ម្ហូបស្រុកស្រែចម្ការក្នុងបរិយាកាសខ្យល់បរិសុទ្ធ។ រូបថត យូសុះ អាប់ឌុលរ៉ាស់ហ៊ីម
អ្នកគ្រប់គ្រងភោជនីយដ្ឋានវ័យ ៣១ ឆ្នាំរូបនេះបានបញ្ជាក់ថា៖ «កន្លែងខ្ញុំមានចំណុចពិសេសមួយទៀត គឺយើងដាំផ្កាឈូករ័ត្នពេញស្រែតែម្តង ពេលរីកគឺស្អាតណាស់ ភ្ញៀវមកចូលចិត្តថតរូបលេង គាត់សរសើរគ្រប់គ្នា ហើយយើងដាំ ២ ដង ចាប់ពីខែ ១២ ដល់ខែ ២ និងចាប់ពីខែ ៣ ដល់ខែ ៤»។
ក្រៅពីគយគន់សម្រស់ធម្មជាតិភ្ញៀវក៏អាចឆ្ងាញ់មាត់នឹងម្ហូបពិសេសប្រចាំភោជនីយដ្ឋានដូចជា មាន់អាំងអំបិលម្ទេស មាន់លីងអំបិលម្ទេស មាន់អាំងទឹកឃ្មុំ និងមាន់ដុតទឹកឃ្មុំ និងមានម្ហូបជាច្រើនទៀតដូចជា ត្រីដុតទឹកត្រីផ្អែម ទឹកគ្រឿង ប្រហុកលីង សម្លម្ជូរស្រែ សម្លម្ជូរព្រៃ និងស្ងោរជ្រក់។
អតីតនិស្សិតសិក្សាផ្នែកបដិសណ្ឋារកិច្ចរូបនេះបានឲ្យដឹងថា៖ «រសជាតិម្ហូបឆ្ញាញ់ គឺដោយសារម៉ាក់ខ្ញុំគាត់ចេះរូបមន្តហ្នឹង តាមម៉ាក់ប៉ារបស់គាត់ អ៊ីចឹងគាត់យករូបមន្តហ្នឹងមកច្នៃ និងបង្កើតជាមួយនឹងមាន់ និងត្រីគឺធានាថា រសជាតិឆ្ងាញ់ណាស់»។
ម្ហូបមានតម្លៃសមរម្យ ដោយត្រី ១ ក្បាល តម្លៃ ២៥ ០០០ រៀល រីឯមាន់មួយ ៥២ ០០០ រៀល ដែលភ្ញៀវអាចកុម្ម៉ង់ធ្វើម្ហូបបានជាច្រើនមុខ។ មាន់ស្រែ និងបន្លែធម្មជាតិ ត្រូវលោក លី សុភ័ក្ត្រា ចិញ្ចឹមដាំដុះ និងទិញពីអ្នកភូមិក្បែរនោះផងដែរ។
ទីនេះសម្បូររុក្ខជាតិបៃតងដូចនឹងឈ្មោះភោជនីយដ្ឋាន។ រូបថត យូសុះ អាប់ឌុលរ៉ាស់ហ៊ីម
អ្នកគ្រប់គ្រងបញ្ជាក់ថា៖ «យើងជួយទិញគាត់ ព្រោះបើគាត់យកទៅលក់នៅទីផ្សារបានតម្លៃទាប តែបើលក់ឲ្យយើង គាត់បានតម្លៃខ្ពស់ជាងទីផ្សារ ខ្ញុំមានអារម្មណ៍សប្បាយ ព្រោះបានជួយគាត់ ទោះមិនបានច្រើន តែក្នុងន័យជួយបងប្អូនខ្មែរដែរ»។
ភោជនីយដ្ឋាន ម្លប់បៃតង ចាប់បើកពីម៉ោង ៨ ព្រឹក ដល់ម៉ោង ៥ ល្ងាច ដែលមានបុគ្គលិករួសរាយរាក់ទាក់ជិត ២០ នាក់ សុទ្ធតែជាប្រជាពលរដ្ឋរស់នៅក្នុងស្រុក ដែលក្នុងនោះស្ត្រីមានអាយុច្រើនបម្រើការនៅក្នុងផ្ទះបាយ រីឯស្ត្រីវ័យក្មេងជាអ្នកបម្រើសេវាកម្ម។ នៅថ្ងៃចុងសប្ដាហ៍ បុគ្គលិកមាន សិស្ស និស្សិតដែលឆ្លៀតមកធ្វើការយកកម្រៃទៅផ្គត់ផ្គង់ការសិក្សាផងដែរ។
ថ្ងៃធម្មតា ភោជនីយដ្ឋានទទួលបានភ្ញៀវជិត ១០០ នាក់ ដោយចំនួនកើនឡើងជាងទ្វេដងនៅចុងសប្ដាហ៍។ រីឯថ្ងៃបុណ្យទាន គឺមានភ្ញៀវមកកម្សាន្តយ៉ាងច្រើនកុះករ រហូតមានភ្ញៀវមួយចំនួន ស៊ូក្រាលកន្ទេលអង្គុយលេងមាត់ទឹកទៀតផង។
ទន្ទឹមនឹងគម្រោងពង្រីកក្យូស ដាំដើមត្នោត និងផ្កាភ្ញីឲ្យកាន់តែច្រើន លោក លី សុភ័ក្ត្រា ក៏បន្ថែមឲ្យដឹងដែរថា៖ «ភ្ញៀវដែលចង់សម្រាកនៅទីនេះ ដល់ល្ងាច ក៏អាចកម្សាន្តបានតែគាត់កក់មុន គាត់អាចកម្សាន្តបានដល់ម៉ោង ៨ យប់ ខ្ញុំមានភ្លើង និងម្ហូប។ ទិដ្ឋភាពពេលយប់ គឺមានភាពល្អបំផុត រ៉ូមេនទិក និងស្ងាត់ល្អសម្រាប់អ្នកចូលចិត្តស្ងប់ស្ងាត់»។
ភោជនីយដ្ឋានម្លប់បៃតង ស្ថិតនៅក្នុង ឃុំខ្នាត ស្រុកពួក ខេត្តសៀមរាប នៅតាមផ្លូវជាតិលេខ ៦ ទៅបារាយណ៍ខាងលិច ចុះពីផ្លូវជាតិតាមស្ពានវត្តខ្នាតប្រហែល ៨00ម៉ែត្រ។ ទំនាក់ទំនងទូរស័ព្ទ ០៧០ ៥៥៨ ៦៦៦, ០១២ ៨២១ ០០៤ និង ០៩៦ ៥០ ៧៦ ៤២១ ឬ ហ្វេសប៊ុក ម្លប់បៃតង៕
វីដេអូ៖
