ក្រុងហាណូយ: ដំណើរទេសចរណ៍ជាច្រើនលើដងទន្លេនានានឹងត្រូវបានអភិវឌ្ឍនាពេលអនាគតដ៏ខ្លីដើម្បីជំរុញវិស័យទេសចរណ៍ខេត្ដភាគខាងត្បូង ប៊ិញ ដួង។ នេះបើយោងតាមលោក ង្វៀង ថាញ់ផុង អគ្គនាយករងនៃនាយកដ្ឋានវប្បធម៌ កីឡា និងទេសចរណ៍ខេត្ដ។
នាយកដ្ឋានសហការជាមួយរដ្ឋបាលទេសចរណ៍ជាតិវៀតណាមរៀបចំសន្និសីទដើម្បីណែនាំសក្ដានុពលទេសចរណ៍ខេត្ដកាលពីថ្ងៃអង្គារក្នុងទីក្រុងហាណូយ។
លោក ថាញ់ផុង បាននិយាយថាព្រឹត្ដិការណ៍នោះនឹងជួយទាក់ទាញភ្ញៀវទេសចរមកកាន់ខេត្ដប៊ិញដួងកាន់តែច្រើនរួមជាមួយនឹងក្រុមហ៊ុនទេសចរណ៍ផងដែរ។
លោក ផុង បានបន្ដថា៖ «ប៊ិញដួង ជាបណ្ដុំនៃទន្លេសៃហ្គន ទន្លេដុងណៃ និងបេ បង្កើតបានជាទស្សនីយភាពដ៏ស្រស់ត្រកាល ហើយវិស័យទេសចរណ៍បង្កើតសក្ដានុពលតាមដងទន្លេទាំងនេះ»។
លោកបានលើកឡើងថា៖ «យើងប្ដេជ្ញាចិត្ដថា អភិវឌ្ឍទេសចរណ៍ទន្លេជាយុទ្ធសាស្ដ្រដ៏ល្អសម្រាប់ឧស្សាហកម្មទេសចរណ៍ខេត្ដនាពេលខាងមុខ។ ខេត្ដប៊ិញដួង គឺជាគោលដៅទាក់ទាញភ្ញៀវទេសចរមកសម្រាកលម្ហែ និងកម្សាន្ដបែបអេកូទេសចរណ៍»។
លោកបន្ដថា៖ «ចំនួនភ្ញៀវទេសចរមកកាន់ខេត្ដប៊ិញដួង កើនឡើងរៀងរាល់ឆ្នាំ។ ខេត្ដនេះទទួលភ្ញៀវ ៤,៥៥ លាន និង ៤,៧៥ លាននាក់ក្នុងឆ្នាំ ២០១៧ និងឆ្នាំ ២០១៨»។
លោក ភួង ក្វាងថាង អនុប្រធានសមាគមទេសចរណ៍ក្រុងហាណូយបាននិយាយថា ទីភ្នាក់ងារទេសចរណ៍ក្រុងហាណូយ និងតំបន់ភាគខាងជើងមានបំណងសហការជាមួយនឹងដៃគូនានាក្នុងខេត្ដប៊ិញដួង។
លោកបានឲ្យដឹងថា៖ «នេះគឺជាលើកដំបូងដែលទេសចរណ៍ខេត្ដត្រូវបានលើកស្ទួយក្នុងទីក្រុងហាណូយដែលផ្ដល់ថា ក្រុមអាជ្ញាធរខេត្ដចង់បើកទ្វារផ្សារទៅកាន់ភាគខាងជើង។ ដើម្បីអភិវឌ្ឍវិស័យទេសចរណ៍ ខេត្ដគួរតែផ្សារភ្ជាប់ទំនាក់ទំនងជាមួយទីក្រុងហូជីមិញ ខេត្ដដុងណៃ និងតាយនិញ ដើម្បីបង្កើតកញ្ចប់សេវាកម្មទេសចរណ៍តាមដងទន្លេ»។
លោក ក្វាងថាង បានបញ្ជាក់ថា៖ «អ្នកអាចដឹងថា ខេត្ដប៊ិញដួង ជាបណ្ដុំតំបន់ទេសចរណ៍សម្បូរបែប។ តាមពិត ប៊ិញដួង មានអារាមល្បីៗដូចជា វត្ដហូយខាញ់ និងប្រាសាទ បាធានហ៊ួ ក៏ដូចជាពិធីបុណ្យផ្សេងៗរួមមាន ការប្រណាំងទូកលើដងទន្លេសៃហ្គនជាដើម»។
ខេត្ដប៊ិញដួង ក៏ជាគោលដៅសម្រាប់អភិជនចូលចិត្ដលេងកីឡាវាយកូនហ្គោលដែលមានទីលានស្ដង់ដាអន្ដរជាតិរួមទាំង ទីលានភួមី ទីលានមេគង្គ និងហាម៉ូនីផងដែរ។
ឆាល គួនយាន អគ្គនាយក Becamex Hospitality បាននិយាយថាសម្ព័ន្ធក្រុមហ៊ុននឹងធ្វើការជាមួយអ្នកដឹកនាំខេត្ដដើម្បីអភិវឌ្ឍវិស័យទេសចរណ៍។
លោកបន្ដថា៖ «យើងនឹងអភិវឌ្ឍបណ្ដាញសណ្ឋាគារ និងហាងទំនើបដើម្បីបម្រើដល់ភ្ញៀវទេសចរក្នុងខេត្ដប៊ិញដួង ដោយសារទេសចរណ៍កំពុងតែពេញនិយមខ្លាំង»៕ VNS/HR