ក្រុងកែប៖ ចំទើតលើទីខ្ពស់នៃឧទ្យានជាតិកែប តូបឈើតូចមួយតុបតែងរូបថតក្រុមចម្រៀងរ៉ុកទសវត្សរ៍ទី ៦០ បិទភ្ជាប់ផែនទីគូរដោយដៃ ជាមួយតុឈើប្រក់ឆត្រឈរជាជួរតាមដងផ្លូវឡើងភ្នំ និងអង្រឹង ៣ ចងដើមឈើ ជាទីឋានគន់ទេសភាពឆ្នេរសមុទ្រកែបយ៉ាងត្រជាក់ចិត្ដ។
នេះជា Led Zep ហាងកាហ្វេតែ ១ គត់ស្ថិតនៅលើផ្លូវដើរព្រៃដែលមានប្រវែង ៨ គីឡូម៉ែត្រ បានក្លាយជាគោលដៅសំចតសម្រាប់ភ្ញៀវជាតិ និងអន្ដរជាតិ ក៏ដូចជាអ្នកចង់ស្រូបយកបរិយាកាសបរិសុទ្ធ។
ហាងកាហ្វេ Led Zep ដែលយកលំនាំតាមឈ្មោះក្រុមចម្រៀងរ៉ុក Led Zeppelin ចម្ងាយប្រមាណ ៣០០ ម៉ែត្រពីច្រកឡើងឧទ្យានជាតិត្រូវបានបង្កើតឡើងដោយបុរសជាតិបារាំងឈ្មោះ Christian Debinut ដែលបានចំណាយពេលជាច្រើនឆ្នាំរុករក និងគូសវាសផែនទីព្រៃភ្នំស្ថិតនៅលើទីក្រុងតូចដ៏ស្រស់ស្អាត។
កញ្ញា ស្រីពៅ និងអ្នកស្រី ឡាំង អានីកា ដែលរាប់អានបុរសបារាំងយ៉ាងស្និទ្ធស្នាលហាក់ដូចជាសាច់ញាតិបង្កើតក្នុងក្រុមគ្រួសារ បានស្នងមរតកហាងកាហ្វេ ក្រោយពេលលោក Christian បានស្លាប់កាលពីប៉ុន្មានឆ្នាំមុន។
កញ្ញា ស្រីពៅ បាននិយាយពេលកំពុងច្របាច់ទឹកក្រូចថា៖ «Led Zep ត្រូវបានបង្កើតឡើងក្នុងឆ្នាំ ២០០៥ ហើយកាលពីមុន ៩០ ភាគរយ ជាភ្ញៀវបរទេស ហើយពួកគេស្គាល់ Led Zep Café ច្បាស់ ដោយសារយើងបានផ្សព្វផ្សាយលើ Google និង TripAdvisor»។
អ្នកស្រី អានីកា បានបន្ដថា Christian បានរើមកនៅកម្ពុជាក្នុងឆ្នាំ ២០០៤ ក្រោយពេលធ្វើដំណើរឡើងចុះបារាំង-កម្ពុជាញឹកញាប់។ អ្នកស្រីបានរំឭកអតីតកាលដែលធ្វើឲ្យខ្លួនហូរទឹកភ្នែកថា៖ «គាត់ស្រឡាញ់កម្ពុជា ហើយគាត់ចង់ស្លាប់ក្នុងប្រទេសនេះ។ គាត់មានបំណងប្រាថ្នាចង់យកធាតុរបស់ខ្លួនបញ្ចុះក្នុងឧទ្យាននេះ។ គាត់ក៏សំណូមពរឲ្យយើងបន្ដកិច្ចការសម្អាតព្រៃ និងផ្លាស់ប្ដូរស្លាកសញ្ញាផងដែរ»។
អ្នកដំណើរដែលចង់ត្រាច់ចរ និងដើរកម្សាន្ដក្នុងឧទ្យានតែងតែមានចម្ងល់ថា ហេតុអ្វីបានជាផែនទីគូរដោយដៃបិទលើជញ្ជាំងតូប ត្រូវបានដាក់ស្លាកហាមថតរូប។ វាជាផែនទីបង្ហាញពីចំណុចលម្អិតក្នុងបរិវេណឧទ្យាន ដែលបុរសបារាំងចំណាយពេលជិត ២០ ឆ្នាំគូរ។
អ្នកស្រី អានីកា បានប្រាប់ភ្នំពេញ ប៉ុស្ដិ៍ ពីក្នុងតូបកាហ្វេថា៖ «ខ្ញុំមិនច្បាស់ថា គាត់ចាប់ផ្ដើមគូរតាំងពីពេលណាទេ។ តែក្រោយគូររួច គាត់បិទនៅទីនេះ និងដាក់ស្លាកហាមថត ដោយសារមានគេលួចថត និងកែចំណុចជាច្រើននៃផែនទី ដែលធ្វើឲ្យភ្ញៀវវង្វេងផ្លូវ»។
អ្នកស្រីអះអាងថា ទោះបីជាការថតត្រូវហាមឃាត់យ៉ាងណាក៏ដោយ ក៏ហាងកាហ្វេតែងតែផ្ដល់ផែនទីបង្ហាញពីទិដ្ឋភាពទូទៅនៃឧទ្យាន ជាពិសេស គោលដៅតាមផ្លូវដើរព្រៃនីមួយៗដល់ភ្ញៀវទាំងអស់។
អ្នកស្រី អានីកា ដែលបានរក្សាទុកវត្ថុអនុស្សាវរីយ៍ជាច្រើនស្ថាបនិក Led Zep បានសារភាពថា៖ «យើងពិតជាបារម្ភពីការបាត់បង់ផែនទីដែលទុកនៅទីនេះ។ មែនទែនទៅ ទោះគេឲ្យតម្លៃរហូតដល់ ២ ០០០ ដុល្លារ ក៏យើងមិនអាចលក់ដែរ។ យើងចង់រក្សាទុកស្នាដៃរបស់គាត់»។
ចំពោះអតិថិជនហាងកាហ្វេ ដែលភាគច្រើនលើសលប់ជាជនជាតិបរទេសស្រីពៅ បាននិយាយបញ្ជាក់ថា វាដោយសារតែបច្ចុប្បន្នមានការផ្សព្វផ្សាយលើបណ្ដាញសង្គមច្រើន ដែលនាំឲ្យភ្ញៀវក្នុងស្រុកមកកាន់តែច្រើន។
កញ្ញាបានឲ្យដឹងថា៖ «បច្ចុប្បន្នមានភ្ញៀវខ្មែរ និងបរទេស ៥០-៥០។ ភ្ញៀវបរទេសស្គាល់ Led Zep ១០ ឆ្នាំហើយ តែថ្មីៗនេះ អ្នកលេងហ្វេសប៊ុកមានការផ្សព្វផ្សាយច្រើន។ កន្លងមក យើងមិនបានបង្ហោះលើហ្វេសប៊ុកទេ ដោយសារយើងបារម្ភថា ភ្ញៀវខ្មែរភាគច្រើនចូលចិត្ដកុម្ម៉ង់ម្ហូបច្រើន និងកាហ្វេយីហោថ្លៃៗ។ យើងមានតែកាហ្វេធម្មតា និងអាហារសម្រន់តិចតួច ហើយភ្ញៀវ ៩០ ភាគរយ កុម្ម៉ង់ទឹកក្រូចឆ្មារ»។
នារីសក់ទង់ដែង ២ នាក់ ឈ្មោះ សេម មកពីកាណាដា និងជូលី មកពីស៊ែប៊ី អង្គុយក្រែបភេសជ្ជៈ ជជែកគ្នាលេង និងគយគន់ទេសភាពសម្រស់ឆ្នេរកែបឆ្លុះដល់ភ្នំបូកគោ មុនពេលចេញដំណើរទៅកាន់ភ្នំពេញ។
បុគ្គលិកទស្សនាវដ្ដី Southeast Asia Globe ទាំងពីរ បានប្រាប់ ភ្នំពេញ ប៉ុស្ដិ៍ ថា៖ «យើងញ៉ាំទឹកក្រូចឆ្មារទឹកកករួចឡើងរថយន្ដក្រុងទៅកាន់ភ្នំពេញវិញ»។
អ្នកស្រី ឡាំង អានីកា បានឲ្យដឹងថា ក្នុង ១ ថ្ងៃ Led Zep អាចលក់ទឹកក្រូចឆ្មារទឹកកកប្រមាណ ១០០ កែវ ហើយនៅរដូវសម្បូរភ្ញៀវខ្លាំង គឺក្រោយបុណ្យគ្រិស្តស្មាស់់រហូតដល់ចុងខែកុម្ភៈ។
ស្រីពៅ បានបញ្ជាក់ថា៖ «នៅខែភ្លៀង ដែលមានខ្យល់ខ្លាំង យើងផ្អាកលក់ និងបិទតូបបណ្ដោះអាសន្នសិន ដោយផ្អាកខែមិថុនា ឬកក្កដា ហើយខែសីហា បើកម្ដងទៀត រួចខែកញ្ញា យើងបិទវិញ ដោយសារភ្ជុំបិណ្ឌមានភ្លៀងច្រើន»។
ក្រៅពីអាហារកញ្ចប់ កាហ្វេក្ដៅ ត្រជាក់ និងភេសជ្ជៈស្រស់ៗ Led Zep មាននំ crepe ដ៏ពេញនិយម។
ហាងកាហ្វេ Led Zep ស្ថិតនៅចម្ងាយ ៣០០ ម៉ែត្រ ពីច្រកចូលឧទ្យាន និងចម្ងាយ ៧,៦ គីឡូម៉ែត្រ ពីរង្វង់មូលសេះសក្នុងទីក្រុងកែប។ ចំពោះព័ត៌មានលម្អិតមាននៅហ្វេសប៊ុក Led Zep Café ឬលេខទូរស័ព្ទ ០១០ ៣១១ ៧១២៕
វីដេអូ៖